ឈុតមុជទឹកស្ត្រីអ៊ីស្លាម Burkini កំពុងតែបង្កជារលកបោកបក់ ក្នុងសង្គមបារាំង
ចុះផ្សាយនៅថ្ងៃ៖
ស្តាប់ - ០៦:១៤
ប្រទេសបារាំងមួយសប្តាហ៍កន្លងមកនេះ កំពុងរំជើបរំជួលប្រកែកប្រណាំងគ្នាតឹងសរសៃក ដោយសារតែវត្តមាននៃឈុតមុជទឹកបែបអ៊ីស្លាម រឺដែលហៅថា បៀកគីនី នៅតាមឆ្នេរសមុទ្របារាំង។ កាលពីចុងសប្តាហ៍មុននេះ អំពើហិង្សាបានផ្ទុះឡើងយ៉ាងអនាធិបតេយ្យនៅកោះCorse រវាងសហគមអ្នកកាន់សាសនាអ៊ីស្លាម និងប្រជាជនបារាំងផ្សេងទៀត។ អជ្ញាធរក្រុងចំនួន៣នៅបារាំង បានចេញប្រកាស ហាមឃាត់មិនឲ្យស្លៀកឈុតមុជទឹកប្រភេទនេះទេ ដើម្បីការពារសណ្តាប់ធ្នាប់សាធារណៈ។ សម្រាប់អ្នករិះគន់ ការហាមឃាត់នេះ គឺជាការបំបិតសិទ្ធិសេរីភាព តែសម្រាប់មតិមួយចំនួន វាជារឿងដែលអាជ្ញាធរត្រូវតែធ្វើ ព្រោះឈុតមុជទឹកបែបអ៊ីស្លាមនេះ វាបង្ហាញពីចរន្តជ្រុលនិយមរបស់ពួកអ៊ីស្លាមនៅបារាំង ហើយដែលវាឆ្លុះបញ្ចាំងពីការឃុំឃាំងស្រ្តីក្នុងប្រពៃណីអ៊ីស្លាមផ្តាច់ការ។
ឆ្នេរសមុទ្រដ៏ស្រស់ស្អាតរបស់បារាំង បានក្លាយជាទីលាននៃការជជែកដេញដោល ប្រកែកគ្នារវាងសហគមអ្នកកាន់សាសនាអ៊ីស្លាម និងប្រជាជនបារាំងទូទៅ។ នោះក៏ដោយសារតែវត្តមាននៃឈុតមុជទឹកម៉ូដថ្មីរបស់ស្រ្តីអ៊ីស្លាមមួយចំនួន។ ពីមុនគេគ្រាន់តែធ្លាប់ឃើញស្ត្រីអ៊ីស្លាម ស្លៀកពាក់រុំខ្លួនជិតឈឹង ដើរតាមផ្លូវ តែពេលនេះសូម្បីតែពេលចុះមុជទឹកសមុទ្រ ក៏ស្រ្តីអ៊ីស្លាមត្រូវតែស្លៀកឈុតពិសេស ដែលរុំជិតខ្លួនឃើញតែប្រឡង់មុខ និងចុងដៃតែប៉ុណ្ណោះ។
ហាមមិនឲ្យស្លៀកឈុតមុជទឹកBurkini គឺស្មើនឹងបំបិទសិទ្ធិសេរីភាព៖
ក្រោយកើតអំពើហិង្សា ឈ្មោះប្រកែកគ្នា ដោយសារតែឈុតមុជទឹក Burkini នេះ ចៅហ្វាយក្រុងចំនួន៣នៅបារាំង បានចេញបំរាម ហាមមិនឲ្យស្លៀកឈុតមុជទឹកនេះតែម្តង។ តើការហាមឃាត់នេះ វាជារឿងជ្រុលហួសហេតុ រឺយ៉ាងណា? តើមនុស្សម្នាក់ៗ គ្មានសិទ្ធិចុះមុជទឹកសមុទ្រ ដោយស្លៀកសំលៀកបំពាក់អ្វីតាមតែចិត្តចង់ មិនបានទេរឺ? រឺមួយ ក៏ឈុតមុជទឹកបែបអ៊ីស្លាមនេះ វាមានបង្កប់នូវតម្លៃអ្វីមួយ ដែលធ្វើឲ្យសង្គមបារាំងមិនអាចទទួលយកបាន?
សំណួរនេះ បានចោទសួរឡើងនៅតាមវិទ្យុ កញ្ចក់ទូរទស្សន៍ និងសារព័ត៌មានបារាំងនានា ដោយវាគ្មិនម្នាក់ៗលើកអំណះអំណាង និងការយល់ឃើញរៀងៗខ្លួន។
សិទ្ធិសេរីភាពរបស់ប្រជាពលរដ្ឋម្នាក់ៗ ក្នុងទឹកដីបារាំង គឺជាតំលៃមិនអាចកាត់ថ្លៃបាន ដែលសង្គម និងច្បាប់បារាំងតែងតែខ្នះខ្នែងការពារ។ ការហាមឃាត់ មិនឲ្យមនុស្សស្រីអ៊ីស្លាមចុះមុជទឹកសមុទ្រ ដោយគ្រាន់តែគ្នាស្លៀកឈុតBurkini បែបអ៊ីស្លាម រុំខ្លួនជិតនោះ វាគឺជារឿងមួយជ្រុលហួសហេតុ និងមិនអាចទទួលយកបានទេ។ ទោះអ្នកនោះចង់ស្លៀក សារុង ស្លៀកក្រម៉ា ស្លៀកឈុតម៉ៃយោបញ្ចេញសាច់ រឺក៏ស្រាតននលគក ក៏គឺជារឿងរបស់គេ ដែលគ្មាននរណាម្នាក់អាចទៅហាមបានទេ។
តួនាទីរបស់អាជ្ញាធរក្នុងការបង្ការ និងការពារសណ្តាប់ធ្លាប់សាធារណៈ៖
សម្រាប់អ្នកកាន់សាសនាអ៊ីស្លាម ការហាមឃាត់នេះ វាបានឆ្លុះបញ្ចាំងពីការស្អប់ខ្ពើមរើសអើងទៅលើអ្នកកាន់សាសនាអ៊ីស្លាម។ ពួកគេយល់ថា បើស្រ្តីបារាំង មានសិទ្ធិស្លៀកខោស្លីបមុជទឹក ស្ត្រីអ៊ីស្លាម ក៏មានសិទ្ធិមុជទឹកក្នុងឈុតពិសេសរបស់ខ្លួនដែរ។
យ៉ាងណាក៏ដោយ មតិមួយចំនួនទៀត បានលើកឡើងថា ការចេញបំរាមហាមមិនឲ្យស្លៀកឈុតBurkini អ៊ីស្លាម នៅតាមក្រុងចំនួន៣នេះ គឺជារឿងដែលសមរម្យ ព្រោះវាបានឈរលើមូលហេតុ ការពារសណ្តាប់ធ្នាប់សាធារណៈ។ ជាក់ស្តែង ការឈ្លោះប្រកែកគ្នា ឈានទៅដល់ផ្ទុះអំពើហិង្សាដុតឡាន វាយតប់គ្នា យ៉ាងអនាធិបតេយ្យនៅក្រុង Sisco កោះCorse កាលពីថ្ងៃអាទិត្យ គឺផ្តើមចេញពីឈុតមុជទឹកនេះឯង។ អ្នកវិភាគខ្លះលើកឡើងថា វាគឺជាតួនាទីរបស់អាជ្ញាធរ ក្នុងការបង្ការបញ្ហា និងការពារសន្តិសុខសណ្តាប់ធ្នាប់។
ឈុតមុជទឹកBurkini ជានិម្មិតរូបនៃទ្រឹស្តីអ៊ីស្លាមជ្រុលនិយម៖
ក៏ប៉ុន្តែ សម្រាប់អ្នកវិភាគ និងអ្នកធ្វើវិចារណកថាតាមសាព័ត៌មាននានា ភាគច្រើនគេយល់ថា វាគឺជាការពិតដែលបារាំងគោរព ស្រលាញ់ និងការពារសិទ្ធិសេរីភាពរបស់មនុស្ស ជាពិសេសសិទ្ធិរបស់មនុស្សស្រី ដែលជាភេទទន់ខ្សោយ។ រឿងហាមឃាត់ឈុតមុជទឹកបែបអ៊ីស្លាមនេះ បើយើងសម្លឹងមួយភ្លែត គឺវាជាការបំបិទសិទ្ធិសេរីភាព តែផ្ទុយទៅវិញ គឺឈុតមុជទឹកដ៏ចំលែកនេះទេ ដែលជាអ្នកបំបិតសិទ្ធិសេរីភាពរបស់ស្ត្រីអ្នកស្លៀក ហើយនេះ គឺជាអ្វីដែលប្រជាជនបារាំងមិនអាចទទួលយកបាន។
សម្រាប់អ្នកវិភាគភាគច្រើន ឈុតមុជទឹកបែបអ៊ីស្លាម គឺបានបង្កប់នូវមនោគមវិជ្ជាជ្រុលនិយមរបស់ពួកអ្នកកាន់សាសនាអ៊ីស្លាមនៅបារាំង។ បារាំងជាប្រទេសសេរី អនុញ្ញាតិឲ្យប្រជាជនគោរពសាសនាទាំងអស់តាមតែចិត្តខ្លួនមែនពិត តែនៅតាមទីសាធារណៈនានា គេមិនត្រូវបញ្ចេញសញ្ញាណនៃសាសនារបស់ខ្លួននោះទេ។ ភាពជ្រះស្រលះពីសញ្ញាណសាសនាទាំងអស់ គឺជាអត្តសញ្ញាណនៃសង្គមបារាំង ហើយដែលប្រជាជនមានដើមកំណើតមកពីកន្លែងផ្សេង ត្រូវតែគោរព ដើម្បីរួមរស់ជាមួយគ្នាដោយសុខសាន្ត។
ការដែលស្ត្រីអ៊ីស្លាមស្លៀកឈុតរុំខ្លួនជិតឈឹង ចុះមុជទឹក គឺវាមិនខុសពីការដែលស្ត្រីអ៊ីស្លាមទាំងនោះ ធ្វើការផ្តាច់ខ្លួន ចេញពីមនុស្សឯទៀត ដែលនៅមុជទឹកក្បែរគ្នា ថាខ្លួនជាស្ត្រីអ៊ីស្លាម ខុសពីអ្នកផ្សេងដែលមិនកាន់សាសនាអ៊ីស្លាម។ នេះគឺជាការបែកចែកបក្សពួក ដែលធ្វើឲ្យសង្គមបែកខ្ញែកគ្នា។ ជាងនេះទៅទៀត ឈុតសម្លៀកបំពាក់ប្រពៃណីអ៊ីស្លាម រុំខ្លួនជិតឃើញតែភ្នែកនេះ ថ្វីបើស្ត្រីអ៊ីស្លាមភាគច្រើន តែងតែអះអាងថាគេពេញចិត្តនឹងស្លៀកវា ដោយគ្មានអ្នកណាបង្ខំក៏ដោយ តែវាបានបង្ហាញនូវការកៀបសង្កត់ ផ្នែកផ្នត់គំនិតទៅលើស្ត្រីអ៊ីស្លាម ពីសំណាក់ប្រពៃណីចាស់គំរិលរបស់ជនជាតិអ៊ីស្លាម ដែលជាទូទៅគឺបុរសដែលតែងតែមានសិទ្ធិអំណាចជានិច្ច។
ក្នុងពេលដែល បុរសអ៊ីស្លាម ស្លៀកខោត្រឹមជង្គង់ ពាក់អាវយឺតសាមញ្ញ ដើរយ៉ាងរំភើយ ចំណែកស្ត្រីអ៊ីស្លាមជាប្រពន្ធវិញ ត្រូវបង្ខំចិត្តរុំខ្លួននឹងសម្លៀកបំពាក់ ពីក្បាលដល់ចុងជើង ដើរបែកញើសសស្រាក់។ តើនេះរឺ ជាភាពស្មើគ្នា រវាងស្ត្រីនិងបុរស?
ចរន្តអ៊ីស្លាមជ្រុលនិយមហួសហេតុ កំពុងបំពុលបរិយាកាសសង្គមបារាំង ហើយបញ្ហានេះមិនមែនទើបតែកើតឡើងជាលើកទីមួយទេ។ បុរសអ៊ីស្លាមជ្រុលនិយមខ្លះ បានបដិសេធមិនឲ្យគ្រូពេទ្យបារាំង ភេទប្រុសធ្វើការពិនិត្យសុខភាពភរិយាខ្លួនទេ។ អ្នកខ្លះប្រកែកទៀតមិនឲ្យពេទ្យប្រុស បង្កើតកូនឲ្យភរិយាខ្លួនទេ។ ប្រព័ន្ធសុខាភិបាលបារាំង ដែលរដ្ឋាភិបាលផ្តល់ឲ្យដោយឥតរើសមុខ ហើយសឹងតែមិនយកកំរៃនោះ បែរជាត្រូវក្រុមជនជ្រុលនិយមអ៊ីស្លាមមួយចំនួន ធ្វើការចំអកជាន់ឈ្លីទៅវិញ។
ចរន្តជ្រុលនិយមអ៊ីស្លាម ជាប្រភពនៃអំពើភេរវកម្មនៅបារាំង៖
មតិមហាជន កំពុងតែទ្រាំទ្រលែងបាន និងសកម្មភាពរបស់សហគមជនជាតិអ៊ីស្លាម ដែលកាន់តែព្រហ៊ើន លែងខ្លាចច្បាប់បារាំង មិនគោរពតម្លៃនឹងគោលការគ្រិះនៃសង្គមបារាំង។ អាងឡើងស្រែកតវ៉ាថា បារាំងរើសអើង ប្រកាន់ពូជសាសន៍ តែកុំភ្លេចថា គឺបារាំងដែលបានផ្តល់ជំរក ផ្តល់ការងារ ផ្តល់សាលារៀន និងមន្ទីរពេទ្យដល់ពួកខ្លួន។ លោកសាកូហ្ស៊ី អតីតប្រធានាធិបតីបារាំង ធ្លាប់បានថ្លែងថា ចង់នៅបារាំង ត្រូវគោរពច្បាប់បារាំង បើមិនពេញចិត្ត អញ្ជើញត្រឡប់ទៅស្រុកអ្នកវិញចុះ!
សហគមជនជាតិអ៊ីស្លាម មិនត្រូវភ្លេចទេថា ពីរឆ្នាំចុងក្រោយនេះ បារាំងបានរងគ្រោះដោយអំពើភេរវកម្មសាហាវជាច្រើនលើក។ ភេរវកម្មទាំងនោះសុទ្ធតែធ្វើឡើងដោយជនជ្រុលនិយមជីហាដអ៊ីស្លាម។ ដូច្នេះក្នុងកាលៈទេសៈដ៏លំបាកនេះ សហគមជនជាតិអ៊ីស្លាម ត្រូវយល់ពីអារម្មណ៍របស់ប្រជាជនបារាំងម្ចាស់ស្រុក ថាតើគេឈឺចាប់កម្រិតណា! ជាការពិត ពួកភេរវកម្មអ៊ីស្លាមគឺជាពួកជ្រុលនិយមមួយក្តាប់តូច មិនមែនអ្នកកាន់សាសនាអ៊ីស្លាមទាំងអស់ទេ តែកុំភ្លេចថា ជនមួយក្តាប់តូចទាំងនោះ គឺកើតចេញពីការការសាបព្រួសនៃ ចរន្តជ្រុលនិយមហួសហេតុ របស់សាសនាអ៊ីស្លាមនេះឯង។
សង្គមនិងប្រជាជនបារាំង មិនអាចអត់ទ្រាំ ធ្មេចភ្នែកឲ្យប្រទេសគេ ពោរពេញដោយសកម្មភាពជ្រុលនិយមបែបនេះទេ។ អ្នកវិភាគជាច្រើន យល់ថា សហគមអ៊ីស្លាម គួរយល់ពីបញ្ហានេះ ហើយគួរធ្វើខ្លួន ឲ្យបានស្ងាត់ស្ងៀម មិនត្រូវបញ្ចេញសញ្ញាណអ្វីដែលជ្រុលហួសហេតុ នៅតាមទីសាធារណៈ ដែលបញ្ជាក់ពីចរន្តងប់ងុលរបស់សាសនាខ្លួនទេ។ មនុស្សស្រីដែលកើតនៅប្រទេសបារាំង ថ្វីបើស្ថិតក្នុងគ្រួសារអ៊ីស្លាម តែវាជាកាតព្វកិច្ចរបស់រដ្ឋបារាំង ដែលត្រូវការពារលើកកំពស់សិទ្ធិស្រ្តីនោះ មិនឲ្យប្រពៃណីសាសនាអ៊ីស្លាមមកជិះជាន់ ដោយបំពានទៅលើច្បាប់របស់បារាំងបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ