ថៃ៖ ហេតុអ្វីបានជាគណបក្សប្រជាធិបតេយ្យមិនព្រមចូលរួមបោះឆ្នោត ?
ចុះផ្សាយនៅថ្ងៃ៖
ស្តាប់ - ០៤:៥៥
នៅថ្ងៃអាទិត្យ ទី២២ ធ្នូនេះ ក្រុមបាតុករអាវលឿងក្នុងប្រទេសថៃបាននំាគ្នាដង្ហែរក្បួនបាតុកម្មជាថ្មីដើម្បីទាមទារឲ្យលោកស្រីនាយករដ្ឋមន្រ្តីយីងឡាក់ចុះចេញពីតំណែង។ ក្បួនបាតុកម្មជាថ្មីថ្ងៃនេះបានធ្វើឡើង បន្ទាប់ពីគណបក្សប្រឆំាងរបស់លោកអាប់ភីសិត គឺគណបក្សប្រជាធិបតេយ្យបានប្រកាសធ្វើពហិការមិនចូលរួមបោះឆ្នោតនៅថ្ងៃទី២ កុម្ភៈខាងមុខ។ គម្រោងរៀបចំបោះឆ្នោតដែលជាសំណើរបស់លោកស្រីយីងឡាក់ ក្រោយពីលោកស្រីបានប្រកាសរំលាយសភានាពេលថ្មីៗកន្លងមក។ ថ្លែងជាថ្មីនៅថ្ងៃនេះ លោកស្រីយីឡាក់បានចោទជាសំណួរថា ហេតុអ្វីបានជាពួកប្រឆំាងមិនព្រមគោរពតាមដំណើរការលទ្ធិប្រជាធិបតេយ្យ និងនៅតែទទូចចង់ឲ្យគាត់ចុះចេញពីតំណែងទៅវិញ។
ការដែលគណបក្សប្រឆំាងបានសម្រេចធ្វើពហិការមិនចូលរួមបោះឆ្នោតនៅដើមខែកុម្ភៈឆ្នំាក្រោយ គឺជាចម្លើយដែលគ្រប់គ្នាបានរង់ចំា ព្រោះថា តំាងពីមានក្បួនបាតុកម្មរបស់ក្រុមអាវលឿងជាថ្មីមក ក្រុមបាតុករមិនដែលបានទាមទារឲ្យលោកស្រីនាយករដ្ឋមន្រ្តីយីងឡាក់រំលាយសភាដើម្បីរៀបចំបោះឆ្នោតឡើងវិញទេ។ អ្វីដែលក្រុមបាតុករបានទាមទារ គឺការចុះចេញពីមុខតំណែងរបស់លោកស្រីយីងឡាក់។ តែលោកស្រីយីងឡាក់មិនព្រម ដោយជ្រើសយកផ្លូវរំលាយសភា និងរៀបចំបោះឆ្នោតឡើងវិញដែលលោកស្រីគិតថា ជាដំណោះស្រាយសមស្របតាមបែបលទ្ធិប្រជាធិបតេយ្យតែមួយគត់ដើម្បីបិទបញ្ចប់វិបត្តិ។
អ្វីដែលមេបាតុករលោកស៊ូទេពចង់បាន គឺការជ្រើសរើសមេដឹកនាំប្រទេស ដោយមិនចំាបាច់ឆ្លងកាត់ការបោះឆ្នោតទេ ពោលគឺត្រូវប្រគល់អំណាចរដ្ឋទៅឲ្យស្ថាប័នថ្មីមួយដែលគេឲ្យឈ្មោះថា “គណៈកម្មការប្រជាជន” ដែលមានសមាជិក ៤០០នាក់ តែមិនបានបញ្ជាក់ពីប្រភព និងពីរបៀបជ្រើសរើសសមាជិកទំាងនោះទេ។ គណបក្សភឿថៃមិនព្រមដោយអះអាងថា វាមិនស្របតាមគោលការណ៍លទ្ធិប្រជាធិបតេយ្យ និងផ្ទុយទៅនឹងរដ្ឋធម្មនុញ្ញ។
គណបក្សប្រជាធិបតេយ្យដឹងខ្លួនចាញ់ឆ្នោតជាមុន
ការមិនចូលរួមបោះឆ្នោត មកពីគណបក្សប្រជាធិបតេយ្យរបស់លោកអាប់ភីសិតគិតថា ខ្លួនគ្មានផ្លូវនឹងឈ្នះគណបក្សភឿថៃរបស់លោកស្រីយីងឡាក់ទេ។ ការហ៊ានអះអាងយ៉ាងដូចនេះក៏ដោយសារថាតែការចាក់ឬសគល់យ៉ាងជ្រៅទៅក្នុងស្រទាប់មហាជនថៃនៅតាមជនបទរបស់គណបក្សភឿថៃ។ គណបក្សភឿថៃដែលគ្មាននរណា ក្រៅពីក្រុមបក្សពួករបស់លោកអតីតនាយករដ្ឋមន្រ្តីធ្លាក់ពីអំណាចថាក់ស៊ីននោះទេ។ លោកថាក់ស៊ីនដែលនៅបន្តជាឥស្សរជននយោបាយដ៏មានប្រជាប្រិយភាពខ្លំាងនៅក្នុងចំណោមប្រជារាស្រ្តថៃទូទៅ ពិសេសអ្នករស់នៅតាមទីជនបទ។ គឺខុសពីគណបក្សប្រជាធិបតេយ្យរបស់លោកអាប់ភីសិតដែលប្រមូលផ្តុំដោយមនុស្សមួយក្តាប់តូច សុទ្ធសឹងជាក្រុមអ្នកមាន និងក្រុមបញ្ញវន្តរស់នៅតែក្នុងទីក្រុងបាងកក។
គួររម្លឹកជូនថា ចាប់តំាងពីឆ្នំា ១៩៩២ មកដល់សព្វថ្ងៃ គណបក្សប្រជាធិបតេយ្យមិនដែលទទួលបានជ័យជម្នះនៅក្នុងការបោះឆ្នោតម្តងណាទេ។ ផ្ទុយទៅវិញ គណបក្សរបស់ក្រុមលោកថាក់ស៊ីនទទួលបានសម្លេងគំាទ្រយ៉ាងលើសលប់ជារៀងរហូត។ ជាក់ស្តែងនៅក្នុងការបោះឆ្នោតឆ្នំា ២០១១ គណបក្សភឿថៃរបស់លោកស្រីយីងឡាក់ទទួលបានសំឡេងដ៏ច្រើនលើសលុប ពោលគឺទទួលបាន២៦៥អាសនៈ ទល់នឹង ១៥៩អាសនៈរបស់គណបក្សប្រជាធិបតេយ្យ។ ដូច្នេះសម្រាប់គណបក្សភឿថៃ ចង់បោះឆ្នោតប៉ុន្មានដងទៀត ក៏មិនញញើតដែរ។ តែសម្រាប់គណបក្សប្រជាធិបតេយ្យវិញ នេះជាល្បែងចាញ់ជាមុនដែលគួរតែចៀសវាង ប្រសិនបើអាចចៀសវាងបាន។
វិបត្តិនយោបាយថៃបានក្លាយជាវិបត្តិហែកហួរ សងសឹកគ្នា
វិបត្តិយោបាយថៃមិនមែនជាវិបត្តិមួយដែលគ្រប់ភាគីមានឆន្ទៈចង់ដោះស្រាយដើម្បីប្រយោជន៍ជាតិទៀតឡើយ តែវាបានក្លាយជាវិបត្តិទុំជោរមួយដែលបាន និងកំពុងពុះចែកសង្គមថៃជាពីរចំណែក។ និយាយឲ្យស្រួលយល់ គឺជាវិបត្តិនៃការហែកហួរគ្នារវាងអ្នកក្រីក្រនិងអ្នកមាន និងរវាងអ្នករស់នៅស្រុកស្រែចម្ការ និងអ្នករស់នៅក្នុងទីក្រុង។ អ្នកក្រីក្រ រស់នៅស្រុកស្រែចម្ការ ដែលតំណាងដោយពួកអាវក្រហម និងអ្នកមាន រស់នៅក្នុងទីក្រុងដែលតំណាងដោយឲ្យពួកអាវលឿង។ រូបភាពទំាងនេះត្រូវបានគេសម្គាល់ឃើញយ៉ាងច្បាស់នៅក្នុងក្បួនបាតុកម្មរបស់ក្រុមអាវលឿងសព្វថ្ងៃ ពិសេសការទាមទាររបស់ពួកគេដែលចង់កំចាត់ឲ្យដល់ឬសគល់នូវប្រព័ន្ធបន្សល់ទុកដោយលោកថាក់ស៊ីន។ កម្មវត្ថុរបស់លោកស៊ូទេពមានតែមួយគត់ គឺបោសសំអាតកាកសំណល់របស់លោកថាក់ស៊ីន។
គណបក្សប្រជាធិបតេយ្យយល់ថា គេមិនអាចបោសសំអាតកាកសំណល់របស់លោកថាក់ស៊ីនតាមរយៈសន្លឹកឆ្នោតបានទេ។ អ៊ីចឹងហើយបានពួកគេបដិសេធមិនចូលរួមបោះឆ្នោត ដោយចង់អូសបន្លាយវិបត្តិសព្វថ្ងៃ ឲ្យដូចក្នុងវិបត្តិឆ្នំា ២០០៦ ដែលនៅទីបំផុត កងទ័ពជាអ្នកចូលខ្លួនបិទបញ្ចប់វិបត្តិ។ តែនេះ ពិតជាល្បែងប្រថុយប្រថានមួយខ្លំាងណាស់ ព្រោះថាមកទល់ពេលនេះ កងទ័ពបានប្រកាសមិនលូកដៃ ដោយមិនចង់ធ្លាក់ចូលក្នុងល្បែងនយោបាយជាថ្មីដែលខ្លួនបានធ្វើឲ្យសេដ្ឋកិច្ចប្រទេសធ្លាក់ដុនដាបខ្លំាងនៅពេលនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ