យន្តហោះគ្មានមនុស្សបើកDrone សម្លាប់ ក្រុមអាល់កៃដា នៅយេម៉ែន
យ៉ាងហោច សមាជិកមនុស្សប្រាំបីនាក់បានស្លាប់ នៅក្នុងការវាយប្រហាររបស់យន្តហោះគ្មានមនុស្សបើក នៅភាគខាងត្បូងប្រទេស យេម៉ែន កាលពីថ្ងៃអាទិត្យ ទី ២០ មេសា។ ក្នុងចំណោមជនរងគ្រោះទាំង៨នាក់ មានប្រាំនាក់ ជាសមាជិករបស់ក្រុមអាល់កៃដា នៅយេម៉ែន ចំណែកមនុស្សស្លាប់បីនាក់ទៀត ជាជនស៊ីវិល ដែលរងគ្រោះថ្នាក់ នៅក្នុងពេលយន្តហោះDrone បាញ់ទៅលើរថយន្តដែលបើកបរដោយសមាជិកអាល់កៃដា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
អ្នកទទួលខុសត្រូវរបស់ក្រុមកុលសម្ព័ន្ធ ភាគខាងត្បូងប្រទេសយេម៉ែន បាននិយាយប្រាប់ទីភ្នាក់ងារព័ត៌មានបារាំង ថា សមាជិកក្រុមអាល់កៃដា ៥នាក់បានស្លាប់ នៅក្នុងការវាយប្រហាររបស់យន្តហោះDrone។ បើទោះបីជាគេមិនបានបញ្ជាក់ថា ការវាយប្រហារធ្វើឡើងដោយស្នាដៃរបស់ក្រុមណា ប៉ុន្តែ នៅយេម៉ែន អាមេរិកជាប្រទេសតែមួយគត់ដែលបើកប្រតិបត្តិការយន្តហោះDrone ប្រឆាំងនឹងក្រុមអាល់កៃដា។
កាលពីថ្ងៃសៅរ៍ ប្រតិបត្តិការយន្តហោះDroneស្រដៀងគ្នានេះ បានសម្លាប់សមាជិក១០នាក់របស់បណ្តាញអាល់កៃដា។ តាមប្រភពពីក្រសួងការពារជាតិយេម៉ែន សមាជិកអាល់កៃដា ដែលគេសម្លាប់បាន សុទ្ធសឹងជាមុខសញ្ញា មនុស្សដែលគ្រោះថ្នាក់ និងដែលបានរៀបចំគម្រោងដើម្បីសម្លាប់អ្នកនយោបាយ និងយោធា នៅប្រទេសយេម៉ែន។ តាមប្រភពដដែល សមាជិកម្នាក់ដែលគេបានសម្លាប់ កាលពីថ្ងៃអាទិត្យ គឺជាឃាតករ ដែលបានសម្លាប់អនុចៅហ្វាយខេត្តម្នាក់នៅក្នុងប្រទេសយេម៉ែន។
តាមសេចក្តី ប្រកាសព័ត៌មានរបស់ក្រសួងការពារជាតិយេម៉ែន ប្រតិបត្តិការរបស់យន្តហោះDroneបានដៅទៅលើជំរំហ្វឹកហ្វឺនរបស់បណ្តាញអាល់កៃដា នៅភាគខាងត្បូងយេម៉ែន។ កាលពីខែមីនាកន្លងទៅ ប្រធានាធិបតីថ្មីរបស់យេម៉ែន បាននិយាយការពារវត្តមានរបស់យន្តហោះDroneនៅក្នុងទឹកដីយេម៉ែន នៅពេលដែលក្រុមអង្គការសិទ្ធិមនុស្សបានចោទប្រកាន់ថា គឺជនស៊ីវិលដែលរងគ្រោះច្រើន ដោយសារការវាយប្រហាររបស់យន្តហោះDrone។
សូមជំរាបជូនថា ភាគខាងត្បូង យេម៉ែន ជាសម្បុក ប្រមូលផ្តុំរបស់ក្រុមអាល់កៃដាប្រចាំឧបទ្វីបអារ៉ាប់។ ក្រុមនេះកំពុងព្យាយាមពង្រឹងកម្លាំងរបស់ខ្លួន នៅក្នុងខេត្តBaida ដែលជាភូមិកំណើតរបស់មេអាល់កៃដា បច្ចុប្បន្ន គឺ Nassir Al Wahichi។ នៅក្នុងវីដេអូ របស់ក្រុមជីហាត កាលពីខែមីនាកន្លងទៅ គេឃើញ អតីតសមាជិកអាល់កៃដា ១៩នាក់ ដែលលួចរត់គេចចេញពីគុក នៅយេម៉ែន ត្រូវបានទទួលស្វាគម អបអរ ដោយគ្នីគ្នារបស់គេ នៅក្នុងជំរំមួយ ដែលស្ថិតនៅក្នុងតំបន់ភ្នំ ដែលយោធាយេម៉ែន ពិបាកនឹងចូលទៅបោសសម្អាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ