លោកស្រីមែរគែល អំពាវនាវកុំឲ្យប្រកាន់ជំហរអត្មានិយម ក្នុងការដោះស្រាយវិបត្តិភេរវកម្ម
ថ្លែងក្នុងសន្និសីទកាសែត ក្រោយជំនួបកំពូលស្តីពីសន្តិសុខអន្តរជាតិ នៅទីក្រុងមុយនិច ប្រទេសអាល្លឺម៉ង់ នៅថ្ងៃសៅរ៍ទី១៨កុម្ភៈនេះ លោកស្រី អង់ហ្គេឡា មែរគែល ប្រមុខរដ្ឋាភិបាលអាល្លឺម៉ង់ បានអំពាវនាវ កុំឲ្យប្រទេសមហាអំណាចទាំងអស់ ប្រកាន់គោលជំហរអត្មានិយម បែបបិទទ្វារនៅតែម្នាក់ឯង។ សម្តីនេះ គឺលោកស្រីមែរគែល បាននិយាយនៅចំពោះមុខ លោកអនុប្រធានាធិបតីអាមេរិក Mike Pence តំណាងឲ្យរដ្ឋាភិបាលអាមេរិកថ្មីរបស់លោកដូណាល់ ត្រាំ។ លោកស្រីមែរគែល ក៏បានថ្លែងផងដែរថា វិបត្តិភេរវកម្ម គឺជាបញ្ហារួម ដែលគ្រប់គ្នាត្រូវរួមគ្នាដោះស្រាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
“ការប្រយុទ្ធប្រឆាំង នឹងបណ្តាញភេរវកម្មអ៊ីស្លាមជ្រុលនិយម គឺជាការងាររួមរបស់យើងគ្រប់គ្នា ព្រោះវាជាប្រយោជន៍រួម”។ នេះគឺជាសម្តីរបស់លោករស្រី អង់ហ្គេឡា មែរគែល អធិកាបតីអាល្លឺម៉ង់ នៅក្នុងសន្និសីទកាសែត ចំពោះមុខមន្ត្រីការទូត និងយោធាធំរបស់ប្រទេសមហាអំណាច។ លោកស្រីមែរគែល បានបន្តថា “រុស្ស៊ីនិងអឺរ៉ុប មិនមែនជាមិត្តស្និតស្នាលនឹងគ្នាទេ តែអឺរ៉ុបនឹងធ្វើគ្រប់យ៉ាង ដើម្បីសហការជាមួយរុស្ស៊ី ក្នុងការប្រយុទ្ធប្រឆាំងនឹងបណ្តាញភេរវកម្មអ៊ីស្លាម តែមិនមែនមានន័យថា សហភាពអឺរ៉ុប ត្រូវចុះញ៉មរុស្ស៊ី ក្នុងសំណុំរឿងផ្សេងទៀតនោះទេ”។
ថ្លែងនៅចំពោះមុខលោក អនុប្រធានាធិបតីអាមេរិក លោកស្រីមែរគែល មិនខ្លាចនឹងនិយាយបែបបញ្ចើចបញ្ចើរ ទៅលើលោកដូណាល់ ត្រាំ ប្រធានាធិបតីថ្មីរបស់អាមេរិកទេ។ លោកស្រីមែរគែលនិយាយថា “ចង់ប្រយុទ្ធនឹងអំពើភេរវកម្ម ដោយបិទទ្វារព្រំដែនចំពោះប្រជាជនមកពីប្រទេសកាន់សាសនាអ៊ីស្លាម គឺជារឿងមួយដែលយល់ច្រឡំ ព្រោះសាសនាអ៊ីស្លាម មិនមែនជាអ្នកទទួលខុសត្រូវ ចំពោះអំពើភេរវកម្មទេ”។ លោកស្រី បានសង្កត់ធ្ងន់ថា “ចង់បោសសំអាតបណ្តាញភេរវកម្មអ៊ីស្លាមជ្រុលនិយម គឺយើងត្រូវការជាចាំបាច់ សហការជាមួយប្រទេសអ៊ីស្លាមធំៗ”។
ទាក់ទិនទៅនឹងបញ្ហាសន្តិសុខនេះ លោកស្រីមែរគែល បានអំពាវនាវ ឲ្យប្រទេសធំៗទាំងអស់ ប្រកាន់គោលជំហរប្រយោជន៍រួម និងសហការគ្នា ចៀសវៀងការប្រកាន់គោលគំនិតបែបអត្មានិយម យករួចខ្លួនតែម្នាក់ឯង ដែលនឹងអាចនាំទៅរកការបែកបាក់សាមគ្គី និងការមើលមុខគ្នាមិនត្រង់។
លោកស្រីមែរគែលបញ្ជាក់ថា “សហភាពអឺរ៉ុប មិនអាចដោះស្រាយបញ្ហាសន្តិសុខអន្តរជាតិតែម្នាក់ឯងបានទេ។ សហភាពអឺរ៉ុប ត្រូវការសហរដ្ឋអាមេរិក ដែលជាសម្ព័ន្ធមិត្តជាប្រវត្តិសាស្ត្រ”។ ក្នុងន័យនេះ លោកស្រីមែរគែល បានសន្យាថា និងបន្ថែមថវិកាចំណាយ ទៅលើវិស័យកងទ័ពរបស់អាល្លឺម៉ង់ ព្រមទាំងសន្យាតំឡើងការចូលរួមថវិកានៅក្នុងអង្គការOTANឲ្យបាន២% នៃផលិតផលដុលក្នុងស្រុករបស់អាល្លឺម៉ង់ នៅរវាងឆ្នាំ២០២៤។
ដោយឡែក លោក Mike Pence ដែលមានវត្តមានក្នុងជំនួបកំពូល បានបញ្ជាក់ថា សហប្រតិបត្តិការរវាងសហរដ្ឋអាមេរិក និងសហភាពអឺរ៉ុប ក្នុងក្របខណ្ឌអូតង់ គឺពុំមានអ្វីប្រែប្រួលទេ។ សហរដ្ឋអាមេរិកនៅតែបន្តតួនាទីការពារសន្តិសុខក្នុងតំបន់អាត្លង់ទិកខាងជើង ក៏បន្តែសហរដ្ឋអាមេរិក សំណូមពរឲ្យប្រទេសសាមជិកផ្សេងទៀត ខិតខំចូលរួមផ្នែកថវិកាឲ្យបានច្រើនជាងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ