នាយករដ្ឋមន្រ្តីអាល្លឺម៉ង់៖ តំបន់អឺរ៉ូមិនបោះបង់ចោលក្រិក
លោកស្រីAngela Merkel បានថ្លែង នៅថ្ងៃអង្គារនេះថា ប្រទេសសមាជិកអឺរ៉ុបត្រូវរួមគ្នា និងប្រើមធ្យោបាយគ្រប់បែបយ៉ាងដើម្បីឲ្យតំបន់ប្រើប្រាក់អឺរ៉ូចេញផុតពីវិបត្តិប្រាក់បំណុល។ ជាថ្មីម្តងទៀត នាយករដ្ឋមន្រ្តីអាល្លឺម៉ង់បានបញ្ជាក់ជំហរច្បាស់របស់ខ្លួនថា សហភាពអឺរ៉ុបនឹងមិនដកប្រទេសក្រិកចេញពីប្រទេសសមាជិក ដូចជាពាក្យចចាមអារ៉ាមកន្លងមក។ ការនិយាយធានារបស់លោកស្រី Angela Merkel បានធ្វើឲ្យអ្នកវិនិយោគមានការទុកចិត្តឡើងវិញបន្តិច។ ទីផ្សារមូលបត្រ នៅប៉ារីស នៅថ្ងៃព្រឹកថ្ងៃអង្គារនេះបានឡើងចុះមិនទៀងទាត់ ជាពិសេសភាគហ៊ុនរបស់ធានាគារបារាំង បន្ទាប់ពីធ្លាក់ចុះខ្លាំង នៅថ្ងៃចន្ទម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ទីភ្នាក់ងារវាយតម្លៃហានិភ័យ ឥណទានMoody គ្រោងនឹងទម្លាក់ពិន្ទុធនាគារបារាំងបី ពីព្រោះធនាគារទាំងនេះ នឹងអាចជួបការខាតបង់ ដោយសារក្រិក អតិថិជនខ្ចីលុយសំខាន់ គ្មានលុយសង។ ព័ត៌មាននេះបានធ្វើឲ្យទីផ្សារមូលបត្រអឺរ៉ុបចាប់ផ្តើមជ្រួលច្របល់ និងធ្លាក់ចុះជាថ្មី កាលពីថ្ងៃម្សិលមិញ។ ប៉ុន្តែ ការចេញមុខធានាជួយសេដ្ឋកិច្ចក្រិក របស់នាយករដ្ឋមន្រ្តីអាល្លឺម៉ង់ បានធ្វើឲ្យទីផ្សារមូលបត្រ គ្រាន់បើបន្តិច នៅពេលព្រឹក មុននឹងធ្លាក់ដាំដូងជាថ្មី នៅល្ងាចថ្ងៃអង្គារនេះ។
និយាយប្រាប់ទៅវិទ្យុជាតិអាល្លឺម៉ង់ នៅថ្ងៃនេះ លោកស្រី Angela Merkel បានបង្ហាញពីអាទិភាពចំបងដែលសហភាពអឺរ៉ុប ត្រូវធ្វើ នោះគឺជៀសវាង ការក្ស័យធន របស់រដ្ឋជាសមាជិក។ នាយករដ្ឋមន្រ្តីអាល្លឺម៉ង់ ចង់និយាយដល់ប្រទេសក្រិក រដ្ឋសមាជិកសហភាពអឺរ៉ុប ដែលគេបារម្ភថា នឹងអាចជួបគ្រោះអស់លុយចាយ ក្នុងពេលខាងមុខនេះ។
សម្រាប់លោកស្រី Angela Merkel ភាពក្ស័យធន មិនត្រឹមតែប៉ះពាល់ដល់ក្រិកតែមួយ ប៉ុន្តែ នឹងអាចប៉ះពាល់ តិច ឬច្រើនដល់ប្រទេសសមាជិកដទៃទៀត។ ដូច្នេះ អ្វីជាអាទិភាពរបស់អឺរ៉ុប គឺធ្វើយ៉ាងណាត្រួតពិនិត្យខ្លាំង មិនឲ្យមានរដ្ឋាភិបាលរបស់ប្រទេសសមាជិកជួបគ្រោះអត់លុយចាយ។
នាយករដ្ឋមន្រ្តី អាល្លឺម៉ង់ នៅបានលើកទឹកចិត្តក្រុមវិនិយោគ ដោយបាននិយាយថា រដ្ឋាភិបាលក្រិកកំពុងចាត់វិធានការទៅតាមការចង់បានរបស់សហភាពអឺរ៉ុប និងមូលនិធិហិរញ្ញវត្ថុអន្តរជាតិ គឺអនុវត្តនយោបាយរឹតត្បិតខ្លាំង ដើម្បីកាត់បន្ថយឧុនភាពសេដ្ឋកិច្ច។ ជាថ្មីម្តងទៀត លោកស្រី Angela Merkel បញ្ជាក់ដែរថា អាល្លឺម៉ង់នឹងមិនបោះបង់ចោលក្រិក និងមិនដកក្រិកចេញពីតំបន់ចាយប្រាក់អឺរ៉ូឡើយ។
ធនាគារបារាំងវិញ ដែលនឹងត្រូវទីភ្នាក់ងារវាយតម្លៃគ្រោះហានិភ័យឥណទានទម្លាក់ចំណាត់ថ្នាក់ ក៏បានចេញមុខអះអាងដែរថា ខ្លួននៅតែមានលុយច្រើនផ្សេងទៀត ប្រសិនបើក្រិកគ្មានលុយសងធនាគារ។ ឧទាហរណ៍ធនាគារបារំាង Société Générale ដែលបានផ្តល់ប្រាក់កម្ចីដល់រដ្ឋាភិបាល និងក្រុមហ៊ុនក្រិក ត្រូវខាតបង់ ៦ពាន់លានអឺរ៉ូ ប្រសិនបើក្រិកក្ស័យធន គ្មានលុយសង។ ប៉ុន្តែ នាយកធានាគារនេះបានបង្ហាញថា ធនាគារមានលុយប្រមាណ ១០០ពាន់លានដុល្លារ ក្នុងស្តុកបម្រុង ដើម្បីទប់ទល់វិបត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ