លោកប្រមុខការទូតរុស្ស៊ីបានទទួលជួបចរចាជាមួយសមភាគីអ៊ីរ៉ង់ នៅក្រុងម៉ូស្គូ
ក្រសួងការបរទេសរុស្ស៊ី ក្នុងសេចក្តីថ្លែងការណ៍ ឧទ្ទិសដល់ជំនួបថ្ងៃ១៧ សីហានេះ ហៅអ៊ីរ៉ង់ថាជា ដៃគូដ៏ជំនិតរបស់ម៉ូស្គូ នៅតំបន់ដើមបូព៌ា និងបានប្រកាសឲ្យដឹង អំពីប្រធានបទ នៃការពិភាក្សា រវាងរដ្ឋមន្ត្រីការបរទេសប្រទេសទាំងពីរ គឺ ជុំវិញកម្មវិធីនុយក្លេអ៊ែរអ៊ីរ៉ង់ និង ការ អភិវឌ្ឍន៍តទៅទៀត ទំនាក់ទំនងទ្វេភាគី ក្នុងផ្ទៃនៃកិច្ចព្រមព្រៀង ពាក់ព័ន្ធនឹងកម្មវិធីនេះ ដែលមានសម្រេចបាន នៅក្រុងវីយេន មួយខែមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ក្រសួងការបរទេសរុស្ស៊ី កត់សម្គាល់ថា កិច្ចចរចានៅម៉ូស្គូ ថ្ងៃ១៧ សីហានេះ ធ្វើឡើង គឺក្នុងបរិបទនៃការពិភាក្សាដើម្បីផ្តល់សច្ចាប័ន ឲ្យបានរួចជាស្រេចបាច់ ទៅទល់កណ្តាល ខែកញ្ញាខាងមុខ ក្នុងសមាជសភាអាមេរិក ទៅលើឯកសារអ៊ីរ៉ង់នេះដែលចុះបានដូចចិត្ត ដោយ មានការជួយជ្រោមជ្រែងពីខាង ពួកអ្នកការទូតអាមេរិកាំងផងដែរ។ ប្រព័ន្ធផ្សព្វផ្សាយនៅរុស្ស៊ី ថែមទាំងបានលើកយកមកនិយាយ ការព្រមានធ្វើដោយ លោកប្រមុខការទូតស.រ.អា. John Kerry ទៅពួកអ្នកតែងច្បាប់អាមេរិកថា បើគេច្រានចោល កិច្ចព្រមព្រៀងអ៊ីរ៉ង់នោះ គឺអាចអូស ទាញអត្រាប្រាក់ដុល្លារអាមេរិក ឲ្យចុះថ្លៃតែម្តង។
ថ្លែងក្នុងសន្និសីទកាសែត បន្ទាប់ពីកិច្ចចរចានេះ ទាំងលោក រដ្ឋមន្ត្រីការបរទេសរុស្ស៊ី Serguei Lavrov ទាំងលោករដ្ឋមន្ត្រីការបរទេសអ៊ីរ៉ង់ Javad Zarif បានសំដែងដូចគ្នានូវសេចក្តីសង្ឃឹម ថា កិច្ចព្រមព្រៀងដែលមានចុះនៅក្រុងវីយេន ថ្ងៃ១៤កក្កដា គង់នឹងចូលជាធរមាន ពុំខាន។ លោកប្រមុខការទូតរុស្ស៊ី បានឲ្យដឹងថា នៅលើផ្លូវនេះ គាត់បានពិភាក្សាអំពីការពង្រីក និង ស៊ីជម្រៅ សហប្រតិបត្តិការពាណិជ្ជកម្ម សេដ្ឋកិច្ច ជាមួយអ៊ីរ៉ង់ សម្រាប់ឆ្នាំ២០១៥-២០១៨។
ទាក់ទងនឹងតំបន់ដើមបូព៌ា លោក Lavrov បានថ្លែងថា រុស្ស៊ីនិងអ៊ីរ៉ង់ ប្រកាន់គោលជំហរដូចគ្នា ចំពោះដំណោះស្រាយស្ថានការណ៍វិបត្តិនៅតាមប្រទេសតំបន់នេះ បែបយ៉ាង នៅ យេម៉ែន នៅលីប៊ី នៅអ៊ីរ៉ាក់ អាហ្វហ្កានីស្ថាន គឺត្រូវដោះស្រាយ ដោយគ្មាន ការលូកដៃជ្រៀតជ្រែកពីក្រៅ និងមិនបាច់មានថ្នាំផ្សំអ្វីណាជាមុន សម្រាប់ដំណោះស្រាយនេះឡើយ។ អំពីដំណោះស្រាយស្ថានការណ៍នៅស៊ីរី ប្រមុខការទូតរុស្ស៊ី គូសបញ្ជាក់ជាថ្មីពី គោលជំហរ ឥតប្រែប្រួលរបស់ម៉ូស្គូ ដែលច្រានចោលដាច់អហង្ការ សម្តីអារកាត់ជាមុន ដែលថា ក្នុងអនាគត ប្រទេសស៊ីរី គឺគ្មានកន្លែងទេ សម្រាប់លោកប្រធានាធិបតី Bashar all Assad។
គាត់ថាបញ្ហានេះ ជាបុព្វសិទ្ធិសុទ្ធសាធរបស់ ប្រជាជនស៊ីរីទាំងមូល មិនមែនរបស់ភាគីប្រឆាំងណាមួយឡើយ។ លោករដ្ឋមន្ត្រីបរទេសអ៊ីរ៉ង់ Javad Zarif ពីចំណែកខ្លួន បានសំដែងអំណរគុណ ទៅកាន់ សមភាគីរុស្ស៊ី ជាមិត្តដ៏ជំនិតរបស់អ៊ីរ៉ង់ គឺ លោក Lavrov ដែលបានរួមវិភាគទានកំណត់ ក្នុងការ ចុះ បានជាកិច្ចព្រមព្រៀង ជុំវិញកម្មវិធីនុយក្លេអ៊ែរអ៊ីរ៉ង ដែលនឹងនាំទៅកាន់ការលុបទៅវិញ ទណ្ឌកម្មអន្តរជាតិប្រឆាំងអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ