G20 សម្រេចផ្តល់សន្ទុះរូបិយប័ណ្ណ និងហិរញ្ញវត្ថុដើម្បីជម្រុញកំណើនសេដ្ឋកិច្ច
ឆ្លងកាត់ការប្រជុំរយៈពេលពីរថ្ងៃ នៅទីក្រុងសៀហៃ រដ្ឋមន្ត្រីហិរញ្ញវត្ថុនៃប្រទេសសេដ្ឋកិច្ចនាំមុខទាំង២០ បានសម្រេចគ្នាអនុវត្តនយោបាយ ផ្តល់សន្ទុះរូបិយវត្ថុ និងសន្ទុះហិរញ្ញវត្ថុ ដើម្បីធ្វើឲ្យសេដ្ឋកិច្ចពិភពលោក មានលំនឹងឡើងវិញ។ ទោះបីជាយ៉ាងណា រដ្ឋមន្ត្រីអាលឺម៉ង់ ដែលមិនពេញចិត្តនឹងមធ្យោបាយទាំងនេះ បានក្រើនរំលឹកថា វាមិនគ្រាន់តែជាមធ្យោបាយដែលគ្មានប្រសិទ្ធភាពយូរអង្វែងប៉ុណ្ណោះទេ តែវាអាចប្រៀបបាននឹងគ្រាប់បែកបង្កៃ ដែលរងចាំតែដល់ពេលផ្ទុះ។
ចុះផ្សាយនៅថ្ងៃ៖
ស្តាប់ - ០២:០៦
បើទោះជាមានចរន្តគំនិតមិនត្រូវគ្នា ក្នុងពេលប្រជុំរយៈពេលពីរថ្ងៃមកនេះ ក្រុមប្រទេសសេដ្ឋកិច្ចនាំមុខទាំង២០ រឺហៅថាក្រុមប្រទេស G20 ដែលមានរដ្ឋមន្ត្រីក្រសួងហិរញ្ញវត្ថុ និងប្រធានធនាគាកណ្តាលរបស់ប្រទេសនីមួយៗ បានសម្រេចគ្នា ប្រើប្រាស់មធ្យោបាយពីរ ដើម្បីជំរុញកំណើនសេដ្ឋកិច្ច ដែលកំពុងតែមានបញ្ហា។
មធ្យោបាយទាំងពីរនោះ គឺទីមួយ ផ្តល់សន្ទុះរូបិយប័ណ្ណ មានន័យថាធនាគាកណ្តាលនឹងអាចចាក់បញ្ចូលសាច់ប្រាក់ទៅក្នុងចរន្តសេដ្ឋកិច្ច តាមរយៈការផ្តល់កម្ចីអភិវឌ្ឍន៍ដែលមានកាប្រាក់ទៀបបំផុត។ រឺឯមធ្យោបាយទីពីរ គឺការផ្តល់សន្ទុះហិរញ្ញវត្ថុ មានន័យថារដ្ឋត្រូវបង្កើនការចំណាយសាធារណៈ តាមរយៈបង្កើនគម្រោងអភិវឌ្ឍន៍ រឺសាងសង់ផ្សេងៗ ដើម្បីឲ្យសេដ្ឋកិច្ចមានដំណើរការ។ យោងតាមឯកសារព្រាងរបស់កិច្ចប្រជុំដែលផ្សាយដោយ ទីភ្នាក់ងារព័ត៌មាន Bloomberg គឺមធ្យោបាយទាំងពីរនេះ នឹងត្រូវអនុវត្តជាលក្ខណៈបុគ្គល មានន័យថាតាមប្រទេសនីមួយ ព្រមទាំងជាលក្ខណៈរួមគ្នាផង។
ប៉ុន្តែសម្រាប់លោករដ្ឋមន្ត្រីហិរញ្ញវត្ថុអាលឺម៉ង់ ដែលចេញមុខតវ៉ាខ្លាំងជាងគេលើមធ្យោបាយទាំងពីរខាងលើនេះ លោកយល់ថា វាជាមធ្យោបាយសម្រាប់តែមួយពេល ហើយទៅថ្ងៃមុខវាអាចបកក្បាលមកកម្ទេចសេដ្ឋកិច្ច និងទីផ្សារហិរញ្ញវត្ថុអន្តរជាតិវិញមិនខាន។ មិនត្រឹមតែប៉ុណ្ណោះលោកបន្ថែមថា មធ្យោបាយឥតបានការទាំងនេះ វានឹងធ្វើឲ្យគ្រប់គ្នាខាតពេល ដោយមិនបានយកពេលទៅពិចារណាលើការធ្វើកំនែទម្រង់ស៊ីជម្រៅ នៃប្រព័ន្ធសេដ្ឋកិច្ចពិភពលោក ដែលរំពឹងទាំងស្រុងតែទៅលើទីផ្សារភាគហ៊ុនអន្តរជាតិ។
ជាការពិតណាស់ ការចាក់បញ្ចូលសាច់ប្រាក់ទៅក្នុងចរន្តសេដ្ឋកិច្ច តាមរយៈការផ្តល់កម្ចីក្នុងកាប្រាក់ថោកបំផុត វាមិនខុសពីចិញ្ចឹមបំណុលរបស់ក្រុមហ៊ុនសហគ្រាស ដែលមានច្រើនស្រាប់ទៅហើយ ឲ្យកាន់តែរីកធំទេ។ តួលេខបំណុលកាន់តែប៉ោង ធនាគាមិនអាចយកការប្រាក់ និងកម្ចីដើមត្រឡប់មកវិញ ដែលទាំងនេះវាមិនខុសពីប៉េតប៉ោងមួយ ដែលកាន់តែប៉ោងទៅៗ ហើយទីបំផុតវានឹងផ្ទុះធ្លាយ។ ចំណែកការផ្តល់សន្ទុះហិរញ្ញវត្ថុរបស់រដ្ឋ តាមរយៈការបង្កើនការចំណាយសាធារណៈ គឺវារិតតែបង្កើនកំណុលសាធារណៈរបស់រដ្ឋឲ្យកាន់តែកើនដែរ។
វិបត្តិសេដ្ឋកិច្ចចិន តម្លៃប្រាក់យាន់ធ្លាក់ទាប តម្លៃប្រេងចុះថោង វិបត្តិតំបន់ចាយលុយអឺរ៉ូ អង់គ្លេសគំរាមដើរចេញពីសហភាពអឺរ៉ុប ទាំងអស់នេះគឺប្រៀបដូចជាគ្រាប់បែកដែលកំពុងរងចាំថ្ងៃផ្ទុះ ធ្វើឲ្យទីផ្សារហិរញ្ញវត្ថុអន្តរជាតិ បែកជាបំណែកមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ