ភេរវកម្មអត្តឃាតរបស់អាល់កៃដានៅទីក្រុងសាណា
ទាហានប្រមាណជិត១០០នាក់បានស្លាប់នៅក្នុងភេរវកម្មអត្តឃាតរបស់អាល់កៃដានៅទីក្រុងសាណាកាលពីថ្ងៃចន្ទទី២១ឧសភាឆ្នាំ២០១២ម្សិលមិញ។ ភេរវកម្មអត្តឃាតនេះហៀបតែនឹងប្រល័យជីវិតរបស់លោករដ្ឋមន្ត្រីក្រសួងការពារជាតិ ហើយក្រុមអាល់កៃដាបានគំរាមថា នឹងវាយប្រហារជាថ្មីទៀតទៅលើក្រុមទាហានដែលបានធ្វើការវាយលុកទៅលើក្រុមអ៊ីស្លាមជ្រុលនិយមនៅប៉ែកខាងត្បូងនៃប្រទេសយេម៉ែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ភេរវកម្មអត្តឃាតនេះជាភេរវកម្មដ៏ធំធេងមួយពុំដែលកើតមានតាំងពីលោកប្រធានាធិបតីយេម៉ែន Abd Rabbo Mansour Hadi បានឡើងមកកាន់អំណាចនៅខែកុម្ភៈកន្លងទៅនេះ។ លោកប្រធានាធិបតីយេម៉ែនដែលបានសន្យានៅក្នុងសេចក្តីថ្លែងការណ៍មួយថា “នឹងបន្តធ្វើសង្គ្រាមប្រឆាំងទល់នឹងពួកភេរវនិយម ទោះបីជាត្រូវធ្វើពលិកម្មយ៉ាងណាក៏ដោយ”។
“សហរដ្ឋអាមេរិកបារម្ភយ៉ាងខ្លាំងទៅលើសកម្មភាពរបស់ពួកអាល់កៃដានិងពួកអ៊ីស្លាមជ្រុលនិយមនៅប្រទេសយេម៉ែន” នេះជាប្រតិកម្មរបស់លោកប្រធានាធិបតីអាមេរិកបារ៉ាក់អូបាម៉ា។
ចំណែកឯអគ្គលេខាធិការនៃអង្គការសហប្រជាជាតិ លោក បាន គីមូនវិញ បានថ្កោលទោសយ៉ាងខ្លាំងក្លាទៅលើភេរវកម្មអត្តឃាតនេះ ហើយបានថ្លែងទាមទារឲ្យរាល់ភាគីពាក់ព័ន្ធទាំងអស់នៅប្រទេសយេម៉ែនបោះបង់ចោលអំពើហិង្សា។
ទន្ទឹមគ្នានេះ សមាជិកទាំង១៥នៃក្រុមប្រឹក្សាសន្តិសុខនៃអ,ស,ប,បានបរិហារយ៉ាងខ្លាំងក្លាទៅលើភេរវកម្មអត្តឃាតនេះ ហើយបានប្រកាសបញ្ជាក់ថា “គេនឹងធ្វើការប្រយុទ្ធប្រឆាំងទល់នឹងអំពើភេរវកម្មដែលជាគ្រោះថ្នាក់មួយដ៏ធំគំរាមដល់សន្តិភាពនិងសន្តិសុខអន្តរជាតិ”។
រីឯប្រមុខការទូតនៃសហភាពអឺរ៉ុប លោកស្រី Cathereine Ashton បានថ្លែងប្រកាសថា “សហភាពអឺរ៉ុបថ្កោលទោសយ៉ាងធ្ងន់បំផុតទៅលើភេរវកម្មអត្តឃាតដ៏ហិង្សានៅទីក្រុងសាណា ហើយបារម្ភខ្លាចក្រែងអំពើហិង្សាទាំងនេះធ្វើឲ្យប្រទេសយេម៉ែនឃ្លាតចាកពីអភិក្រមសន្តិភាព”។
ចំណែកឯលោកប្រធានាធិបតីបារាំងហ្វ្រង់ស័រហូឡង់វិញបានថ្លែងសន្យាថា “ប្រទេសបារាំងបន្តធ្វើការគាំទ្ររដ្ឋាភិបាលនិងប្រជាជនយេម៉ែនក្នុងការប្រយុទ្ធប្រឆាំងទល់នឹងភេរវនិយម”។
គួរបញ្ជាក់ថា ទាហានរងគ្រោះជាទាហានចេញពីកងកម្លាំងការពារសន្តិសុខដែលដឹកនាំដោយលោកឧត្តមសេនីយ៍ យ៉ាហា មហាមេដ អាបដាឡាហ៍ សាឡេហ៍ ដែលត្រូវជាក្មួយប្រុសរបស់អតីតប្រធានាធិបតីយេម៉ែន អាលី អាបដាឡាហ៍ សាឡេហ៍។ ការផ្ទុះបានកើតមានឡើងនៅចំមុខវេទិកាដែលមានវត្តមានរបស់លោករដ្ឋមន្ត្រីក្រសួងការពារជាតិ មហាមេដ ណាស៊ែរ អាហមេដ ហើយនិងអគ្គសេនាធិការលោកឧត្តមសេនីយ៍ អាហមេដ អាលីអាល-អាឈូអាល។ ក៏ប៉ុន្តែអ្នកទាំងពីរពុំបានទទួលរងគ្រោះឡើយ។ វេទិកានេះបានត្រូវគេរៀបចំឡើងដើម្បីប្រារព្ធបុណ្យខួបទី២២នៃការបង្រួបបង្រួមប្រទេសយេម៉ែនខាងជើងជាមួយប្រទេសយេម៉ែនខាងត្បូង ហើយដែលលោកប្រធានាធិបតីយេម៉ែន Abd Rabbo Mansour Hadi ត្រូវឡើងមកថ្លែងសុន្ទរកថានៅលើវេទិកានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ