សវនាការកាត់ក្តីអតីតប្រធានាធិបតីអេហ្ស៊ីប ពិបាកស្តាប់គ្នាយល់
ចុះផ្សាយនៅថ្ងៃ៖
ស្តាប់ - ០៤:៣៧
នៅថ្ងៃចន្ទម្សិលមិញនេះ នៅទីក្រុងគែរ ប្រទេសអេហ្ស៊ីប តុលាការបានបើកសវនាការកាត់ក្តីអតីតប្រធានាធិបតី ម៉ូហាមេដ មរស៊ី និងអ្នកទទួលខុសត្រូវគណបក្សភាតរអ៊ីស្លាម ចំនួន១៤រូប ពីបទញុះញង់អោយមានការសម្លាប់មនុស្ស។ ប៉ុន្តែ សវនាការប្រព្រឹត្តទៅមិនដល់មួយម៉ោងផង ស្រាប់តែចៅក្រមអេហ្ស៊ីបបានប្រកាសលើកពេលសវនាការ ទៅថ្ងៃ៨មករា ឆ្នាំ ២០១៤វិញ។ មូលហេតុគឺដោយសារតែជនជាប់ចោទទាំងអស់នោះ បង្កការរាំងស្ទះដល់ដំណើរការនៃសវនាការ។
នៅថ្ងៃចន្ទម្សិលមិញនេះ នៅប្រទេសអេហ្ស៊ីប សវនាការកាត់ក្តីអតីតប្រធានាធិបតី ម៉ូហាមេដ មរស៊ី និងអ្នកទទួលខុសត្រូវគណបក្សភាតរអ៊ីស្លាម១៤រូប បានប្រព្រឹត្តទៅមិនដល់មួយម៉ោងនោះទេ។ ចៅក្រមបានប្រកាសលើកពេលទៅធ្វើនៅថ្ងៃ៨មករា ឆ្នាំ២០១៤វិញ ដោយសារតែជនជាប់ចោទបានបង្កការរាំងស្ទះដល់ដំណើរការសវនាការ។
គួររំលឹកថា អតីប្រធានាធិបតីអេហ្ស៊ីបត្រូវបានយោធាទំលាក់ចេញពីតំណែងកាលពីដើមខែកក្កដា។ លោកនិងបក្សពួកលោកទាំងនោះ ជាប់ចោទពីបទញុះញង់អោយមានអំពើឃាតកម្ម ជុំវិញបាតុកម្ម ថ្ងៃ៥ធ្នូ ឆ្នាំ២០១២ នៅមុខវិមានប្រធានាធិបតីអេហ្ស៊ីប។ កាលណោះ ការប៉ះទង្គិចគ្នារវាងសកម្មជនបក្សភាតរអ៊ីស្លាមរបស់លោកមរស៊ី និងបាតុករដែលទាមទារអោយលោកមរស៊ីចុះពីអំណាច បានធ្វើអោយស្លាប់មនុស្សជាង១០នាក់។ លោកមរស៊ីនិងអ្នកទទួលខុសត្រូវទាំង១៤រូបនៃបក្សភាតរអ៊ីស្លាមនេះ អាចទទួលទោសប្រហារជីវិត រឺក៏ជាប់ពន្ធនាគារមួយជីវិត។
នៅថ្ងៃចន្ទម្សិលមិញ ពេលបើកសវនាការដំបូង ក្នុងសំលៀកបំពាក់ពណ៌ខៀវ និងប្រកបដោយលក្ខណៈហំហួននោះ អតីតប្រធានាធិបតីម៉ូហាមេដ មរស៊ី បានស្រែកប្រកាសដាក់ចៅក្រមថា លោកគឺជាប្រធានាធិបតីសាធារណរដ្ឋអេហ្ស៊ីបដែលស្របច្បាប់តែមួយគត់ ហើយតុលាការដែលកាត់ក្តីរូបលោក គឺជាតុលាការខុសច្បាប់ទាំងស្រុង។ ចៅក្រមប្រហែលជាក្តៅចិត្តក៏បានសំរេចលើកពេលនេះទៅវិញ។ បើយោងតាមទូរទស្សន៍សាធារណៈមួយ ចៅក្រមលើកពេលកាត់ក្តីព្រោះតែជនជាប់ចោទទាំងនោះនាំគ្នាច្រៀង រំខានដល់ដំណើរការសវនាការ។ តែបើយោងតាមអ្នកទទួលខុសត្រូវសន្តិសុខនៅតុលាការវិញ ការលើកពេលនេះ គឺដោយសារតែលោកមរស៊ីមិនព្រមស្លៀកសំលៀកបំពាក់ជាអ្នកទោស។
ក្នុងហេតុផលណាក៏ដោយចុះ យើងឃើញថា ទាំងចៅក្រមកាត់ទោស ទាំងជនជាប់ចោទសុទ្ធតែចចេសរឹងរូសដាក់គ្នាទោវិញទៅមក។ ប្រសិនបើយើងមើលទៅខាងភាគីជនជាប់ចោទវិញ យើងឃើញថា លោកមរស៊ីពិបាកនឹងទទួលស្គាល់ណាស់ថាលោកលែងមានអំណាចនៅក្នុងដៃដូចជាពេលមុនទៀត។ លោកភ្លេចគិតថាលោកគឺជាអ្នកទោសដែលជាប់ចោទក្នុងបទឧក្រិដ្ឋ។ ដោយសារតែលោកជាប្រធានាធិបតីអេហ្ស៊ីបដែលប្រជាជនធ្លាប់បោះឆ្នោតគាំទ្រក្នុងលក្ខណៈប្រជាធិបតេយ្យ លោកមរស៊ីនៅតែមានអារម្មណ៍ដិតជាប់នឹងភាពជោគជ័យក្នុងអតីតកាលជានិច្ច។ ដូច្នេះ ទោះជាចៅក្រមសំណូមពរអ្វីក៏ដោយចុះ គឹលោកមរស៊ី និងបក្សពួកមិនខ្ចីស្តាប់ ហើយនៅតែបដិសេធមិនទទួលស្គាល់តុលាការនេះជានិច្ច។ គឺប្រៀបបាននឹងការដែលយើងដឹកសត្វគោ ក្របី អោយទៅមើលទូរទស្សន៍ដូច្នោះដែរ គោនិងក្របីពិបាកនឹងយល់សាច់រឿងណាស់។ គ្រួសារលោកមរស៊ីធ្លាប់ប្រាប់ថា លោមមរស៊ីមិនងាយដកខ្លួនថយ ហើយក៏មិនងាយចរចា ស្រុះស្រួលជាមួយរដ្ឋាភិបាលស្តីទីបច្ចុប្បន្ននោះទេ។ ក្នុងក្រសែភ្នែកលោកមរស៊ី និងបក្សពួកគណបក្សភាតរអ៊ីស្លាមរបស់លោក រដ្ឋាភិបាលស្តីទីអេហ្ស៊ីបបច្ចុប្បន្ននេះ គឺកើតចេញពីរដ្ឋប្រហារយោធាសុទ្ធសាធ គឺថាជារដ្ឋប្រហារទំលាក់រដ្ឋាភិបាលដែលកើតចេញពីការបោះឆ្នោតប្រជាធិបតេយ្យរបស់លោកមរស៊ី។ សំរាប់លោកមរស៊ី តុលាការកាត់ក្តីរូបលោក ដែលស្ថិតក្រោមការគ្រប់គ្រងរបស់រដ្ឋាភិបាលបែបនេះ គឺជាតុលាការមិនស្របច្បាប់។
បើងាកទៅមើលចៅក្រមវិញម្តង បើយើងយកហេតុផលថា មកពីលោកមរស៊ីមិនព្រមស្លៀកសំលៀកបំពាក់ជាអ្នកទោស រឺក៏ថា មកពីជនជាប់ចោទច្រៀងរំខានការកាត់ក្តី ទើបចៅក្រមលើកពេលកាត់ក្តីនេះទៅឆ្នាំក្រោយវិញនោះ ហេតុផលទាំងអស់នេះហាក់ដូចជាបញ្ជាក់ថា ចៅក្រមអេហ្ស៊ីបទាំងនោះមិនចេះអត់ធ្មត់នៅចំពោះមុខ ជនជាប់ចោទទាំងនេះទាល់តែសោះ។ បើចៅក្រមទាំងនេះចេះអត់ធ្មត់ ពួកគេគួរតែបន្តដំណើរការសវនាការ ដោយព្យាយាមធ្វើអោយជនរងគ្រោះនោះស្ងប់ចិត្តបន្តិចទៅវិញ ជាជាងលើកពេលកាត់ក្តី។ ព្រោះថា សវនាការថ្ងៃចន្ទ ទី៤វិច្ឆិកានេះ អ្នកណាៗក៏គេទន្ទឹងចាំមើលដែរ។ គឺជាសវនាការប្រវត្តិសាស្ត្រសំរាប់អេហ្ស៊ីប ពិសេសជាសវនាការដែលបញ្ជាក់ពីសមត្ថភាពរដ្ឋាភិបាលស្តីទីអេហ្ស៊ីប នៅចំពោះមុខការគោពសិទ្ធិមនុស្ស ក្នុងប្រទេសនេះឯង។
សំណួរនៅពេលនេះគឺថា បើចៅក្រមមិនចេះអត់ធ្មត់បែបនេះ តើសវនាការថ្ងៃ៨មករាខាងមុខនេះ អាចនឹងលើកពេលបន្ថែមទៀតទេ ? តើសវនាការនេះគ្រាន់តែជាឆាកល្ខោនកាត់ទោសបង្គ្រប់កិច្ចរឺក៏យ៉ាងណា ?
អាចមានយុត្តិធម៌ទេ ព្រោះថា គ្រាន់តែថ្ងៃបើកសវនាការម្សិលមិញនេះមកដល់ រដ្ឋាភិបាលស្តីទីបានដាក់ពង្រាយកងទ័ពរាប់ម៉ឺននាក់ នៅទីក្រុងគែរ ត្រៀមទប់ស្កាត់បាតុករគាំទ្រលោកមរស៊ី។ ដោយឡែក រដ្ឋាភិបាលស្តីទីកំពុងសិក្សាលើគំរោងច្បាប់ស្តីពីការធ្វើបាតុកម្ម ដែលជាច្បាប់រឹតបន្តឹងសិទ្ធិបាតុករ។ តើយុត្តិធម៌នៅត្រង់ណា បើរដ្ឋាភិបាលនៅតែព្យាយាមបំបិទសេរីភាពបាតុករនោះ ? កន្លងមក កងទ័ពអេហ្ស៊ីបធ្លាប់បានប្រើហិង្សាបង្ក្រាបបាតុករគាំទ្រលោកមរស៊ី ធ្លាប់បានសម្លាប់បាតុកររាប់រយនាក់ ព្រមទាំងចាប់ខ្លួនសមាជិកបក្សភាតរអ៊ីស្លាម២ពាន់នាក់។ អេហ្ស៊ីបកំពុងតាក់តែងច្បាប់ រៀបចំអោយមានការបោះឆ្នោតប្រជាមតិលើរដ្ឋធម្មនុញ្ញ ត្រៀមទៅដល់ការបោះឆ្នោតសភា និងការបោះឆ្នោតប្រធានាធិបតី នៅមុនពាក់កណ្តាលឆ្នាំ២០១៤។ តើដំណើរការប្រជាធិបតេយ្យអស់នេះ អាចនឹងកើតមានម្តេចបាន ប្រសិនបើរដ្ឋាភិបាលស្តីទីបច្ចុប្បន្ននៅតែបន្តបញ្ចេញសាច់ដុំដាក់បាតុករ ស្ទើរតែរាល់ពេលហើយនោះ?
ដូច្នេះ សវនាការកាត់ក្តីលោកមរស៊ី ក្រោមការគ្រប់គ្រងរបស់រដ្ឋាភិបាលយោធាអេហ្ស៊ីប ប្រហែលជានៅតែបន្តប្រព្រឹត្តទៅដោយរកាំរកូស និងក្នុងស្ថានភាពតានតឹងចៀសមិនរួចដដែល ព្រោះថា ទាំងភាគីកាន់អំណាច ទាំងជនជាប់ចោទដែលលែងមានអំណាចក្នុងដៃ សុទ្ធតែរឹងទទឹង ម្ខាងៗនៅតែល្មោភអំណាចរៀងខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ