Edward Snowden លេចមុខជាថ្មី នៅថ្ងៃបុណ្យណូអែល
៦ខែក្រោយការទទួលបានសិទ្ធិជ្រកកោននៅក្នុងប្រទេសរុស្ស៊ី អតីតបុគ្គលិកទីភ្នាក់ងារសន្តិសុខជាតិរបស់អាមេរិកយុវជន Edward Snowdenបានចេញមុខជាលើកដំបូងនៅតាមកញ្ចក់ទូរទស្សន៍អង់គ្លេស នៅក្នុងថ្ងៃបុណ្យ Christmas។ Snowden បានចេញមកនិយាយថា បេសកកម្មរបស់គេ ទាក់ទងនឹងអាមេរិកលួចទិន្នន័យឯកជនរបស់រដ្ឋាភិបាលក្នុងលោក និងរបស់ប្រជាពលរដ្ឋនោះ បានបញ្ចប់ហើយ។ ហើយថារូបគេបានឈ្នះនៅក្នុងបេសកកម្មនេះ។
ចុះផ្សាយនៅថ្ងៃ៖
សម្រង់វីដេអូខ្លីរបស់ Edward Snowden ត្រូវបានចាក់ផ្សាយលើកដំបូងលើកញ្ចប់ទូរទស្សន៍អង់គ្លេសនៅថ្ងៃបុណ្យ Christmas នេះ។ នៅក្នុងវីដេអូនោះ គេឃើញអតីតបុគ្គលិកភ្នាក់ងារសន្តិសុខជាតិរបស់អាមេរិកប្រកាសថា បេសកកម្មរបស់គេបានបញ្ចប់ហើយ។ នេះគឺជារូបភាពជាសាធារណៈលើកដំបូងរបស់យុវជន Snowden ក្រោយពីរូបគេត្រូវបានរដ្ឋាភិបាលរុស្ស៊ី ផ្តល់សិទ្ធិជ្រកកោនកាលពីខែមិថុនាកន្លងទៅ ចំពោះមុខការតាមចាប់ខ្លួនរបស់រដ្ឋាភិបាលអាមេរិក។
ដោយសារតែការបញ្ចេញឯកសារសំងាត់ដែលបង្ហាញថា រដ្ឋាភិបាលអាមេរិកបានលួចយកទិន្នន័យ និងលួចស្តាប់ការសន្ទនារបស់រដ្ឋាភិបាលជាច្រើន និងរបស់ប្រជាពលរដ្ឋខ្លួនផងនោះ ទើបអាមេរិកប្រកាសតាមចាប់ខ្លួនយុវជន Edward Snowden អាយុ៣០ឆ្នាំនេះ។ ការបញ្ចេញឯកសារសំងាត់នេះបានធ្វើអោយលោកបារ៉ាក់ អូបាម៉ាអាម៉ាស់មុខយ៉ាងខ្លាំងចំពោះមុខមេដឹកនាំក្នុងពិភពលោក និង ពិសេសសម្ព័ន្ធមិត្តរបស់ខ្លួនផង។
លោកបារ៉ាក់ អូបាម៉ាវិញបានថ្លែងការពារខ្លួនថា ដោយសារតែការងារចារកិច្ចទាំងនោះ រដ្ឋាភិបាលអាមេរិកបានរារាំងគម្រោងភេរវកម្មជាច្រើន។
នៅក្នុងឯកសារវីដេអូខ្លីដែលត្រូវបានបង្ហាញនៅកញ្ចក់ទូរទស្សន៍អង់គ្លេសនោះ យុវជនSnowden និយាយថា រូបគេមិនចង់ផ្លាស់ប្តូរសង្គមទេ ប៉ុន្តែរូបគេចង់ផ្តល់ឱកាសអោយសង្គម ដើម្បីសម្រេចខ្លួនឯងថា តើត្រូវផ្លាស់ប្តូរ ឬក៏យ៉ាងណា។
នៅក្នុងសម្រង់សំដីរបស់ស្នូដិននោះ គេអាចយល់បានថា ស្នូដិនកំពុងការពារ ភាពជាឯកជនរបស់មនុស្ស។ Edward Snowden បាននិយាយបន្ថែមថា យើងអាចបញ្ចប់ការស៊ើបយកការណ៍នេះ ហើយរម្លឹករដ្ឋាភិបាលអាមេរិកថា ប្រសិនបើគេចង់ដឹងថា ពលរដ្ឋមានអារម្មណ៍បែបណានោះ គេអាចសួរបាន។
នៅក្នុងបទសម្ភាសន៍មួយជាមួយកាសែត Washington Post យុវជនស្នូដិនបានបញ្ជាក់ថា អ្វីដែលគេបានធ្វើកន្លងមក ពោលគឺការលួចបញ្ចេញឯកសារសំងាត់នោះ គឺមិនមែនរូបគេចង់វាយប្រហារស្ថាប័នទីភ្នាក់ងារសន្តិសុខជាតិដែលខ្លួនធ្លាប់ធ្វើការនោះទេ។ ប៉ុន្តែ ផ្ទុយទៅវិញ គឺរូបគេកំពុងតែជួយស្ថាប័ននោះ អោយកាន់តែប្រសើរឡើង ទៅវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ