អាមេរិក កាណាដា និងប្រទេសសហភាពអឺរ៉ុប១៤ប្រទេស នាំគ្នាបណ្តេញមន្ត្រីទូតរុស្ស៊ី
កាលពីថ្ងៃទី៤មីនា អតីតគិញសម្ងាត់របស់អង់គ្លេស ព្រមទាំងកូនស្រីផង ត្រូវបានគេប៉ុនប៉ងធ្វើឃាត ដោយប្រើសារធាតុពុល នៅលើទឹកដីអង់គ្លេស។ រដ្ឋាភិបាលអង់គ្លេស ក៏ដូចជាសហភាពអឺរ៉ុប បានចោទប្រកាន់ដោយចំហរ ថារដ្ឋាភិបាលរុស្ស៊ី ដែលមានលោកប្រធានាធិបតីពូទីនជាមេដឹកនាំ គឺជាអ្នកបញ្ជា ឲ្យធ្វើអំពើនេះ។ កាលពីថ្ងៃចន្ទ ទី២៦មីនា មានប្រទេសសហភាពអឹរ៉ុប យ៉ាងហោចណាស់១៤ប្រទេស ដែលបានសម្រេច បណ្តេញមន្ត្រីការទូតរុស្ស៊ី ចេញពីប្រទេសគេរៀងៗខ្លួន ដើម្បីជាការដាក់ទោស ទៅលើសកម្មភាពរបស់រុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
អង់គ្លេស ដែលជាប្រទេសសាម៉ី ព្រោះរឿងរ៉ាវនេះ បានកើតឡើងនៅលើទឹកដីខ្លួននោះ បានសម្រេចកាលពីសប្តាហ៍មុន ដោយបានបណ្តេញមន្ត្រីការទូតរុស្ស៊ី ចំនួន២៣នាក់ ចេញពីទឹកដីអង់គ្លេស។ បន្ទាប់មកទៀត សហភាពអឺរ៉ុប បានសម្រេចនៅក្នុងជំនួបកំពូលរបស់ខ្លួនថា ត្រូវរួមគ្នា ថ្កោលទោសរុស្ស៊ី ព្រោះរឿងរ៉ាវនេះ គេជឿជាក់ថា គឺជាស្នាដៃបង្គាប់បញ្ជា របស់រដ្ឋាភិបាលលោកពូទីន។
ថ្ងៃចន្ទទី ២៦ មីនា ការសម្រេចបានប្រកាសចេញជាបន្តបន្ទាប់ ដែលជារួម មានប្រទេសសមាជិកសហភាពអឺរ៉ុប ចំនួន១៤ប្រទេស បានសម្រេចបណ្តេញមន្ត្រីទូតរុស្ស៊ី។ ក្នុងនោះមានជាអាថទិ៍ បារាំង និងអាល្លឺម៉ង់ បានសម្រេចបណ្តេញចេញ ចំនួន៤នាក់ ដោយទុកពេលឲ្យចាកចេញ ក្នុងមួយសប្តាហ៍ទៀត។ ក្រៅពីនេះ មានអ៊ីតាលី ដាណឺម៉ាក លីទុយអានី ប៉ូឡូញក៏បានរួមគ្នា បណ្តេញមន្ត្រីទូតរុស្ស៊ី២នាក់ ចេញពីប្រទេសពួកគេផងដែរ។ ចំណែក ប្រទេសអ៊ុយក្រែន ដែនជាព្រំដែន រវាងរុស្ស៊ី និងសហភាពអឺរ៉ុបនោះ បានសម្រេចបណ្តេញមន្ត្រីទូតរុស្ស៊ី ចំនួន១៣នាក់។
សូមរំលឹកថា លោក Sergueï Skripal ព្រមទាំងកូនស្រី ត្រូវបានជនមិនស្គាល់មុខប៉ុនប៉ងធ្វើឃាត នៅឯទីក្រុង Salisbury ភាគខាងត្បូងប្រទេសអង់គ្លេស។ ភ្លាមៗ ក្រោយហេតុការណ៍នេះ អ្នកស៊ើបអង្កេតអង់គ្លេស បានដាក់ការសង្ស័យ ថាជាស្នាដៃរបស់គេញសម្ងាត់របស់រុស្ស៊ី។ លោក Jean-Yves Le Drian រដ្ឋមន្ត្រីក្រសួងការបរទេសបារាំង បានលើកឡើងថា ទង្វើដែលរុស្ស៊ី បញ្ជាមនុស្សឲ្យមកធ្វើឃាត អតីតគិញសម្ងាត់ នៅលើទឹកដីសហភាពអឺរ៉ុប គឺជារឿងមួយ ដែលបានគំរាមកំហែងទាំងស្រុង ដល់សន្តិសុខផ្ទៃក្នុង ហើយវាក៏បានរំលោភបំពាន ដល់ច្បាប់អន្តរជាតិដែរ។
គួរកត់សម្គាល់ថា ៣សប្តាហ៍ ក្រោយកើតរឿងនេះ លោកខាងលិច និងរុស្ស៊ី កំពុងតែពាក់មុខយក្សដាក់គ្នា ហើយចោទគ្នាទៅវិញទៅមក មិនខុសពីកាលជំនាន់សង្រ្គាមត្រជាក់ឡើយ។ ក្រៅពីប្រទេសនៅសហភាពអឺរ៉ុប អាមេរិកនិងកាណាដា ក៏បានចូលរួមថ្កោលទោសរុស្ស៊ីដែរ។ កាណាដា បានសម្រេចបណ្តេញតំណាងការទូតរុស្ស៊ី ចំនួន៤នាក់។ នៅថ្ងៃចន្ទ ទី២៦មីនាដែរ សហរដ្ឋអាមេរិក បានប្រកាសបណ្តេញមន្ត្រីទូតរុស្ស៊ីចំនួន ៦០នាក់ ព្រមទាំងបិទស្ថានកុងស៊ុលរុស្ស៊ី ប្រចាំក្រុងSeattle ថែមទៀតផង។ ក្នុងចំណោម៦០នាក់ ដែលអាមេរិកបណ្តេញចេញនោះ គឺមាន១២នាក់ ជាមន្ត្រីទូតរុស្ស៊ី ប្រចាំការនៅអង្គការសហប្រជាជាតិ។
ដោយឡែក បើយោងតាមទីភ្នាក់ងារព័ត៌មានរុស្ស៊ី RIA បានផ្សាយថា សមាជិកព្រឹទ្ធសភារុស្ស៊ីម្នាក់ បាននិយាយថា រុស្ស៊ី នឹងបណ្តេញមន្ត្រីការទូតអាមេរិកចំនួន៦០នាក់វិញ ដើម្បីជាការឆ្លើយតប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ