ថៃ៖ បាតុករអាវលឿងបន្តធ្វើបាតុកម្ម ចំណែកលុយបាតបានធ្លាក់ថ្លៃខ្លំាង
នៅក្នុងប្រទេសថៃ ឥទ្ធិពលនៃវិបត្តិនយោបាយបានធ្វើឲ្យតម្លែលុយបាតធ្លាក់ថ្លៃខ្លំាង។ នៅថ្ងៃចន្ទ ទី២៣ ធ្នូនេះ លុយបាតបានធ្លាក់ដល់កម្រិតមួយយ៉ាងទាបដែលមិនធ្លាប់មានទេ គិតតំាងពី ៤ឆ្នំាកន្លងទៅ។ ទន្ទឹមគ្នានេះ ក្រុមបាតុករអាវលឿងកំពុងបន្តធ្វើបាតុកម្មជាបន្តទៀតដោយនៅថ្ងៃនេះ ពួកគេបាននំាគ្នាព្យាយាមរារំាងបេក្ខជនមិនឲ្យចូលទៅចុះឈ្មោះសម្រាប់ឈរឈ្មោះបោះឆ្នោតនាការបោះឆ្នោតមុនកាលកំណត់នៅដើមខែកុម្ភៈខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ទោះបីជាមានសំណើតាមគ្រប់រូបភាពពីលោកស្រីនាយករដ្ឋមន្រ្តីយីងឡាក់ក៏ដោយ ក៏ក្រុមបាតុករអាវលឿងមិនខ្ចីរវីរវល់ដែរ។ នៅថ្ងៃនេះ និងបន្ទាប់ពីបានចូលរួមយ៉ាងច្រើនកុះករនាថ្ងៃអាទិត្យម្សិលមិញមក លោកស៊ូទេព អតីតឧបនាយករដ្ឋមន្រ្តី និងជាមេបាតុករបានអំពាវនាវឲ្យពួកបាតុកររារាំងកុំឲ្យបេក្ខជនរបស់គណបក្សផ្សេងទៀតចូលទៅចុះឈ្មោះនៅក្នុងបញ្ជីឈរឈ្មោះសម្រាប់ការបោះឆ្នោតសភាមុនកាលកំណត់ដែលគ្រោងរៀបចំនៅថ្ងៃទី២ កុម្ភៈខាងមុខ។ ការបោះឆ្នោតដែលគណបក្សប្រជាធិបតេយ្យរបស់លោកស៊ូទេពបានប្រកាសធ្វើពហិការមិនចូលរួមទេ។ តាមគម្រោង ដណើរការចុះឈ្មោះបេក្ខជនឈរឈ្មោះបានផ្តើមនៅថ្ងៃចន្ទ ទី២៣ ធ្នូនេះ និងមានរយៈពេលមួយសប្តាហ៍។
តំាងតែពីរំលងអធ្រាត្រយប់ថ្ងៃអាទិត្យឆ្លងចូលថ្ងៃចន្ទនេះ ហ្វូងបាតុករដែលស្ថិតក្រោមការឃ្លំាមើលរបស់ប៉ូលិស និងទាហានបាននំាគ្នាទៅឡោមព័ទ្ធជុំវិញស្តាតមួយក្នុងទីក្រុងបាងកកដែលជាកន្លែងចុះឈ្មោះបេក្ខជន។ នៅវេលាម៉ោង ១១ បណ្តាបេក្ខជនចំនួន ៣៤នាក់ដែលតំណាងឲ្យ ៣៤គណបក្សនយោបាយក៏មានវត្តមានដូចការគ្រោងទុក។ តែមានតែ ៩នាក់ប៉ុណ្ណោះដែលបានចុះឈ្មោះ។ ចំណែក ២៥នាក់ទៀតបានដាក់ពាក្យប្តឹងទៅប៉ូលិស នេះបើយោងតាមគណៈកម្មការរៀបចំការបោះឆ្នោត។ យ៉ាងណាក៏ដោយ ដំណើរការចុះឈ្មោះបេក្ខជនអាចនឹងពន្យារពេលលើសពីមួយសប្តាហ៍ នៅក្នុងករណីណាដែលចំនួនចុះឈ្មោះមិនទាន់គ្រប់គ្រាន់។
ទន្ទឹមគ្នានេះ ប៉ូលិសបានព្រមានប្រាប់ហ្វូងបាតុករថា ពួកគេនឹងអាចទទួលទោសជាប់គុក និងបង់ប្រាក់ពិន័យច្រើន ប្រសិនបើពួកគេព្យាយាមរារំាងដំណើរការបោះឆ្នោតនោះ។ ដោយឡែក នៅថ្ងៃនេះ និងជាលើកទីមួយតំាងពីមានក្បួនបាតុកម្មជាថ្មីជាង ១ខែកន្លងមក លុយបាតបានធ្លាក់ថ្លៃយ៉ាងទាបដែលមិនធ្លាប់មានទេ គិតតំាងពី ៤ឆ្នំាកន្លងទៅ។ ថ្ងៃនេះ ១ដុល្លារដូរបាន ៣២, ៦៨បាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ