អេហ្ស៊ីបដាក់ប្រទេសឲ្យស្ថិតក្នុងភាពប្រកាសអាសន្ន បន្ទាប់ពីការបំផ្ទុះគ្រាប់បែកអត្តឃាត
ប្រទេសអេហ្ស៊ីបបានសម្រេចដាក់ប្រទេសឲ្យស្ថិតនៅក្នុងស្ថានភាពប្រកាសអាសន្ន បន្ទាប់ពីមានការបំផ្ទុះគ្រាប់បែកអត្តឃាតនៅក្នុងរថយន្តមួយ នៅថ្ងៃសុក្រម្សិលមិញ សម្លាប់ទាហានអេហ្ស៊ីបអស់៣០នាក់។ ស្ថានភាពប្រកាសអាសន្ននេះ នឹងចាប់ផ្ដើមពីថ្ងៃសៅរ៍នេះតទៅ សម្រាប់រយៈពេល៣ខែ។ ច្រកព្រំដែននៅតំបន់រ៉ាហ្វា ជាប់នឹងតំបន់ហ្គាហ្សាក្នុងទឹកដីប៉ាឡេស្ទីន ក៏នឹងត្រូវបិទលែងឲ្យចេញចូលផងដែរ។
ចុះផ្សាយនៅថ្ងៃ៖
ស្តាប់ - ០១:៤៤
ស្ថានភាពប្រកាសអាសន្នរយៈពេល៣ខែ នឹងត្រូវចាប់ផ្ដើមនៅថ្ងៃសៅរ៍នេះ នៅភាគខាងជើង និងភាគកណ្ដាលនៃតំបន់ស៊ីណៃ នៃប្រទេសអេហ្ស៊ីប។ ការសម្រេចនេះ ត្រូវបានធ្វើឡើងបន្ទាប់ពីមានការបំផ្ទុះគ្រាប់បែកអត្តឃាតនៅក្នុងរថយន្តមួយ នៅថ្ងៃសុក្រទី២៤តុលា នៅភាគខាងជើងតំបន់ស៊ីណៃ សម្លាប់ទាហានអស់៣០នាក់ និងធ្វើឲ្យមនុស្ស២៩នាក់ផ្សេងទៀតរងរបួស។ ក្រៅពីការបំផ្ទុះគ្រាប់បែក ក្រុមខ្មាន់កាំភ្លើងក៏បានបាញ់សម្លាប់មន្ដ្រីម្នាក់ ព្រមទាំងធ្វើឲ្យទាហាន២នាក់ទៀតរងរបួស នៅច្រកត្រួតពិនិត្យក្នុងតំបន់អាល់ អារីស ផងដែរ។
មន្ដ្រីប៉ូលីសអេហ្ស៊ីបបានឲ្យដឹងថា ការបំផ្ទុះគ្រាប់បែកអត្តឃាតនេះ ធ្វើឡើងដោយជនសង្ស័យនៃអង្គការរដ្ឋអ៊ីស្លាមជីហាត ដែលបានបើករថយន្តមួយផ្ទុកទៅដោយគ្រឿងផ្ទុះ ទៅបុកប៉ុស្តិ៍ត្រួតពិនិត្យ ដើម្បីធ្វើអត្តឃាត។
សហរដ្ឋអាមេរិក និងសហភាពអឺរ៉ុប បានថ្កោលទោសខ្លាំងៗ ចំពោះការវាយប្រហារនេះ ។ ក្រសួងការប្រទេសអាមេរិក ថ្លែងថា ខ្លួននឹងនៅតែបន្តគាំទ្រដល់កិច្ចខិតខំប្រឹងប្រែងរបស់អេហ្ស៊ីប ដើម្បីប្រឆាំងនឹងការគម្រាមកំហែងភេរវកម្មនៅក្នុងប្រទេសអេហ្ស៊ីប។ និងថា ការគាំទ្រនេះ គឺជាផ្នែកមួយនៃការប្ដេជ្ញាចិត្តរបស់អាមេរិក ចំពោះភាពជាដៃគូយុទ្ធសាស្ត្ររវាងប្រទេសទាំងពីរ។
ចំណែកអ្នកនាំពាក្យសហភាពអឺរ៉ុប បានសម្ដែងការសោកស្ដាយចំពោះការបាត់បង់អាយុជីវិតរបស់ទាហានអេហ្ស៊ីប ព្រមទាំងចូលរួមរំលែកទុក្ខពីក្រុមគ្រួសារជនរងគ្រោះ។
ភ្លាមៗបន្ទាប់ពីការវាយប្រហារ លោកប្រធានាធិបតីអេហ្ស៊ីប អាប់ឌែល ហ្វាស់តា អាល់ស៊ីសស៊ី បានប្រកាសពីការកាន់ទុក្ខថ្នាក់ជាតិរយៈពេល៣ថ្ងៃ និងបានកោះប្រជុំបន្ទាន់មួយជាមួយនឹងក្រុមប្រឹក្សាការពារជាតិ ដើម្បីពិភាក្សាពីការវាយប្រហារនេះ។ ហើយចុងក្រោយនេះ ច្រកព្រំដែននៅតំបន់រ៉ាហ្វា ជាប់នឹងតំបន់ហ្គាហ្សាក្នុងទឹកដីប៉ាឡេស្ទីន ក៏នឹងត្រូវបិទលែងឲ្យចេញចូលផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ