Euro2016៖ បញ្ហាសន្តិសុខ-សុវត្ថិភាព កាន់តែធ្វើឲ្យអាជ្ញាធរបារាំងឈឺក្បាល
ការប្រកួតកីឡាបាល់ទាត់Euro 2016 នឹងត្រូវចាប់ផ្តើមបើកនៅថ្ងៃសុក្រ ស្អែកនេះ ដោយបារាំងជាប្រទេសម្ចាស់ផ្ទះ នឹងត្រូវជួបប្រកួតជាមួយក្រុមជម្រើសជាតិ រូម៉ានី។ នេះជាមហាព្រឹត្តិការណ៍ដ៏ធំសម្រាប់បារាំង ដែលទទួលធ្វើជាម្ចាស់ផ្ទះ តែក៏ជាក្តីព្រួយបារម្ភមួយដ៏ធំផងដែរ ព្រោះបារាំងត្រូវធានាការពារសុវត្ថិភាព របស់អ្នកគាំទ្ររាប់លាននាក់។ យ៉ាងណាមិញ មានការព្រួយបារម្ភខ្លាំងទៅដល់ ការគម្រាមកំហែង ធ្វើភេរវកម្ម ជាពិសេសគឺក្រោយពេលដែលអ្នករៀបចំ បានសម្រេចចិត្តបើកឲ្យមានតំបន់ Fan Zone ដែលជាកន្លែងប្រមូលផ្តុំមើលការផ្សាយបន្តផ្ទាល់ រាល់ការប្រកួត នៅតាមទីក្រុងធំៗទាំង១០ របស់បារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៥៩
មនុស្សម្នា បាក់ស្បាត ខ្លាចមានភេរវកម្មនៅបារាំងទៀត៖
បញ្ហាសន្តិសុខ គឺជាបញ្ហាសំខាន់បំផុត ហើយដែលអាជ្ញាធរបារាំង ខិតខំប្រឹងប្រែងធ្វើ ព្រោះថាដូចយើងដឹងស្រាប់ហើយ ទីក្រុងប៉ារីស បានរងភេរវកម្មផ្ទួនៗគ្នា នៅឆ្នាំ២០១៥។ ព្រឹត្តិការណ៍ ប្រកួតកីឡាបាល់ទាត់ពានរង្វាន់អឺរ៉ុបលើកនេះ គឺជាព្រឹត្តិការណ៍ធំណាស់។ បើតាមការប៉ាន់ស្មាន មានមនុស្សចូលរួម ដែលជាអ្នកគាំទ្រកីឡាបាល់ទាត់នោះ ប្រមាណជា៨លាននាក់ ហើយក្នុងនោះគឺ២លាននាក់ គឺជាជនបរទេស ដែលធ្វើដំណើរមកបារាំង ដើម្បីទស្សនាការប្រកួត។
រដ្ឋាភិបាលបារាំង បានប្រកាសថា ការការពារសន្តិសុខ នឹងត្រូវធ្វើឲ្យបានកម្រិតខ្ពស់បំផុត មិនថានៅតាមពហុកីឡាដ្ឋាន រឺក៏នៅតាមទីប្រជុំជននានាទេ។ មានទីក្រុងធំៗរបស់បារាំងចំនួន១០ ដែលនឹងត្រូវទទួលធ្វើជាអ្នករៀបចំការប្រកួត។ កម្លាំងការពារសន្តិសុខ ប្រមាណជា៩ម៉ឺននាក់ នឹងត្រូវដាក់ពង្រាយ នៅតាមទីតាំងសំខាន់ ក្នុងឱកាសការប្រកួត ដែលមានរយៈពេលមួយខែនេះ។ អាជ្ញាធរបារាំង ក៏បានបង្កើតកម្មវិធីទូរស័ព្ទមួយផងដែរ ដើម្បីអនុញ្ញាតិឲ្យអ្នកប្រើប្រាស់ ធ្វើការជូនដំណឹងបន្ទាន់ ក្នុងករណីមានការសង្ស័យថាអាចមានអំពើភេរវកម្ម នៅទីកន្លែងណាមួយ។
តែយ៉ាងណាក៏ដោយ សម្រាប់អ្នកដែលខ្លាច អ្នកដែលមិនទុកចិត្ត ក៏គេនៅតែព្រួយបារម្ភដដែល។ ជាក់ស្តែង កីឡាករបាល់ទាត់មួយចំនួន បានទាំងហាមប្រាមមិនឲ្យប្រពន្ធកូន រឺក្រុមគ្រួសារមកមើលការប្រកួតនៅបារាំងទេ ដោយខ្លាចក្រែងមានភេរវកម្ម។ ប៉ុន្តែសម្រាប់ លោកហ្រ្វង់ស័រ ហូឡង់ ក៏ដូចជាក្នុងនាមរដ្ឋាភិបាលបារាំង លោកបានប្រកាសថា គ្រប់គ្នាដឹងអំពីគ្រោះថ្នាក់ តែបើយើងសំងំនៅតែក្នុងផ្ទះ មិនធ្វើអ្វីសោះ មានន័យថា ពួកយើងចុះចាញ់ពួកភេរវករយង់ឃ្នងទាំងនោះ។ កីឡាគឺបង្ហាញពីមិត្តភាព ភាតរភាពរវាងជាតិសាសន៍ទាំងអស់ ដូច្នេះគ្រប់គ្នាត្រូវតែមានសិទ្ធិមានឱកាសសប្បាយរីករាយ ជាមួយនឹងការប្រកួតទាំងនេះ ដែលបារាំងមានកិត្តិយសធ្វើជាម្ចាស់ផ្ទះ។
Fan Zones ទទួលអ្នកគាំទ្រជាង៦លាននាក់៖
Fan Zones គឺមានន័យថាជា Zone រឺក៏បរិវេនដែលគេរៀបចំសម្រាប់ទទួលអ្នកគាំទ្រទាំងអស់ ដើម្បីមកទស្សនាការផ្សាយបន្តផ្ទាល់។ ការធ្វើរបៀបនេះ បានចាប់ផ្តើមដំបូងកាលពីការប្រកួតបាល់ទាត់Euro2008 នៅស្វីសនិងអូទ្រីស។ កាលនោះ ពហុកីឡាដ្ឋានរបស់ប្រទេសទាំងពីរនេះ តូចៗ មិនអាចដាក់មនុស្សបានច្រើន ដូច្នេះហើយគេក៏បង្កើតជាបរិវេនពិសេស នៅក្នុងទីក្រុង ដើម្បីឲ្យអ្នកគាំទ្រ មកមើលការផ្សាយបន្តផ្ទាល់ជុំគ្នា។ គេមិនមែនមានតែការផ្សាយបន្តផ្ទាល់មួយមុខទេ តែគេមានរៀបចំជាវេទិកាជជែក ការលេងល្បែងកម្សាន្តផ្សេងៗ ទាក់ទិនទៅនឹងកីឡាបាល់ទាត់ ហើយមានការប្រគុំតន្ត្រី ព្រមទាំងការលក់ចំណីអាហារ និងភេសជ្ជៈអីជាដើម។
សម្រាប់Fan Zones ក្នុងឱកាសការប្រកួតEuro2016នេះ បារាំងមានគម្រោងបើកនៅតាមទីក្រុងទាំង១០ ដែលមានរៀបចំការប្រកួត។ យោងតាមតួលេខ តាមពហុកីឡាដ្ឋាន គឺទទួលមនុស្សឲ្យចូលទស្សនាបានតែ២លាន៥សែននាក់ទេ តែFan Zones វិញអាចទទួលអ្នកគាំទ្របន្ថែម ដល់ទៅ៦លាន៥សែននាក់ឯណោះ ហើយដោយមិនគិតថ្លៃទៀត។ Fan Zonesដែលធំជាងគេ គឺនៅទីក្រុងប៉ារីស ជាប់នឹងជើងTour Eiffel តែម្តង ដែលតាមគ្រោងទុក អាចទទួលអ្នកចូលរួមដល់ទៅ៨ម៉ឺននាក់ឯណោះ។ សាលាក្រុងប៉ារីសបានបញ្ជាក់ថា អេក្រង់ផ្សាយបន្តផ្ទាល់ មានទំហំដល់ទៅ៤២០ម៉ែត្រក្រឡា ដែលនេះជាគឺជាអេក្រង់ធំជាងគេមិនធ្លាប់មានទេ។
ការព្រួយបារម្ភ នៅពីក្រោយការបើកឲ្យមាន Fan Zones៖
បញ្ហាចោទ គឺបញ្ហាសន្តិសុខ។ កាលណាបង្កើត Fan Zones នេះ មានន័យថានៅជុំវិញនេះ ត្រូវការពារសន្តិសុខឲ្យបានម៉ដ្ឋចត់។ ជាក់ស្តែងនៅTour Eiffel គេបានធ្វើរបងព័ទ្ធជុំវិញ ហើយសាងសង់នូវរនាំងនិងច្រកចូល ប្រកបដោយសុវត្ថិភាពខ្ពស់។ អ្នកចង់ចូល ត្រូវកម្លាំងសន្តិសុខឆែកឆេរ ហើយគេមិនឲ្យយកកាបូបចូលទេ គឺចូលបានតែខ្លួន ប៉ុណ្ណោះ។ ធម្មតាទេ ពួកភេរវករវាសម្លឹងទៅកន្លែងណា ដែលមានការជួបជុំកកកុញ ដើម្បីធ្វើឲ្យមានអ្នករងគ្រោះច្រើន។
អ្វីដែលគេព្រួយបារម្ភ មួយទៀតនោះ គឺថាតំបន់ Fan Zones ទាំងនេះ នឹងត្រូវធ្វើឲ្យបែកកម្លាំងការពារសន្តិសុខ មានន័យថាគឺ គេត្រូវចែករំលែកកម្លាំង មួយផ្នែកយកទៅការពារនៅតាមពហុកីឡាដ្ឋាន និងមួយផ្នែកត្រូវយកមកការពារតំបន់ Fan Zones។ មានមតិមួយចំនួន បានប្រឆាំងដាច់ខាតថា ដើម្បីការពារសន្តិសុខនៅពហុកីឡាដ្ឋាន គឺគេមិនត្រូវបើកឲ្យមាន Fan Zonesនៅខាងក្រៅទេ។ តែមតិខ្លះវិញ បានសំណូមពរថា គួរណាតែបើកឲ្យមាន Fan Zonesនេះ នៅពេលណាដែលទីក្រុងនោះពុំមានការប្រកួតវិញ។ តាមធម្មតា កាលវិភាគនៃការប្រកួត គឺខុសៗគ្នា ដូច្នេះបើនៅទីក្រុងមួយមានការប្រកួត គេមិនត្រូវបើក Fan Zones ទេ ដើម្បីទុកកម្លាំងសន្តិសុខទៅការពារនៅពហុកីឡាដ្ឋាន។ តែមកទល់ពេលនេះ គឺនៅមិនទាន់មានតំណឹងជាក់លាក់ពីអាជ្ញាធរ ថាគេសម្រេចយ៉ាងណាទេ។
បាតុកម្ម បាតុកម្ម បាតុកម្ម…
បាតុកម្មមិនចូលធ្វើការ កំពុងតែបន្តធ្វើនៅឡើយ នៅពាសពេញប្រទេស។ ទីមួយ គឺបាតុកម្មរបស់សហជីពនយោជិតខាងសេវាកម្មផ្លូវដែក។ នេះគឺជាបញ្ហាស្មុគស្មាញជាងគេ ដោយសារតែចរាចរណ៍រថភ្លើង ត្រូវបានជួបការរាំងស្ទះខ្លាំង។ នៅបារាំង មនុស្សម្នាប្រើប្រាស់សេវាដឹកជញ្ជូនតាមរថភ្លើងច្រើនណាស់ ដូច្នេះពេលមានបាតុកម្មម្តងៗ ធ្វើឲ្យអ្នកដំណើរមានការលំបាក។ សម្រាប់ការប្រគួតកីឡាបាល់ទាត់នេះ គឺគេបារម្ភថា វានឹងបង្កការលំបាក ដល់ការធ្វើដំណើររបស់អ្នកគាំទ្រទាំងអស់។
បន្ថែមពីនេះទៀត ខាងសហជីពអ្នកបើកយន្តហោះរបស់ក្រុមហ៊ុន AirFrance ក៏កំពុងត្រៀមខ្លួនធ្វើបាតុកម្មដែរ។ ដូច្នេះបន្ថែមពីបញ្ហាដឹកជញ្ជូនតាមផ្លូវដែក គឺការដឹកជញ្ជូនតាមផ្លូវអាកាស ក៏អាចនឹងជួបការរាំងស្ទះផងដែរ។ ហើយលើសពីនេះទៀត នៅមានបាតុកម្មរបស់ក្រុមពលករអ្នកប្រមូលសំរាម នៅទីក្រុងប៉ារីសទៀត ដែលបានបន្តធ្វើ៣ថ្ងៃមកហើយ។
ដូច្នេះក្រៅពីបញ្ហាសន្តិសុខ និងបញ្ហាគ្មានរថភ្លើងជិះ គឺក្រុងប៉ារីសកំពុងប្រឈមមុខនឹងបញ្ហាអនាម័យ សណ្តាប់ធ្នាប់ក្រុងទៀត ដោយសារតែសំរាមនៅកកកុញ គ្មានអ្នកប្រមូល។ រដ្ឋាភិបាល នៅតែបន្តចរចា ជាមួយក្រុមសហជីព បើទោះបីជាម្នាក់ៗនៅតែចចេស ទាមទាទៅតាមការចង់បានរបស់ខ្លួនដដែល។ កាសែតបរទេសជាច្រើនបានសរសេរថា បារាំងឆ្នាំនេះយីអ៊ុនដាក់យកតែមែនទែន។ ដូច្នេះគេសូមជូនពរ ឲ្យក្រុមបាល់ទាត់ជំរើសជាតិបារាំង ឈ្នះបានពានEuro លើកនេះទៅចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ