ភេរវកម្មទីក្រុងនីស គឺជាអំពើព្រៃផ្សៃថោកទាប យ៉ាងងងិតងងុល
ភ្លាមៗ ក្រោយហេតុការណ៍ភេរវកម្មដ៏សាហាវព្រៃផ្សៃ នៅទីក្រុងនីស ប្រតិកម្មថ្កោលទោស បានចេញជាបន្តបន្ទាប់ ពីថ្នាក់ដឹកនាំបរទេសនានា មិនថានៅអឺរ៉ុប អាស៊ី និងតាមបណ្តាប្រទេសតំបន់អារ៉ាប់ នៅមជ្ឈឹមបូព៌ា។ គ្រប់គ្នាបានថ្កោលទោសអំពើភេរវកម្មនេះ ថាជាអំពើថោកទាប និងកំសាកបំផុត។ ដូចគ្នាដែរ ប្រទេសទាំងអស់បានបញ្ជាក់ពី ការសាមគ្គីជាមួយប្រទេសបារាំង ក្នុងការបោសសំអាតអំពើភេរវកម្ម ឲ្យខាងតែបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
“អំពើភេរវកម្មនៅទីក្រុងនីស កាលពីយប់ថ្ងៃព្រហស្បតិ៍ទី ១៤ កក្កដា គឺជាអំពើថោកទាបព្រៃផ្សៃ ហើយដែលវាផ្ទុយស្រលះពីទ្រឹស្តីដ៏ផូរផង់នៃសាសនាអ៊ីស្លាម”។ នេះគឺជាពាក្យធ្ងន់ៗ ដែលវិទ្យាស្ថានជាន់ខ្ពស់សាសនាអ៊ីស្លាមស៊ុនីត បានធ្វើសារផ្ញើរជូនរដ្ឋាភិបាលបារាំង។
វិទ្យាស្ថានដែលមានទីតាំងនៅទីក្រុង គែរ ប្រទេសអេហ្ស៊ីបនេះ គឺជាសកលវិទ្យាល័យ និងជាទីប្រជុំផ្សព្វផ្សាយទ្រឹស្តី នៃសាសនាអ៊ីស្លាមនិកាយស៊ុនីត ដ៏ធំនិងមានឥទ្ធិពលជាងគេបង្អស់ ក្នុងពិភពលោក។ ក្នុងសារថ្លែងថ្កោលទោសនេះ បានបញ្ជាក់ទៀតថា វាគឺជារឿងចាំបាច់ និងបន្ទាន់បំផុត ដែលពិភពលោកទាំងមូល ត្រូវខិតខំប្រឹងប្រែងពួតដៃគ្នា ដើម្បីបោសសំអាតអំពើភេរវកម្មទាំងអស់នេះ ឲ្យវិនាសពីពិភពលោកយើង។
ប្រទេសធំៗនៅក្នុងពិភពអារ៉ាប់ស៊ុនីត មានអារ៉ាប៊ីសាអូឌីត អេហ្ស៊ីប និងអេមៀរ៉ាត់ អារ៉ាប់រួម ម្នាក់ៗសុទ្ធតែបានថ្លែងសារថ្កោលទោសទៅលើអំពើភេររវកម្ម ដែលបានកើតឡើងជាថ្មីម្តងទៀត ក្នុងទឹកដីបារាំង។ គ្រប់គ្នាសុទ្ធតែបានអះអាងបញ្ជាក់ថា បារាំងគឺជាមិត្ត ហើយពេលនេះចំណងមិត្តភាពនេះ នឹងកាន់តែរឹងមាំ ដោយពួកគេសន្យា ពួតដៃគ្នាជាមួយបារាំង ដើម្បីចូលរួមសហការ ប្រយុទ្ធប្រឆាំងនឹងបណ្តាញភេរវកម្មអ៊ីស្លាម ឲ្យខាងតែបាន។
ចំណែកសម្តេចប៉ាប ហ្រ្វង់ស័រ ប្រមុខសង្ឃកាតូលិក បានថ្លែងថា អំពើភេរវកម្មដ៏យង់ឃ្នងហួសនិស្ស័យនេះ គឺជាអំពើហិង្សាដ៏សែនងងឹងងងុល ជាទីបំផុត។
ដោយឡែក ក្រុមប្រទេសអាស៊ី និងអឺរ៉ុប ទាំង៥១ប្រទេសដែលកំពុងតែជួបប្រជុំគ្នា នៅទីក្រុងអ៊ូឡង់បាទ័រ ប្រទេសម៉ុងហ្គោលី បានរួមគ្នាធ្វើសេចក្តីប្រកាសមួយនៅថ្ងៃទី ១៥កក្កដានេះ ដើម្បីថ្កោសទោសទៅលើអំពើភេរវកម្មនេះ ហើយសូមចូលរួមចំណែករំលែកទុក្ខដល់ប្រទេសបារាំង។ ក្រុមប្រទេសទាំង៥១ ក៏បានបញ្ជាក់ជាថ្មីម្តងទៀត អំពីសារៈសំខាន់ នៃការសហការគ្នាឲ្យកាន់តែប្រសើរ ក្នុងការបោសសម្អាតបណ្តាញភេរវកម្មអន្តរជាតិ ព្រោះថាបារាំងមិនមែនជាប្រទេសរងគ្រោះតែម្នាក់ឯងទេ។ គ្រប់បណ្តាប្រទេសទាំងអស់ មិនថានៅអឺរ៉ុប នៅអាហ្រិក រឺនៅអាស៊ី គឺសុទ្ធសឹងតែប្រឈមមុខនឹងអំពើភេរវម្ម របស់ពួកជីហាដអ៊ីស្លាមជ្រុលនិយមទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ