គ្មានជំនួបទល់មុខគ្នារវាងតំណាងរដ្ឋាភិបាលស៊ីរី និងក្រុមប្រឆំាងស៊ីរីទេ
នៅថ្ងៃសុក្រ ទី២៤ មករា តំណាងរដ្ឋាភិបាលស៊ីរី និងក្រុមប្រឆំាងស៊ីរីមិនបានអង្គុយជួបទល់មុខគ្នាដូចដែលបានគ្រោងទុកនាជំនួបក្នុងទីក្រុងហ្សឺណែវ ប្រទេសស្វ៊ីសទេ។ លោកឡាក់ដា ប្រាហ៊ីមីដែលជាអន្តរការីរបស់អង្គការសហប្រជាជាតិបានសម្រេចទទួលជួបដាច់ដោយឡែកពីគ្នាជាមួយតំណាងរដ្ឋាភិបាលស៊ីរី និងក្រុមប្រឆំាងស៊ីរី។ ហេតុអ្វីបានជាគូបដិបក្ខទំាងពីរមិនអាចអង្គុយចរចាក្នុងតុតែមួយជាមួយគ្នាបាន?
ចុះផ្សាយនៅថ្ងៃ៖
ស្តាប់ - ០២:២២
គឺគេត្រូវរង់ចំារហូតដល់ដើមរសៀលថ្ងៃទី២៤ មករា ទើបលោកឡាក់ដា ប្រាហ៊ីមីដែលជាអន្តរការីរបស់អង្គការសហប្រជាជាតិបានសម្រេចមិនរៀបចំជំនួបទល់មុខគ្នារវាងរដ្ឋាភិបាលស៊ីរីតំណាងដោយប្រមុខការទូត និងក្រុមប្រឆំាងស៊ីរីទេ។ លោកប្រាហ៊ីមីដែលនៅទីបំផុត ក៏បានទទួលជួបភាគីនីមួយៗដាច់ដោយឡែកពីគ្នា។ តែយ៉ាងណាក៏ដោយ អ្នកនំាពាក្យរបស់អង្គការសហប្រជាជាតិមិនបានចាត់ទុកកិច្ចការនេះថា ជារឿងបរាជ័យដែរ និងថា គេត្រូវរង់ចំាមើលជាបន្តទៀតនាពេលខាងមុខ។
តាមពិតទៅ គឺក្រុមប្រឆំាងរដ្ឋាភិបាលស៊ីរីទេ ដែលបានបដិសេធមិនចូលអង្គុយចរចាទល់មុខគ្នាជាមួយតំណាងរដ្ឋាភិបាលស៊ីរី។ ក្រុមប្រឆំាងបានបញ្ជាក់ថា ខ្លួនអាចនឹងចូលអង្គុយជជែកទល់មុខគ្នាជាមួយរដ្ឋាភិបាលស៊ីរីបាន លុះត្រាណាតែរបបក្រុងដាម៉ាស់សព្វថ្ងៃទទួលយកគោលការណ៍ក្នុងបង្កើតរដ្ឋាភិបាលស៊ីរីអន្តរកាលមួយដែលសម្រចនៅក្នុងសន្និសីទទីក្រុងហ្សឺណែវ១ កាលពីថ្ងៃទី៣០ មិថុនា ឆ្នំា ២០១២ ជាមុនសិន។ ទន្ទឹមគ្នានេះ ក្រុមប្រឆំាងក៏បានសុំឲ្យរបបក្រុងដាម៉ាស់ប្រកាសទទួលស្គាល់ជាលាយលក្ខណ៍អក្សរ ពោលមិនមែនតែលើបបូរមាត់ទេ។ តែរហូតមកដល់ពេលនេះ ទីក្រុងដាម៉ាស់បានបដិសេធជានិច្ច ទំាងជាលាយលក្ខណ៍អក្សរ ក៏ដូចជានិយាយតែមាត់។
តាមការគ្រោងទុក សន្និសីទស្តីពីសន្តិភាពនៅក្នុងប្រទេសស៊ីរីនឹងមានដំណើរការរហូតដល់សប្តាហ៍ក្រោយ តែតំាងពីសន្និសីទចាប់ផ្តើមបើកកាលពីថ្ងៃពុធមក សេចក្តីសង្ឃឹមថាមានជំនួបមួយ ទល់មួយរវាងរដ្ឋាភិបាល និងក្រុមប្រឆំាងមានកាន់តែស្តួចស្តើងទៅៗពីមួយថ្ងៃ ទៅមួយថ្ងៃ នេះជាបញ្ជាក់របស់អ្នកការទូតបស្ចិមលោកម្នាក់។ រហូតមកដល់ថ្ងៃនេះ និងបើទោះបីជាមានការអំពាវនាវឲ្យភាគីជម្លោះទំាងពីរអត់ធ្មត់ក៏ដោយ ក៏ការបន្តឹងសរសៃ ក ដាក់គ្នានៅបន្តមានពីមួយថ្ងៃ ទៅមួយថ្ងៃ។ យោងតាមលោកឡាក់ដា ប្រាហ៊ីមី ភាគីជម្លោះទំាងពីរក៏បានប្រកាសត្រៀមខ្លួនដើម្បីជជែកពីការដោះដូរអ្នកទោស ការបើកផ្លូវសម្រាប់ជំនួយមនុស្សធម៌ និងការឈប់បាញ់គ្នា។
តាមការពិនិត្យជារួមរបស់ក្រុមអ្នកសង្កេតការណ៍ អ្វីដែលជាឧបសគ្គធំនៅក្នុងសន្និសីទទីក្រុងហ្សឺណែវ ២ ពេលនេះ គឺតួអង្គលោកប្រធានាធិបតីស៊ីរីបច្ចុប្បន្នអាសាដដែលក្រុមប្រឆំាងមិនចង់ឃើញមានវត្តមាននៅក្នុងរដ្ឋាភិបាលអន្តរកាលនាថ្ងៃខាងមុខទេ។ តែលោកអាសាដនៅតែមានការគំាទ្រពីប្រទេសលោកខាងលិចមួយចំនួន ពិសេសរុស្ស៊ីតែម្តង។ ខណៈនេះ តំណាងរដ្ឋាភិបាលស៊ីរីបានព្រមានដើរចេញពីសន្និសីទនេះ ប្រសិនបើសន្និសីទនេះមិនអាចនិយាយអ្វីឲ្យបានច្បាស់លាស់ទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ