សន្និសីទម្ចាស់ជំនួយ ដើម្បីស្តារតំបន់ហ្គាហ្សា ធ្វើនៅទីក្រុងគែរ
សន្និសីទនៃបណ្ដាម្ចាស់ជំនួយ ដើម្បីស្តារតំបន់ហ្គាហ្សា បើកនៅថ្ងៃអាទិត្យនេះ ក្នុងរដ្ឋធានីគែររបស់ប្រទេសអេហ្សីប។ ប្រហែល៥០ប្រទេសចូលរួម ព្រមទាំងមានអង្គការអន្តរជាតិជាច្រើនទៀតផង។ សេចក្តីត្រូវការជំនួយគឺធំធេងណាស់ ក្រោយសង្គ្រាមក្នុងរដូវក្តៅ រវាងអ៊ីស្រាអែល និងក្រុមប្រដាប់អាវុធប៉ាឡេស្ទីន ដែលបានបណ្ដាលឱ្យមនុស្សស្លាប់ជាង២០០០នាក់។
ចុះផ្សាយនៅថ្ងៃ៖
ស្តាប់ - ០១:១៣
ផ្ទះ៨០០០០ខ្នងខ្ទេចខ្ទី រោងចក្រដួលរាបដល់ដី ហេដ្ឋារចនាសម្ព័ន្ធនានាខូចខាត... សង្គ្រាមនៅហ្គាហ្សា នារដូវក្តៅនេះ បានបង្កវិនាសន្តរាយ។ អាជ្ញាធរប៉ាឡេស្ទីន បានវាយតម្លៃសេចក្តីត្រូវការជំនួយយ៉ាងតិច៣០០០លានអឺរ៉ូ ឬ៣៨០០លានដុល្លារ ដើម្បីកសាងតំបន់នេះឡើងវិញ។
តាំងពីមុនសង្គ្រាម ស្ថានភាពនៅក្នុងទឹកដីប៉ាឡេស្ទីគឺអាក្រក់ខ្លាំងណាស់ទៅហើយ។ ដោយសារតែការបិទព្រំដែនរបស់អ៊ីស្រាអែល និងអេហ្សីប ប្រជាជនប៉ាឡេស្ទីនរស់ក្នុងភាពក្រីក្រ និងមិនអាចធ្វើដំណើរដោយសេរីបានទេ។ ប្រមុខការទូតប៉ាឡេស្ទីន មានសុទិដ្ឋិនិយម ចំពោះជោគជ័យនៃសន្និសីទទីក្រុងគែរ។ លោកសង្ឃឹមថានឹងប្រមូលបានបរិមាណជំនួយចាំបាច់ សម្រាប់ស្តារតំបន់ហ្កាហ្សាឡើងវិញ។ ប៉ុន្តែបណ្ដាប្រទេសម្ចាស់ជំនួយ មិនទាន់ធានាទាំងស្រុងនៅឡើយទេ។
តាមពិត បន្ទាប់ពីសង្គ្រាម៣ដង ក្នុងរយៈពេល៦ឆ្នាំ ម្ចាស់ជំនួយធុញនឹងការផ្តល់ជំនួយសម្រាប់តែការបំផ្លាញទៅវិញ។ ដូច្នេះ សន្និសីទនេះគួរតែជាឱកាសសម្រាប់អំពាវនាវឱ្យមានដំណោះស្រាយនយោបាយមួយ ក្នុងការបញ្ចប់ជម្លោះរវាងអ៊ីស្រាអែល និងប៉ាឡេស្ទីនដែរ។ ការបើកព្រំដែនតំបន់ហ្គាហ្សា គឺចាំបាច់ ដើម្បីបញ្ចៀសអំពើហិង្សា និងមហន្តរាយជាថ្មី ចំពោះប្រជាជន និងសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ