ភេរវកម្មនៅអ៊ីស្តង់ប៊ូល ជម្រុញតួកគី និងរុស្ស៊ីឲ្យខិតជិតគ្នា?
ចុះផ្សាយនៅថ្ងៃ៖
ស្តាប់ - ០៧:១១
២ថ្ងៃ បន្ទាប់ពីភេរវកម្មអត្តឃាត ដ៏កាចសាហាវ សម្លាប់មនុស្ស៤៣នាក់ ដែលបានកើតឡើងនៅទីក្រុង អ៊ីស្តង់ប៊ូល ប្រទេសតួកគី ការស៊ើបអង្កេត បានផ្តល់ពន្លឺខ្លះៗហើយ។ មនុស្សជាង២០នាក់ត្រូវបានចាប់ខ្លួន ជាបន្តបន្ទាប់ ដែលភាគច្រើនជាបណ្តាញបក្សពួករបស់ក្រុមជីហាដអ៊ីស្លាម មកពីតំបន់ឆេឆិន របស់រុស្ស៊ី។ ស្ថានការណ៍ ហាក់បានជម្រុញឲ្យរដ្ឋាភិបាលតួកគី និងរុស្ស៊ី ខិតមកចាប់ដៃគ្នាឡើងវិញ ព្រោះពេលនេះ តួកគី និងរុស្ស៊ី មានសត្រូវរួមតែមួយ គឺពួកជីហាដអ៊ីស្លាមតំបន់ឆេឆិននី ដែលជាបក្សពួករបស់ក្រុមជីហាដអង្គការរដ្ឋអ៊ីស្លាមដែរ។
ជនដៃដល់ ជាជីហាដមកពីតំបន់កូកាស រុស្ស៊ី៖
កាលពីល្ងាចថ្ងៃទី៣០ មិថុនា នគរបាលតួកគី បានកំណត់ពីអត្តសញ្ញាណរបស់ជនដៃដល់ទាំង៣នាក់ ដែលបានដាក់គ្រាប់បែកបំផ្ទុះសម្លាប់ខ្លួន នៅព្រលានយន្តហោះ។ ក្នុងចំណោមជនទាំង៣នាក់នេះ គឺសុទ្ធតែមកពីតំបន់កូកាសទាំងអស់ គឺម្នាក់ជាជនជាតិរុស្ស៊ី ម្នាក់មកពីតំបន់ឆេឆិននី និងម្នាក់ទៀតជាជនជាតិកៀកហ្ស៊ីស្ថាន។
នរគបាលតួកគី បានឆែកឆេរកន្លែងលាក់ខ្លួនមួយកន្លែងរបស់បណ្តាញជនដៃដល់ នៅអ៊ីស្តង់ប៊ូល ដោយបានរកឃើញលិខិតឆ្លងដែនរុស្ស៊ីមួយ របស់ជនដៃដល់ឈ្មោះ Osman Vadinov ដែលមានដើមកំណើត នៅតំបន់ Daghestan ភាគខាងត្បូងរុស្ស៊ី ដែលជាតំបន់សម្បូរអ្នកកាន់សាសនាអ៊ីស្លាម។ ជននេះបានចូលមកតួកគី កាលពីខែមុន ហើយកាលពីឆ្នាំ២០១៥ ជននេះ ធ្លាប់បានចេញចូលទៅតំបន់រ៉ាខា នៅស៊ីរី ដែលជាទីតាំងធំរបស់ពួកជីហាដអង្គការរដ្ឋអ៊ីស្លាមទៀតផង។
សរុបមកដល់ថ្ងៃសុក្រ ទី១ កក្កដា គេបានចាប់មនុស្ស១១នាក់បន្ថែមទៀត ដែលសុទ្ធជាជនសង្ស័យជាប់ពាក់ព័ន្ធ ក្នុងបណ្តាញរបស់ពួកជីហាដអង្គការរដ្ឋអ៊ីស្លាម។ បណ្តាញពួកនេះ មានលាយឡំគ្នា ដោយមានភាគច្រើនជាជនជាតិតួកគី តែក៏មានពួកជីហាដដែលមានប្រភពមកពីតំបន់កូកាសរុស្ស៊ីដែរ។ ហើយករណីភេរវកម្ម ដែលជាស្នាដៃរបស់ជនជីហាដមកពីតំបន់កូកាសរុស្ស៊ីនេះ មិនមែនជាលើកទីមួយទេនៅតួកគី។ លោកនាយករដ្ឋមន្ត្រីតួកគី បានធ្វើការសន្និដ្ឋានថា ភេរវកម្មកាលពីថ្ងៃទី ២៨ មិថុនា គឺពិតជាស្នាដៃរបស់ក្រុមជីហាដអង្គការរដ្ឋអ៊ីស្លាម។
ក្រុមជីហាដអង្គការរដ្ឋអ៊ីស្លាម មិនបានចេញមុខមកទទួលស្គាល់៖
ភេរវកម្មថ្ងៃទី២៨មិថុនា នៅព្រលានយន្តហោះអ៊ីស្តង់ប៊ូល មិនត្រូវបានក្រុមជីហាដអង្គការរដ្ឋអ៊ីស្លាមប្រកាសទទួលស្គាល់ទេ។ និយាយទៅ ក្រុមនេះមិនដែលប្រកាសទទួលស្គាល់ ពីសកម្មភាពភេរវកម្មរបស់ពួកវានៅតួកគីទេ។ បើគិតពីដើមឆ្នាំ២០១៥មក មានភេរវកម្មកើតឡើងនៅតួកគី ដល់ទៅ៥០ករណីឯណោះ តែមិនដែលមានលើកណា ដែលក្រុមជីហាដអង្គការរដ្ឋអ៊ីស្លាមនេះ ចេញមុខមកទទួលស្គាល់ទេ។ ពោលគឺវាខុសគ្នា ពីករណីភេរវកម្ម នៅបារាំង នៅអាមេរិក រឺនៅបែលហ្ស៊ិក ដែលមិនត្រឹមតែក្រុមពួកនេះប្រកាសទទួលស្គាល់ទេ តែជនដៃដល់ខ្លួនឯង បានថតរូបបង្ហោះតាមហ្វេសប៊ុកទៀត។
ដើម្បីយល់ពីភាពខុសគ្នានេះ យើងត្រូវយល់ថា ភេរវកម្មនៅតួកគី និងនៅប្រទេសផ្សេង គឺមានកម្មវត្ថុខុសគ្នា។នៅអឺរ៉ុប រឺប្រទេសណាៗទៀត ភេរកម្មដែលជាស្នាដៃរបស់ពួកជីហាដអង្គការរដ្ឋអ៊ីស្លាម គឺដើម្បីបង្ករការភ័យខ្លាច ដើម្បីវាយប្រហារសិទ្ធិសេរីភាព និងរបៀបរស់នៅរបស់លោកសេរី ហើយកម្មវត្ថុចំបងមួយទៀតគឺ ដើម្បីផ្សាយពាណិជ្ជកម្ម ឃោសនាពីចលនាប្រយុទ្ធរបស់ពួកវា ថាខ្លាំងកំរិតណា ដើម្បីទៅអូសទាញយុវជនរឺអ្នកកាន់សាសនាអ៊ីស្លាម នៅតាមប្រទេសទាំងនោះ។
ដោយឡែក ភេរវកម្មនៅតួកកី មិនថាលើកនេះរឺលើកមុនៗទេ គឺពួកជីហាដអង្គការរដ្ឋអ៊ីស្លាមនេះ មានចេតនាសងសឹកតែមួយមុខគត់ទៅលើរដ្ឋាភិបាលតួកគី។ ទីមួយសងសិក ទីពីរបំភ័យ ដើម្បីកុំឲ្យតួកគីលូកដៃចូលជាមួយប្រទេសមហាអំណាចផ្សេងៗ ដែលមានបំណងកម្ទេចបណ្តាញពួកវា។ ដូច្នេះ ក្រុមជីហាដអង្គការរដ្ឋអ៊ីស្លាម ប្រើយុទ្ធសាស្ត្រផ្សេង ដើម្បីបំភ័យរដ្ឋាភិបាលតួកគី តែពួកវាក៏ត្រូវប្រយ័ត្នដែរ ក្នុងការបិទព័ត៌មានឲ្យបានជិត ដើម្បីកុំឲ្យបណ្តាញពួកវាមានគ្រោះថ្នាក់។ ចូរយើងកុំភ្លេចថា តួកគី គឺជាដែនដីសំបុករបស់ពួកជីហាដនេះតែម្តង។ តួកគីជាកន្លែងបណ្តុះបណ្តាល ជាកន្លែងឆ្លងកាត់របស់ពួកជីហាដ។ ដូច្នេះ លាក់ឲ្យជិតកាលណា ល្អកាលហ្នឹង។ ហើយតាមរយៈភេរវកម្មបំភ័យទាំងនេះ ក្រុមនគរបាលសម្ងាត់តួកគី ពិតជាត្រូវតែចរចាជាមួយក្រុមជីហាដ ដើម្បីទុកផ្លូវឲ្យគ្នាដើរទៅវិញទៅមក មិនខាន។
តួកគីភ្លឺភ្នែក ប្រកាសសង្រ្គាម ជាមួយក្រុមជីហាដអង្គការរដ្ឋអ៊ីស្លាម៖
ច្រើនឆ្នាំមកនេះ នរណាមិនដឹងថា អាជ្ញាធរតួកគី ជាពិសេសនគរបាលចារកិច្ចតួកគី បានបើកដៃឲ្យពួកជីហាដធ្វើសកម្មភាពតាមចិត្ត? នយោបាយរបស់លោកអ៊ែកដូហ្កាន់ គឺចង់ខ្ចីដៃពួកជីហាដនេះ ទៅសម្លាប់របស់បាស្ឆា អាល់អាសាដនៅស៊ីរី។ ក៏ប៉ុន្តែ ទាំងក្រុមជីហាដអង្គការដ្ឋអ៊ីស្លាម ទាំងរដ្ឋាភិបាលតួកគី គ្មានអ្នកណាទុកចិត្តអ្នកណាទេ។
ក៏ប៉ុន្តែ ប៉ុន្មានខែចុងក្រោយនេះ យើងសង្កេតឃើញរដ្ឋាភិបាលតួកកី ហាក់បែរក្បាលមកខាងសម្ព័ន្ធមិត្តដើម្បីវាយកម្ទេចក្រុមជីហាដវិញ ដោយសារទីមួយចង់លាងមុខមាត់ ព្រោះគេដឹងពីពុតត្បុតអស់ហើយ ហើយមួយទៀតក៏គ្មានជំរើសដែរ ព្រោះមានជនអន្តោប្រវេសន៍មកពីស៊ីរីច្រើនពេក ហើយត្រូវសហគមអន្តរជាតិស្តីបន្ទោសទៀត។
អញ្ចឹងជាសរុបមក ភេរវកម្មនេះ គឺវាប្រាដកណាស់ ថា ក្រុមជីហាដអង្គការដ្ឋអ៊ីស្លាម បានធ្វើដើម្បីសងសិកតួកគី។ ហើយយើងអាចសំគាល់បានដែរ ថាអំណេះតទៅ រដ្ឋាភិបាលតួកគី បានប្រកាសសង្រ្គាមជាមួយក្រុមជីហាដអង្គការដ្ឋអ៊ីស្លាមជាចំហរដែរ ព្រោះនេះជាលើកទីមួយហើយ ដែលគេបានប្រកាសថាវាជាស្នាដៃរបស់ពួកនេះ។ លើកមុនៗក៏គេដឹងដែរ តែគ្រាន់តែគេមិននិយាយជាផ្លូវការ។
រុស្ស៊ី និង តួកគី៖ សត្រូវរបស់សត្រូវអញ្ញ គឺជាមិត្តរបស់អញ្ញ
ដូចយើងដឹងហើយ រុស្ស៊ីនិងតួកគី មើលមុខគ្នាមិនត្រង់ទេកន្លងមក ដោយសាររឿងក្រុមជីហាដអង្គការរដ្ឋអ៊ីស្លាមនេះឯង។ តែពេលនេះ អ្នកទាំងពីរបានខិតមកជិតគ្នា ព្រោះអ្នកទាំងពីរមានសត្រូវរួមគ្នា។ គេថា សត្រូវរបស់សត្រូវអញ្ញ គឺជាមិត្តរបស់អញ្ញ គឺមិនខុសទេ។ គ្រាន់តែមានភេរវកម្មភ្លាម លោកពូទីន បានទូរស័ព្ទទៅនិយាយជាមួយលោកអ៊ែរដូហ្កាន់ ដើម្បីរំលែកទុក្ខ ហើយសន្យាចាប់ដៃជាមួយតួកគីទៀត។ វាជារឿងមិនស្មានដល់ទេ ព្រោះប៉ុន្មានខែមុននេះ មេដឹកនាំទាំងពីរនេះ ផ្លែផ្កាដាក់គ្នាសំបើមណាស់។
ភ្លាមៗនោះដែរ រដ្ឋាភិបាលរុស្ស៊ី បានសម្រេចលប់ចោលទណ្ឌកម្មលើតួកគី ដោយបានអនុញ្ញាតិ ឲ្យមានលក់សំបុត្រទេសចរណ៍ទៅលេងតួកគី នៅក្នុងប្រទេសរុស្ស៊ីឡើងវិញ។ ហើយថ្ងៃសុក្រនេះទៀត លោករដ្ឋមន្ត្រីការបរទេសរុស្ស៊ី បានជួបជាមួយលោករដ្ឋមន្ត្រីការបរទេសតួកគី ដើម្បីពិភាក្សាគ្នា រកយុទ្ធសាស្ត្រកម្ទេចក្រុមជីហាដអង្គការរដ្ឋអ៊ីស្លាម។ ក្រុមដែលរៀបចំភេរវកម្ម ថ្ងៃទី២៨ មិថុនា អាចជាក្រុមអ៊ីស្លាមជីហាដ ដែលមានប្រភពចេញពីតំបន់កូកាសរុស្ស៊ី ហើយត្រូវក្រុមជីហាដអង្គការរដ្ឋអ៊ីស្លាមអូសទាញ ដើម្បីខ្ចីដៃសម្លាប់មនុស្សនៅតួកគី។
រុស្ស៊ីបារម្ភណាស់រឿងចលនាអ៊ីស្លាមជ្រុលនិយម នៅតំបន់កូកាសនេះ ដូច្នេះហើយ បានជារុស្ស៊ីប្រឹងប្រែងប្រយុទ្ធនៅដើមបូព៌ា ដើម្បីកម្ទេចឥទ្ធិពលពួកអ៊ីស្លាមជ្រុលនិយម កុំឲ្យវារីករាលដាលដល់តំបន់ឆេឆិនីរបស់រុស្ស៊ី។ តួកគី ក៏អញ្ចឹងដែរ មកដល់តំណាល់កាលនេះ តួកគីមិនអាចលង់ខ្លួនទៅឲ្យជ្រៅជាងនេះបានទេ។ តួកគីត្រូវតែរកវិធី ដើម្បីដោះដៃចេញពីក្រុមជីហាដអង្គការរដ្ឋអ៊ីស្លាមឲ្យបាន ទោះបីជាត្រូវ ចំណាយប៉ុណ្ណាក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ