ប្រធានាធិបតីអេហ្ស៊ីបដកតំណែងមេទ័ពកំពូលៗដែលសល់ពីសម័យលោកមូបារ៉ាក់
កាលពីថ្ងៃអាទិត្យ ម្សិលមិញ លោកមហាមេដ ម៉រស៊ី (Mohammed Morsi) ប្រធានាធិបតីអេហ្ស៊ីប ដែលទើបនឹងជាប់ឆ្នោតនាពេលថ្មីៗនេះ បានប្រកាសដកតំណែងមេទ័ពកំពូលៗ ដែលសល់ពីសម័យលោកមូបារ៉ាក់ ហើយបានប្រកាសលុបចោលសេចក្តីសម្រេចរបស់មេទ័ព ដែលបានកម្រិតអំណាចរបស់ប្រធានាធិបតីស៊ីវិល។ ការដកតំណែងមេទ័ពកំពូលៗនេះ ត្រូវបានគេមើលឃើញថា ជាយុទ្ធសាស្រ្តរបស់លោកម៉រស៊ី ក្នុងការពង្រឹងអំណាចរដ្ឋាភិបាលស៊ីវិល ហើយកាត់បន្ថយអំណាចទ័ព ក្នុងឆាកនយោបាយអេហ្ស៊ីប ដែលស្ថិតក្រោមរបបយោធាអស់រយៈពេលរាប់ទសវត្សរ៍មកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០០
មេទ័ពកំពូលៗរបស់អេហ្ស៊ីប ដែលត្រូវបានដកតំណែង កាលពីម្សិលមិញនេះ គឺរួមមាន រដ្ឋមន្រ្តីក្រសួងការពារជាតិ និងជាអគ្គបញ្ជាការកងទ័ព គឺសេនាប្រមុខហ៊ូសេន តាន់តាវី (Hussein Tantawi) ព្រមទាំងអគ្គបញ្ជាការកងទ័ពទាំង៣ គឺទ័ពជើងគោក ជើងទឹក និងជើងអាកាស។ ការដកតំណែងនេះ ត្រូវបានធ្វើឡើង ក្នុងរូបភាពជាការដាក់ឲ្យចូលនិវត្តន៍។
អ្នកតាមដានសភាពការណ៍អេហ្ស៊ីបធ្លាប់បានរំពឹងទុកជាមុនថា នៅក្រោយពេលដែលអេហ្ស៊ីបមានរដ្ឋាភិបាលស៊ីវិល ដែលកើតចេញពីការបោះឆ្នោត គឺប្រាកដនឹងមានការប្រជែងអំណាចគ្នារវាងរដ្ឋាភិបាលស៊ីវិល និងស្ថាប័នកងទ័ព ដែលធ្លាប់កាន់អំណាចនៅអេហ្ស៊ីបអស់រយៈពេលរាប់ទសវត្សរ៍មកហើយ។ ក៏ប៉ុន្តែ មិនមានអ្នកណាម្នាក់នឹកស្មានដល់ថា លោកមហាមេដ ម៉រស៊ី នឹងធ្វើការរុះរើស្ថាប័នកងទ័ពស្ទើរតែទាំងស្រុង ហើយធ្វើភ្លាមៗបែបនេះឡើយ។
អ្វីដែលធ្វើឲ្យគេកាន់តែភ្ញាក់ផ្អើលខ្លាំងថែមទៀត គឺការដកតំណែងសេនាប្រមុខតាន់តាវី។ សេនាប្រមុខហ៊ូសេន តាន់តាវី គឺជាមេទ័ពដ៏មានឥទ្ធិពលបំផុត នៅអេហ្ស៊ីប។ លោកធ្លាប់កាន់តំណែងជារដ្ឋមន្រ្តីក្រសួងការពារជាតិ អស់រយៈពេលជាង ២០ឆ្នាំ នៅសម័យលោកមូបារ៉ាក់ នៅកាន់អំណាច។ បន្ទាប់ពីលោកមូបារ៉ាក់ត្រូវបាតុករទម្លាក់ពីអំណាច សេនាប្រមុខតាន់តាវី គឺជាអ្នកកាន់អំណាចបន្តជាបណ្តោះអាសន្ន ក្នុងឋានៈជាប្រធានឧត្តមក្រុមប្រឹក្សាកងទ័ពផង (ពោលគឺ ជាប្រមុខរដ្ឋស្តីទី) ជារដ្ឋមន្រ្តីក្រសួងការពារជាតិផង និងជាអគ្គបញ្ជាការកងទ័ពផង។
អ្នកវិភាគមួយចំនួនយល់ថា ការដែលលោកមហាមេដ ម៉រស៊ី សម្រេចដកតំណែងកងទ័ពកំពូលៗភ្លាមៗ នៅពេលនេះ គឺប្រហែលជាលោកចង់ឆ្លៀតក្នុងឱកាសមានបញ្ហាអសន្តិសុខ នៅតំបន់ស៊ីណៃ ដែលប្រជាជនអេហ្ស៊ីបភាគច្រើនទម្លាក់កំហុសទៅលើកងទ័ព។ ក៏ប៉ុន្តែ មានអ្នកខ្លះនៅតែចោទជាសំណួរថា តើការដកតំណែងមេទ័ពនេះ គឺជាចំណុចចាប់ផ្តើម នៃការប្រឈមមុខដាក់គ្នារវាងប្រធានាធិបតី និងស្ថាប័នកងទ័ព ឬក៏មានការចរចា និងការព្រមព្រៀងគ្នាណាមួយជាមុន រវាងប្រធានាធិបតី និងមេទ័ព?
សមាជិកឧត្តមក្រុមប្រឹក្សាកងទ័ពអេហ្ស៊ីបបានបង្ហើបប្រាប់ទីភ្នាក់ងារសារព័ត៌មានរ៉យទ័រថា លោកមហាមេដ ម៉រស៊ី បានជួបជជែកជាមួយសេនាប្រមុខតាន់តាវីជាមុន មុននឹងសម្រេចដាក់ឲ្យលោកចូលនិវត្តន៍។ ក៏ប៉ុន្តែ គេនៅតែយល់ថា ការចូលនិវត្តន៍របស់មេទ័ពទាំងនេះ ត្រូវបានធ្វើឡើងដោយបង្ខំ ដែលមានន័យស្មើនឹងការដកតំណែង ពីព្រោះថា ការដាក់ឲ្យចូលនិវត្តន៍នេះ គឺសម្រេចដោយក្រឹត្យរបស់ប្រធានាធិបតី ហើយមិនមែនខាងមេទ័ពជាអ្នកសុំលាលែង ដើម្បីចូលនិវត្តន៍ដោយខ្លួនឯង។
ទោះជាយ៉ាងណា គេឃើញថា ក្រោយពីត្រូវបានដាក់ឲ្យចូលនិវត្តន៍ សេនាប្រមុខតាន់តាវី ត្រូវបានតែងតាំងឲ្យធ្វើជាទីប្រឹក្សារបស់ប្រធានាធិបតី។ ម្យ៉ាងទៀត អ្នកដែលឡើងមកជំនួសតំណែងមេទ័ព ដែលត្រូវចូលនិវត្តន៍ ក៏មានឧត្តមសេនីយ៍ ដែលស្និទ្ធនឹងសេនាប្រមុខតាន់តាវីខ្លះដែរ។
កាលពីម្សិលមិញនេះ ក្រៅពីបានដកតំណែងមេទ័ពកំពូលៗ លោកមហាមេដ ម៉រស៊ី បានចេញសេចក្តីសម្រេចមួយទៀត លុបចោលរដ្ឋធម្មនុញ្ញបណ្តោះអាសន្ន ដែលតាក់តែងឡើងដោយមេទ័ព ហើយដែលកម្រិតអំណាចប្រធានាធិបតីស៊ីវិល។ ការលុបចោលរដ្ឋធម្មនុញ្ញបណ្តោះអាសន្ននេះ មានន័យថា លោកមហាមេដ ម៉រស៊ី នឹងទទួលបានអំណាចពេញលេញជាប្រមុខរដ្ឋ និងជាអគ្គបញ្ជាការកងទ័ព ដែលអាចគ្រប់គ្រងទាំងអំណាចស៊ីវិល និងអំណាចទ័ព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ