សហភាពអឺរ៉ុបសម្រេចដាក់ទណ្ឌកម្មលើលោកបាក់បូនិងមនុស្សជំនិត
នៅថ្ងៃចន្ទ ២០ ធ្នូ ២០១០នេះ សហភាពអឺរ៉ុបបានសម្រេចបញ្ចូលឈ្មោះលោកបាក់បូ ព្រមទាំងមនុស្សជំនិត ១៨នាក់ផ្សេងទៀត ទៅក្នុងបញ្ជីខ្មៅ ដែលត្រូវហាមឃាត់មិនឲ្យធ្វើដំណើរចូលក្នុងទឹកដីសហភាពអឺរ៉ុប។ ក្នុងពេលជាមួយគ្នានេះ ក្រុមប្រឹក្សាសន្តិសុខអ.ស.ប.កំពុងប្រជុំគ្នា ដើម្បីសម្រេចបន្ត ឬមិនបន្តអាណត្តិកងរក្សាសន្តិភាព នៅក្នុងប្រទេសកូតឌីវ័រ។
ចុះផ្សាយនៅថ្ងៃ៖
បទវិភាគរបស់ សេង ឌីណា
ក្រៅពីលោកឡូរ៉ង់ បាក់បូ (Laurent Gbagbo) នៅមានមនុស្សជំនិតរបស់គាត់ចំនួន ១៨នាក់ផ្សេងទៀត ដែលត្រូវបានសហភាពអឺរ៉ុបដាក់ចូលក្នុងបញ្ជីខ្មៅ។ ក្នុងចំណោមនោះ ក៏មានប្រធានក្រុមប្រឹក្សាធម្មនុញ្ញផងដែរ ដែលជាអ្នកបានប្រកាសឲ្យលោកបាក់បូឈ្នះឆ្នោត ដោយផ្ទុយនឹងលទ្ធផលប្រកាសដោយគណៈកម្មាធិការបោះឆ្នោត។
កាលពីសប្តាហ៍មុន លោកនីកូឡា សាកូហ្ស៊ី (Nicolas Sarkozy) បានប្រកាសទុកពេលត្រឹមយប់ថ្ងៃអាទិត្យ ឲ្យលោកបាក់បូចុះចេញពីតំណែង ហើយប្រគល់អំណាចឲ្យប្រធានាធិបតីជាប់ឆ្នោតថ្មី គឺលោកអាឡាសាន វាត់តារ៉ា (Alassane Ouattara) ប្រសិនបើមិនចង់ជាប់ឈ្មោះក្នុងបញ្ជីខ្មៅសហភាពអឺរ៉ុប។ ក៏ប៉ុន្តែ លោកបាក់បូ មិនបានរវីរវល់នឹងឱសានវាទនេះទេ។
ទណ្ឌកម្មដែលសម្រេចដោយសហភាពអឺរ៉ុបនេះ ចែកចេញជាពីរផ្នែក។ ទី១ អ្នកដែលមានឈ្មោះក្នុងបញ្ជីខ្មៅនឹងត្រូវហាមឃាត់មិនឲ្យធ្វើ ដំណើរទៅសហភាពអឺរ៉ុប។ ទី២ ទ្រព្យសម្បត្តិរបស់ពួកគេ ដែលមាននៅបរទេសនឹងត្រូវផ្អាប់ទុក។ ក៏ប៉ុន្តែ នៅថ្ងៃចន្ទនេះ សហភាពអឺរ៉ុបបានសម្រេចដាក់តែទណ្ឌកម្មផ្នែកទី១សិន ដោយទុកផ្នែកទី២ ដែលមាននីតិវិធីស្មុគស្មាញ ទៅសម្រេចនៅពេលក្រោយវិញ។
រដ្ឋាភិបាលអាមេរិកបានប្រកាសថា ខ្លួនក៏កំពុងពិចារណាក្នុងការដាក់ទណ្ឌកម្មលើលោកបាក់បូដែរ។
នៅថ្ងៃចន្ទនេះ ក្រុមប្រឹក្សាសន្តិសុខអ.ស.ប. កំពុងប្រជុំ ដើម្បីសម្រេចថា តើត្រូវបន្តអាណត្តិកងកម្លាំងរក្សាសន្តិភាព នៅក្នុងប្រទេសកូតឌីវ័រទៀតឬក៏យ៉ាងណា។ គួរបញ្ជាក់ថា អាណត្តិរបស់កងកម្លាំងមួកខៀវ នៅកូតឌីវ័រ នឹងត្រូវផុត នៅថ្ងៃទី៣១ ធ្នូ ២០១០ខាងមុខនេះហើយ។
កាលពីថ្ងៃអាទិត្យ ម្សិលមិញ លោកបាក់បូ បានប្រកាសបណ្តេញកងកម្លាំងមួកខៀវ និងទាហានបារាំងឲ្យចេញពីកូតឌីវ័រជាបន្ទាន់។ បើមិនដូច្នោះទេ កងទ័ពទាំងនេះនឹងត្រូវចាត់ទុកជាកងទ័ពបរទេស ឈរជើងដោយខុសច្បាប់ នៅកូតឌីវ័រ។ ក៏ប៉ុន្តែ អ.ស.ប. និងរដ្ឋាភិបាលបារាំងបានប្រកាសបដិសេធភ្លាមៗ មិនដកកងទ័ពចេញពីកូតឌីវ័រនោះទេ ហើយថែមទាំងបានព្រមានទៀតផងថា អ្នកដែលហ៊ានប៉ះពាល់ដល់កងទ័ពមួកខៀវ អ្នកនោះនឹងត្រូវទទួលខុសត្រូវ។ រដ្ឋមន្រ្តីក្រសួងការបរទេសបារាំងក៏បានព្រមានផងដែរថា កងទ័ពបារាំងមានសិទ្ធិប្រើកម្លាំងតបតវិញ ប្រសិនបើទទួលរងការវាយប្រហារណាមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ