អ្នកភូមិថៃប្តឹងប្រឆាំងការសាងសង់ទំនប់វារីអគ្គិសនីនៅប្រទេសឡាវ
អ្នកភូមិថៃដែលរស់នៅលើដងទន្លេមេគង្គបានប្តឹងប្រឆាំងការសាងសង់ទំនប់វារីអគ្គិសនីនៅលើទន្លេដែលឋិតនៅប៉ែកប្រទេសឡាវ។ ពួកគេបានដាក់ពាក្យនៅថ្ងៃអង្គារទី៧សីហានេះ ប្តឹងទៅតុលាការនៅទីក្រុងបាងកក ដើម្បីខាឃាំងកុំឲ្យប្រទេសថៃទិញថាមពលអគ្គិសនីផលិតដោយអនាគតទំនប់វារីអគ្គិសនីនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
អ្នកភូមិថៃប្រមាណ៥០នាក់តំណាងសហគមន៍ថៃដែលរស់នៅលើត្រើយទន្លេមេគង្គ បានដាក់ពាក្យប្តឹងប្រឆាំងទល់នឹងសហគ្រាសសាធារណៈ Electricity Generating Authority of Thailand ឬ អាជ្ញាធរអគ្គិសនីថៃ ក្រសួងថាមពល ហើយនិងរដ្ឋាភិបាល។
“ទន្លេមេគង្គគឺជាអាយុជីវិតរបស់ពួកយើង ទំនប់វារីអគ្គិសនីឡាវនេះនឹងធ្វើឲ្យប៉ះពាល់ដល់ជីវភាពរស់នៅរបស់ពួកយើង”។ នេះជាការថ្លែងឲ្យដឹងដោយលោក Niwat Roykaew អាយុ៥២ឆ្នាំ រស់នៅក្នុងខេត្តឆៀងរ៉ៃឋិតនៅប៉ែកខាងជើងនៃប្រទេសថៃ ដែលទន្លេមេគង្គបានជួយផ្តល់ទឹកនិងត្រីឲ្យពួកគេសម្រាប់ទទួលទាន។
ប្រទេសឡាវដែលគ្មានជាប់នឹងឆ្នេរសមុទ្រហើយនិងគ្មានឧស្សាហកម្ម សង្ឃឹមទៅលើថាមពលអគ្គិសនីផលិតដោយទំនប់វារីអគ្គិសនី សម្រាប់ធ្វើការអភវឌ្ឍន៍សេដ្ឋកិច្ចរបស់ខ្លួន។ ប្រទេសឡាវសុបិនចង់ក្លាយទៅជា “ប្រទេសអ្នកផ្តល់ថាមពលអគ្គិសនីឲ្យអាស៊ីអាគ្នេយ៍ទាំងមូល”។
សូមបញ្ជាក់ថា ប្រទេសថៃ ដែលកំពុងត្រូវការថាមពលអគ្គិសនីយ៉ាងច្រើនមហិមាយកមកអភិវឌ្ឍសេដ្ឋកិច្ចរបស់ខ្លួន ច្បាស់ជាត្រូវការទិញថាមពលអគ្គិសនីដ៏ច្រើនលើសលុបដែលផលិតដោយទំនប់វារីអគ្គិសនីនៅ Xayaburi ។ គម្រោងសាងសង់ទំនប់វារីអគ្គិសនីនៅ Xayaburi ដែលត្រូវការទឹកប្រាក់ប្រមាណ ៣ ៨០០លានដុល្លារ បានត្រូវទីក្រុងវៀងចន្ទប្រកាសផ្អាកការសាងសង់ ដើម្បីធ្វើការឆ្លើយតបទៅនឹងក្តីបារម្ភរបស់ប្រទេសជិតខាង។
គួរកត់សម្គាល់ថា ទំនប់វារីអគ្គិសនីនៅ Xayaburi បានក្លាយទៅជានិមិត្តរូបនៃហានិភ័យដែលអាចបង្កទៅលើទន្លេមេគង្គ។ ប្រទេសវៀតណាមនិងប្រទេសកម្ពុជា បារម្ភជាពិសេសទៅលើការធ្វើឲ្យប៉ះពាល់ដល់ស្តុកនៃមច្ឆាជាតិ។
ចំណែកឯអ្នកការពារបរិស្ថានវិញ បានថ្លែងប្រកាសថា “ទំនប់វារីអគ្គិសនីនៅ Xayaburi ដែលមានដល់ទៅ១ ២៦០មេហ្កាវ៉ាត់ ច្បាស់ជាបង្កឲ្យកើតមានការខូចខាតយ៉ាងដំណំដល់ប្រជាជនប្រមាណ៦០លាននាក់ដែលពឹងផ្អែកទៅលើទន្លេមេគង្គ សម្រាប់ធ្វើការដឹកជញ្ជូន មច្ឆាជាតិជាចំណីហារ ហើយនិងសម្រាប់អភិវឌ្ឍសេដ្ឋកិច្ចរបស់ខ្លួន”។
រីឯអ្នកប្រឆាំងទល់នឹង គម្រោងសាងសង់ទំនប់វារីអគ្គិសនីនៅ Xayaburi សង្ឃឹមថា សេចក្តីសម្រេចរបស់តុលាការថៃនឹងបង្ខំឲ្យប្រទេសឡាវសើរើមើលឡើងវិញ ផែនការសាងសង់ទំនប់វារីអគ្គិសនីនៅ Xayaburi ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ