តំណាងរដ្ឋាភិបាលស៊ីរី និងក្រុមប្រឆំាងផ្តើមជួបគ្នាវគ្គទីពីរនៅក្នុងទីក្រុងហ្សឺណែវ ប្រទេសស្វីស
នៅថ្ងៃចន្ទ ទី១០ កុម្ភៈនេះ តំណាងរដ្ឋាភិបាលស៊ីរី និងក្រុមប្រឆំាងស៊ីរីផ្តើមអង្គុយចរចាទល់មុខគ្នាជាថ្មីនៅក្នុងទីក្រុងហ្សឺណែវ ប្រទេសស្វីស ដោយមានលោកឡាក់ដា ប្រាហ៊ីមី ប្រេសិតពិសេសរបស់អង្គការសហប្រជាជាតិ និងសម្ព័ន្ធអារ៉ាប់ធ្វើជាអន្តរការី។ ជំនួបជាថ្មីក្នុងថ្ងៃនេះបានធ្វើឡើង បន្ទាប់ពីភាគីជម្លោះទំាងពីរបានជួបគ្នាម្តងហើយកាលពីមួយសប្តាហ៍មុនក្នុងទីក្រុងហ្សឺណែវដែលគេហៅថា ហ្សឺណែវទី២។ ជំនួបនាពេលនោះត្រូវបានបញ្ចប់ដោយនៅមិនទាន់មានដំណោះស្រាយនយោបាយទេ។
ចុះផ្សាយនៅថ្ងៃ៖
ស្តាប់ - ០២:១៨
ដំបូងនៅថ្ងៃចន្ទ ទី១០ កុម្ភៈនេះ លោកអន្តរការីឡាក់ដា ប្រាហ៊ីមីបានជួបភាគីនីមួយៗដាច់ឡែកពីគ្នា មុននឹងជួបរួមគ្នានៅលើតុតែមួយ ក្នុងបន្ទប់តែមួយនៅថ្ងៃអង្គារ ទី១១ កុម្ភៈ និងដែលតាមគម្រោង នឹងត្រូវបន្តរហូតដល់ថ្ងៃសុក្រ ទី១៤ កុម្ភៈចុងសប្តាហ៍នេះ។ ក៏ដូចនៅក្នុងជំនួបក្នុងខែមករាកន្លងទៅដែរ មានប្រធានបទសំខាន់ចំនួន ៣ ដែលកិច្ចប្រជុំត្រូវលើកយកទៅជជែក ទីមួយ ស្វែងរកកុងសង់ស៊ុសក្នុងការបង្កើតរដ្ឋាភិបាលបណ្តោះអាសន្ន ទីពីរ ស្វែងរកកិច្ចព្រមព្រៀងបទឈប់បាញ់ និងទីបី បើកឲ្យមានសហប្រតិបត្តិការផ្នែកមនុស្សធម៌នៅតាមតំបន់ជម្លោះ ពិសេសជម្លៀសជនស៊ីវិលដែលកំពុងជាប់កុននៅក្នុងការវាយប្រហារគ្នារវាងកម្លំាងរដ្ឋាភិបាល និងកម្លំាងប្រឆំាង។
ក៏ដូចជានៅក្នុងជំនួបកាលពីមួយសប្តាហ៍កន្លងទៅដែរ តំណាងភាគីរដ្ឋាភិបាលស៊ីរី និងក្រុមប្រឆំាងមិនធ្វើកិច្ចសន្ទនា ផ្តោះប្តូរពាក្យសម្តីដោយផ្ទាល់រវាងគ្នាទេ តែត្រូវឆ្លងកាត់តាមលោកអាជ្ញាកណ្តាលឡាក់ដា ប្រាហ៊ីមី។ លោកប្រាហ៊ីមីដែលបានសន្យាថា លោកនឹងដឹកនំាកិច្ចប្រជុំនៅក្នុងវគ្គទីពីរលើកនេះឲ្យទទួលបានលទ្ធផលវិជ្ជមានជាងវគ្គទីមួយដែលមានលក្ខណៈតានតឹង និងប្រទូសរ៉ាយខ្លំាង។ អ្វីដែលលោកប្រេសិតអង្គការសហប្រជាជាតិ និងសម្ព័ន្ធអារ៉ាប់ត្រូវសម្រេចឲ្យបាននៅក្នុងជំនួបលើកទីពីរពេលនេះ គឺវិធានការមនុស្សធម៌ប្រកបដោយតម្លាភាព និងភាពស្មោះត្រង់ពីភាគីទំាងសងខាង។
នៅចុងសប្តាហ៍កន្លងទៅ និងដោយផ្អែកតាមកិច្ចព្រមព្រៀងមនុស្សធម៌ដែលចុះហត្ថលេខាដោយភាគីទំាងពីរកាលពីកិច្ចចរចាលើកទីមួយ បានអនុញ្ញាតឲ្យមានការជម្លៀសជនស៊ីវិលចេញពីទីក្រុងហូមប្រមាណជា ៦០០នាក់ដែលបានជាប់កុននៅទីនោះតំាងពី ១ឆ្នំាកន្លះមកហើយ។ តែការជម្លៀសដែលរៀបចំអង្គការសហប្រជាជាតិ និងអង្គការ Croissant ក្រហមបានទទួលរងការបាញ់ប្រហារដោយភាគីនីមួយៗបានទម្លាក់កំហុសដាក់គ្នាទៅវិញ ទៅមក។
យ៉ាងណាក៏ដោយ នៅមានប្រធានបទក្តៅចំនួនពីរដែលលោកអន្តរការីត្រូវព្យាយាមសម្រេចឲ្យបាន គឺបទឈប់បាញ់ និងការបង្កើតរដ្ឋាភិបាលបណ្តោះអាសន្នមួយ។ រដ្ឋាភិបាលបណ្តោះអាសន្នដែលក្រុមប្រឆំាង ក៏ដូចជាប្រទេសលោកខាងលិចមួយចំនួន មានអាមេរិកជាដើម មិនចង់ឃើញមានវត្តមានលោកប្រធានាធិបតីស៊ីរីអាសាដបន្តទៀតទេ។ តែភាគីរដ្ឋាភិបាលធ្លាប់បានបញ្ជាក់រួចហើយថា គេមិនអាចទាត់ចោលឥស្សរជននយោបាយបច្ចុប្បន្នណាម្នាក់របស់រដ្ឋាភិបាលសព្វថ្ងៃនៅក្នុងរដ្ឋាភិបាលបណ្តោះអាសន្ននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ