ធ្លាក់យន្តហោះរុស្ស៊ី៖លោកអូបាម៉ា និងលោកកាមេរ៉ូនលើកឡើងពីគ្រាប់បែកក្នុងយន្តហោះ
៥ថ្ងៃក្រោយឧប្បត្តិហេតុធ្លាក់យន្តហោះរុស្ស៊ីមួយគ្រឿងប្រភេទ Airbus A៣២១ នៅតំបន់ស៊ីណៃ ក្នុងប្រទេសអេហ្ស៊ីបដែលបានផ្តាច់ជីវិតមនុស្សទំាង ២២៤នាក់មក គេនៅមិនដឹងជាផ្លូវការពីមូលហេតុនៃការផ្ទុះធ្លាក់យន្តហោះនោះនៅឡើយទេ។ ទន្ទឹមគ្នានេះ លោកប្រធានាធិបតីអាមេរិកអូបាម៉ា និងលោកនាយករដ្ឋមន្រ្តីអង់គ្លេសកាមេរ៉ូនបានបញ្ជាក់រួមគ្នាជាចំហពីវត្តមានគ្រាប់បែកជាយថាហេតុនៅក្នុងយន្តហោះនោះ។ តែរដ្ឋអំណាចអេហ្ស៊ីប និងរុស្ស៊ីនៅបន្តបដិសេធដោយបានចាត់ទុកការលើកឡើងនោះថា ជាការក្រឡុកព័ត៌មាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
រហូតមកដល់ថ្ងៃនេះ ព័ត៌មានស្រពិចស្រពិល និងពាក្យចចាមអារ៉ាមជុំវិញគ្រោះថ្នាក់ធ្លាក់យន្តហោះរុស្ស៊ីមួយគ្រឿងកាលពី ៥ថ្ងៃមុនកំពុងកើតមានយ៉ាងផុសផុល។ តែសម្មតិកម្មដែលកំពុងលេចឮខ្លំាងជាងគេនារយៈពេលចុងក្រោយនេះ គឺវត្តមានគ្រាប់បែកនៅក្នុងយន្តហោះនោះ។ ខណៈនេះ គឺលោកប្រធានាធិបតីអាមេរិកអូបាម៉ា និងលោកនាយករដ្ឋមន្រ្តីអង់គ្លេសដាវីដ កាមេរ៉ូនផ្ទាល់ខ្លួនដែលបានលើកឡើងជាចំហចំពោះសម្មតិកម្មខាងលើ។ « ខ្ញុំយល់ឃើញថា អាចមានគ្រាប់បែកនៅក្នុងយន្តហោះនោះ ហើយយើងកំពុងផ្តោតការយកចិត្តទុកដាក់យ៉ាងខ្លំាងចំពោះសម្មតិកម្មមួយនេះ » នេះជាការថ្លែងរបស់លោកអូបាម៉ានៅតាមវិទ្យុអាមេរិកំាងមួយនាថ្ងៃព្រហស្បតិ៍ ទី៥ វិច្ឆិកា។ តែក្នុងពេលជាមួយគ្នានេះ លោកអូបាម៉ាក៏បានគូសបញ្ជាក់ថា នៅមិនទាន់មានភស្តុតាងអ្វីដែលអាចបញ្ជាក់ជាផ្លូវការនៅឡើយទេក្នុងពេលនេះ។
ចំណែកនៅក្នុងទីក្រុងឡុងដ៏ ប្រទេសអង់គ្លសេដែលលោកប្រធានាធិបតីអេហ្ស៊ីបអាល់ស៊ីស៊ីបានបញ្ចប់ទស្សនកិច្ចថ្ងៃនេះ លោកនាយករដ្ឋមន្រ្តីអង់គ្លេសដាវីដ កាមេរ៉ូនក៏បានលើកឡើងពីព័ត៌មានដែលបញ្ជាក់ថា អាចមានគ្រាប់បែកនៅក្នុងយន្តហោះនោះ ហើយវាជាគ្រាប់បែករបស់ពួកភេរវជន។ ដោយឡែក កាសែតអង់គ្លេស The Times បានអះអាងនៅថ្ងៃនេះថា កិច្ចសន្ទនាតាមសារអេឡិចត្រូនិចដែលទីភ្នាក់ងារស៊ើបការណ៍សម្ងាត់អាមេរិកំាង និងអង់គ្លេសចាប់បាននំាឲ្យគេយល់ថា មានគ្រាប់បែកមួយគ្រាប់ត្រូវបានដាក់បង្កប់នៅក្នុងយន្តហោះនោះ។ The Times បានសរសេរបន្តថា ខ្លឹមសារនៃកិច្ចសន្ទនាតាមសារអេឡិចត្រូនិចត្រូវបានក្រុមអ្នកវិភាគយល់បានថា អ្នកដែលបានដាក់បង្កប់គ្រាប់បែកនៅក្នុងយន្តហោះ គឺជាអ្នកដំណើរម្នាក់ ឬមួយក៏ជាអ្នកបម្រើម្នាក់នៅក្នុងយន្តហោះនោះ។
យ៉ាងណាក៏ដោយ ការលើកឡើងពីវត្តមានគ្រាប់បែកនៅក្នុងយន្តហោះត្រូវបានរដ្ឋអំណាចអេហ្ស៊ីប និងរុស្ស៊ីបដិសេធដោយអះអាងថា គេត្រូវរង់ចំាលទ្ធផលនៃការស៊ើបអង្កេតរបស់ក្រុមអ្នកជំនាញដែលកំពុងសិក្សា វិភាគលើប្រអប់ខ្មៅទំាងពីររបស់យន្តហោះ។ នៅថ្ងៃព្រហស្បតិ៍ ទី៥ វិច្ឆិកា ទីក្រុងមូស្គូថែមទំាងបានចាត់ទុកសម្មតិកម្មលើកឡើងកន្លងមកថា ជាការក្រឡុកព័ត៌មាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ