វិបត្តិអ៊ុយក្រែនទម្លាក់តម្លៃទីផ្សារភាគហ៊ុនពិភពលោក
វិបត្តិដែលកំពុងតែវាយប្រហារប្រទេសអ៊ុយក្រែន នៅពេលនេះ ក៏បានវាយប្រហារទម្លាក់តម្លៃទីផ្សារភាគហ៊ុនពិភពលោក ពិសេសទីផ្សារភាគហ៊ុននៅអឺរ៉ុប។ អ្នកវិនិយោគនានាកំពុងតែបារម្ភថា ប្រសិនបើរុស្ស៊ីរងទណ្ឌកម្មសេដ្ឋកិច្ចជាយថាហេតុណាមួយ សហគ្រាសអឺរ៉ុបដែលបោះទីតាំងនៅរុស្ស៊ីអាចរងផលប៉ះពាល់ធ្ងន់ធ្ងរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
វិបត្តិអ៊ុយក្រែនមិនត្រឹមតែធ្វើអោយរំជើបរំជួលសហគមន៍អន្តរជាតិប៉ុណ្ណោះទេ វាក៏បានប៉ះពាល់ទីផ្សារពិភពលោកផងដែរ ពិសេសគឺទីផ្សារភាគហ៊ុនអឺរ៉ុបតែម្តង។ ជាក់ស្តែង នៅអឺរ៉ុប ថ្ងៃចន្ទនេះ ទីផ្សារភាគហ៊ុនបានធ្លាក់ចុះពីតួលេខជិត១,៨ភាគរយ ដល់៣ភាគរយ។ តួលេខនេះមិនសូវជាហួសហេតុនោះទេ បើប្រៀបនឹងតម្លៃទីផ្សារក្រុងម៉ូស្គូ។ ទីផ្សារភាគហ៊ុនក្រុងម៉ូស្គូ បានធ្លាក់ចុះដល់ទៅជាង១៣ភាគរយ ហើយរូបិយបណ្ណរូប្ល របស់រុស្ស៊ី ក៏រងការប៉ះពាល់ដោយវិបត្តិអ៊ុយក្រែនផងដែរ។ នៅអាស៊ី គេឃើញទីផ្សារភាគហ៊ុនក្រុងតូក្យូ ធ្លាក់ចុះ១,២៧ភាគរយ។
ដោយឡែក ពេលនេះ តម្លៃមាសបែរជាបានឡើងថ្លៃទៅវិញ គិតចាប់ពីថ្ងៃ៣០តុលា ឆ្នាំ២០១៣មក។ កាលពីខែតុលាឆ្នាំមុន បរិមាណមាសប្រមាណជាង៣០ក្រាម មានតម្លៃឡើងរហូតដល់ជាង១៣៥០ដុល្លារ ជាតម្លៃកម្រិតកំពូល។ ថ្ងៃចន្ទនេះ តម្លៃនេះឡើងដល់ទៅជាង១៣៤៦ដុល្លារ គឺមិនសូវជាខុសពីតម្លៃ កាលពីខែតុលាប៉ុន្មានឡើយ។ យោងតាមអ្នកវិភាគ ដោយសារស្ថានភាពអ៊ុយក្រែនធ្លាក់ដុនដាប អ្នកវិនិយោគនានាបាននាំគ្នាបោះបង់ភាគហ៊ុន ដោយងាកទៅរកទីផ្សារមាសវិញ។ ដូច្នេះ វាធ្វើអោយទីផ្សារភាគហ៊ុនធ្លាក់ចុះ។
ទន្ទឹមនេះដែរ តម្លៃប្រេងនៅតែបានបន្តឡើងថ្លៃផងដែរ។ តម្លៃប្រេងសម្រាប់ផ្គត់ផ្គង់ ក្នុងខែមេសាខាងមុខ បានឡើងដល់១០៤ដុល្លារ៦១សេន ក្នុងមួយបារីល ហើយប្រេងនៅសមុទ្រខ្មៅ ក្នុងតំបន់វិបត្តិអ៊ុយក្រែនវិញនោះ មានតម្លៃជិត១១២ដុល្លារ ក្នុងមួយបារីល។ អ៊ុយក្រែនជាកន្លែងបំរុងប្រេងទុក ហើយរុស្ស៊ីវិញនាំប្រេងច្រើនចេញទៅអឺរ៉ុបផងដែរ ពោលគឺភាគច្រើន គិតក្នុងចំណុះប្រេង៥លានបារីល ដែលត្រូវនាំចេញទៅអឺរ៉ុបក្នុងមួយថ្ងៃៗ។ មូលហេតុទាំងអស់នេះ ធ្វើអោយតម្លៃប្រេងប្រឈមនឹងការកើនឡើងបន្ថែមទៀត។
គេចាប់អារម្មណ៍ខ្លាំងលើការធ្លាក់ចុះនៃទីផ្សារពិភពលោក នៅថ្ងៃចន្ទនេះ ក៏ដោយសារតែស្ថានភាពអ៊ុយក្រែនបានរង្គោះរង្គើខ្លាំង កាលពីចុងសប្តាហ៍កន្លងទៅដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ