អាមេរិកសន្យាថានៅតែជាសម្ព័ន្ធមិត្តអឺរ៉ុប ខណៈរុស្ស៊ីប្រឹងបញ្ចុះបញ្ចូលឲ្យងាកទៅខាងខ្លួន
ជំនួបកំពូលអន្តរជាតិនៅទីក្រុងមុយនិច ស្តីពីបញ្ហាសន្តិសុខ បានក្លាយជាទីកន្លែងប្រកាសអំពាវនាវ ពីគោលជំហរ នៃប្រទេសមហាអំណាច ក្នុងបរិបទវិបត្តិរវាងសហរដ្ឋអាមេរិក សហភាពអឺរ៉ុប និងរុស្ស៊ី។ លោកអនុប្រធានាធិបតីអាមេរិក បានប្រកាសថា អាមេរិក នឹងនៅតែជាសម្ព័ន្ធមិត្តដ៏សំខាន់បំផុតរបស់អឺរ៉ុប ហើយអាមេរិក នឹងនៅតែដើរតួនាទីចំបង ក្នុងការការពារសន្តិសុខនៃតំបន់អាត្លង់ទិកខាងជើង។ ដោយឡែក លោករដ្ឋមន្ត្រីការបរទេសរុស្ស៊ីវិញ បាននិយាយ ក្នុងន័យផាត់អឺរ៉ុបចោល ថា រុស្ស៊ីចង់ឲ្យអាមេរិក និងរុស្ស៊ីកៀកស្មាគ្នាឲ្យបានស្និត តែពីរនាក់ ដោយឈរលើផលប្រយោជន៍ជាក់ស្តែង ដើម្បីរក្សាស្ថិរភាពសកលលោក។
ចុះផ្សាយនៅថ្ងៃ៖
ស្តាប់ - ០២:១៤
ជាច្រើនសប្តាហ៍មកហើយ ដែលរដ្ឋាភិបាលថ្មីរបស់សហរដ្ឋអាមេរិក និយាយមិនប្រាកដ ម្តងអញ្ចេះម្តងអញ្ចោះ ទាក់ទិនទៅនឹងគោលជំហររបស់អាមេរិក នៅចន្លោះអឺរ៉ុប និងរុស្ស៊ី។ ទីបំផុត លោក Mike Pence អនុប្រធានាធិបតីអាមេរិក បានថ្លែងនៅទីក្រុងមុយនិចថា ចំណងសម្ព័ន្ធមិត្តរវាងអាមេរិក និងអឺរ៉ុប គឺគ្មានអ្វីមកអាចបំបែកបានទេ។ នៅអាមេរិក នៅតែជាមិត្ត និងបន្តដើរតួនាទីក្នុងការការពារសន្តិសុខ ក្នុងក្របខណ្ឌអង្គការសហប្រតិបត្តិការអាត្លង់ទិកខាងជើង ហៅកាត់ថា OTAN ជានិច្ច។
ចំពោះនាក់ទំនងជាមួយរុស្ស៊ីវិញ លោកអនុប្រធានាធិបតី អាមេរិកបានបញ្ជាក់ថា សហរដ្ឋអាមេរិក នៅតែប្រុងប្រយ័ត្នជានិច្ចជាមួយរុស្ស៊ី។ ក៏ប៉ុន្តែសហរដ្ឋអាមេរិក នឹងព្យាយាមបញ្ចៀសការប្រឈមមុខដាក់គ្នា ហើយងៀកទៅចាប់ដៃជាមួយរុស្ស៊ី លើវិស័យណា ដែលអាចផ្តល់ប្រយោជន៍ឲ្យទាំងអស់គ្នា។ យ៉ាងណាមិញទាក់ទិននឹងវិបត្តិអ៊ុយក្រែន លោកMike Pence បាននិយាយថា លោកប្រធានាធិបតីដូណាល់ ត្រាំ នៅតែជឿជាក់ថា គេអាចមានលទ្ធភាពទាមទារឲ្យរុស្ស៊ី គោរពកិច្ចព្រមព្រៀងសន្តិភាព ទីក្រុងមីនស្គ៍។
សម្តីរបស់លោក អនុប្រធានាធិបតីអាមេរិក ហាក់មានខ្លឹមសារ ធ្វើឲ្យមហាអំណាចនៅអឺរ៉ុប មានការកក់ក្តៅក្នុងចិត្ត។ តែយ៉ាងណាក៏ដោយ សម្រាប់លោក Jean Marc Ayrault រដ្ឋមន្ត្រីក្រសួងការបរទេសបារាំង លោកនៅតែមិនទុកចិត្តរដ្ឋាភិបាលថ្មីរបស់លោកដូណាល់ ត្រាំ។ លោកថា ក្នុងពេលមួយខែមកនេះ រដ្ឋាភិបាលថ្មីអាមេរិក ប្តូរគោលជំហរត្រឡប់ត្រឡិន មិនអាចទុកចិត្តបានទេ។ លោកបន្តថា ចូរយើងកុំភ្លេចថា កាលពីប៉ុន្មានសប្តាហ៍មុននេះ គឺលោកដូណាល់ ត្រាំ ដែលបាននិយាយក្នុងន័យបែបសប្បាយចិត្ត ដែលឃើញសហភាពអឺរ៉ុបបែកបាក់គ្នា។ ជាងនេះទៅទៀត លោក រដ្ឋមន្ត្រីបារាំងបានកត់សម្គាល់ថា ក្នុងសម្តីរបស់លោកអនុប្រធានាធិបតីអាមេរិក គឺមិនមានលើកឡើងពី សហភាពអឺរ៉ុបសូម្បីតែមួយម៉ាត់។
ដោយឡែក លោក រដ្ឋមន្ត្រីការបរទេសរុស្ស៊ី បាននិយាយបែបបញ្ចើចបញ្ចើរដាក់អឺរ៉ុបថា រុស្ស៊ីមិនយល់ស្របជាមួយមេដឹកនាំប្រទេសមួយចំនួន ដែលចោទរុស្ស៊ីថាមានបំណងបំផ្លាញស្ថិរភាពនយោបាយសកលលោក។ លោកបន្តថា តាមការពិត គឺប្រទេសទាំងនោះទេ ដែលនៅតែក្រាញននាល មិនព្រមមើលពីកំហុស និងចំណុចអវិជ្ជមានរបស់ខ្លួន។ លោក រដ្ឋមន្ត្រីរុស្សីបន្តថា រុស្ស៊ីគ្មានចង់បានអ្វីក្រៅពីសម្ព័ន្ធភាពប្រកបដោយសមភាពជាមួយអាមេរិកនោះទេ ដើម្បីរក្សាស្ថិរភាពសកលលោកសម័យថ្មី។ ក្នុងន័យនេះ លោក Serguei Lavrov ចង់សំដៅថា មានតែមហាអំណាចពីរទេ គឺអាមេរិក និងរុស្ស៊ី ដែលត្រូវចាប់ដៃគ្នាដើម្បីរក្សាស្ថិរភាពសកលលោក ចំណែកមហាអំណាចលោកខាងលិច រឺអឺរ៉ុបនោះ គឺជារឿងហួសសម័យទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ