មេដឹកនាំតំបន់កាតាឡូញ៉ា សន្យាប្រកាសឯករាជ្យ ដោយអត្តនោម័តក្នុងពេលដ៏ឆាប់
ចុះផ្សាយនៅថ្ងៃ៖
ស្តាប់ - ០៧:១០
ការបោះឆ្នោតប្រជាមតិ កាលពីថ្ងៃអាទិត្យ នៅតំបន់កាតាឡូញ៉ា ប្រទេសអេស្ប៉ាញ កំពុងបន្តធ្វើឲ្យអេស្ប៉ាញ ធ្លាក់ទៅក្នុងវិបត្តិយ៉ាងជ្រៅ។ នគរបាលអេស្ប៉ោញ កាលពីថ្ងៃអាទិត្យបានបង្រ្កាបក្រុមបាតុករទាមទារឯករាជ្យ យ៉ាងចាស់ដៃ ដែលរូបភាពហិង្សាទាំងនេះ ត្រូវបានគេចែកចាយ ពាសពេញបណ្តាញសង្គម។ កាលពីយប់ថ្ងៃអង្គារនេះ ព្រះមហាក្សត្រអេស្ប៉ាញ ដែលធ្លាប់តែស្ងាត់ស្ងៀម បានចេញមកថ្លែងសន្ទរកថា ថ្កោលទោសរដ្ឋបាលតំបន់កាតាឡូញ៉ា ថាបានបង្កវិបត្តិ និងបំបែកបំបាក់ជាតិអេស្ប៉ាញ។ តែយ៉ាងណា ភ្លាមៗក្រោយសន្ទរកថារបស់មហាក្សត្រអេស្ប៉ាញ មេដឹកនាំទាមទារឯករាជ្យកាតាឡូញ៉ា បានអះអាងថា គេនឹងប្រកាសឯករាជ្យជាផ្លូវការ ក្នុងពេលដ៏ឆាប់នេះ។
ព្រះមហាក្សត្រអេស្ប៉ាញ ទ្រាំស្ងៀមលែងបាន
ជាគោលការណ៍ព្រះមហាក្សត្រ ត្រូវតែឯករាជ្យ មិនកាន់ជើងខាងណាមួយទេ។ ដូច្នេះហើយបានជាកន្លងមកនេះ ព្រះចៅ Felipe ទី៦ នៅស្ងៀម មិនមានយោបល់អ្វីទេ ។ តែកាលពីថ្ងៃអង្គារ ព្រះអង្គបានសម្រេចចិត្តធ្វើអន្តរាគមន៍ ក្នុងនាមព្រះអង្គជា អ្នកការពាររដ្ឋធម្មនុញ្ញ ការពារស្ថិរភាព និងបូរណភាពដែនដី របស់ប្រជាជាតិអេស្ប៉ាញទាំងមូល។
ព្រះមហាក្សត្រអេស្ប៉ាញ បានថ្លែងថា “ការធ្វើប្រជាមតិ ដែលដឹកនាំដោយក្រុមទាមទារឯករាជ្យកាតាឡូញ៉ា ទាំងដោយគ្មានការអនុញ្ញាត ជាផ្លូវការនោះ គឺជាអំពើបំពាន ដល់រដ្ឋធម្មនុញ្ញអេស្ប៉ាញ បំពានដល់ការរួបរួមជាតិ និងជាអំពើល្មើស ធ្វើឲ្យបែកបាក់សាមគ្គីជាតិ ដែលមិនអាចទទួលយកបានជាដាច់ខាត”។ ព្រះអង្គបន្តថា “ប្រជាមតិខុសច្បាប់ និងសកម្មភាពតវ៉ា ដឹកនាំដោយមេដឹកនាំផ្តាច់ខ្លួនកាតាឡូញ៉ានេះ នឹងបង្កឲ្យមានអស្ថិរភាពដល់តំបន់កាតាឡូញ និងប្រទេសអេស្ប៉ាញមួយទាំងមូល”។
ព្រះចៅ Felipe បន្ថែមថា “ដូច្នេះ ដើម្បីប្រឈមមុខនឹងសកម្មភាពល្មើសនេះ អាជ្ញាធរស្របច្បាប់របស់រដ្ឋអេស្ប៉ាញ នឹងប្រកាន់ជំហររឹងមាំ ក្នុងការចាត់វិធានការនានា ដើម្បីធានាការពារ សណ្តាប់ធ្នាប់ សន្តិសុខ និងស្ថិរភាព និងឯកភាពជាតិ ដែលត្រូវបានការពារដោយរដ្ឋធម្មនុញ្ញ អេស្ប៉ាញ”។
មាត្រា១៥៥ នៃរដ្ឋធម្មនុញ្ញអេស្ប៉ាញ
បើតាមការវិភាគ គឺព្រះមហាក្សត្រអេស្ប៉ាញ ចង់សំដៅទៅដល់ ការអនុវត្តមាត្រា ១៥៥ នៃរដ្ឋធម្មនុញ្ញអេស្ប៉ាញ។ មាត្រានេះកំណត់ថា រដ្ឋាភិបាល មានសិទ្ធិចាប់បង្ខំអាជ្ញាធរនៅតំបន់ស្វយ័តណាមួយ ក្នុងករណីតំបន់នោះបានបំពានរដ្ឋធម្មនុញ្ញ ហើយធ្វើឲ្យប៉ះពាល់ធ្ងន់ធ្ងរ ដល់ផលប្រយោជន៍ជាតិ។ ក្នុងន័យនេះ គឺរដ្ឋាភិបាលកណ្តាល អាចមានសិទ្ធិគ្រប់គ្រងជាបណ្តោះអាសន្ន ចន្លោះពី៦ខែ ទៅ១ឆ្នាំ ពីលើស្ថាប័នធំៗ នៅតាមតំបន់ដែលបង្កបញ្ហា។
បើសិនជារដ្ឋាភិបាលអេស្ប៉ាញ សម្រេច អនុវត្តមាត្រា ១៥៥នេះមែន គឺនេះជាលើកទីមួយហើយ ក្នុងប្រវត្តិសាស្ត្រអេស្ប៉ាញ។ រហូតមកទល់ពេលនេះ លោក Mariano Rajoy នាយករដ្ឋមន្ត្រីអេស្ប៉ាញ នៅមិនទាន់បានប្រកាសអ្វីទេ ទាក់ទិននឹងវិធានការ ដែលព្រះមហាក្សត្រ បានថ្លែងនេះ។ តាមការគ្រោងទុក លោកនាយករដ្ឋមន្ត្រីអេស្ប៉ាញ ត្រូវចូលទៅសភា នៅសប្តាហ៍ក្រោយ ដើម្បីស្វែងរកការគាំទ្រពីសភា។ លោក នាយករដ្ឋមន្ត្រីអេស្ប៉ាញ ធ្លាប់បានអះអាងដែរថា លោកនឹងមិនចាត់វិធានការពិសេសណាមួយ ដើម្បីគ្រប់គ្រងជាបណ្តោះអាសន្ន ទៅលើតំបន់កាតាឡូញ៉ា ទេ បើសិនជាគ្មានសភានៅពីក្រោយ គាំទ្រលោក។ បញ្ហាចោទត្រង់នេះទៀត គឺថា ក្រុមសមាជិកសភាមួយចំនួន កំពុងតែស្ទើរស្ទាក់ មិនដឹងគាំទ្ររដ្ឋាភិបាល ឬគាំទ្រតំបន់កាតាឡូញ៉ាទេ។
កាតាឡូញ៉ា នឹងប្រកាសឯករាជ្យក្នុង២ថ្ងៃទៀត ទោះអេស្ប៉ាញមិនព្រមក៏ដោយ!
លោក Carles Puigdemont ដែលជាមេដឹកនាំ នៃការធ្វើប្រជាមតិផ្តាច់ខ្លួននេះ បានផ្តល់បទសម្ភាន៍ឲ្យទូរទស្សន៍ BBC កាលពីយប់មិញថា ពីរថ្ងៃទៀត ក្រុមលោក និងប្រកាសឯករាជ្យតំបន់កាតាឡូញ៉ា ជាផ្លូវការហើយ បន្ទាប់ពីបានដឹងលទ្ធផលប្រជាមតិផ្លូវការ។ គាត់ថា រដ្ឋាភិបាលអេស្ប៉ាញ មិនអាចមកហាមឃាត់គេបានទេ ព្រោះវាជាសិទ្ធិរបស់ប្រជាជនតំបន់កាតាឡូញ៉ា។ មេដឹកនាំទាមទារផ្តាច់ខ្លួនរូបនេះ បានបន្តថា ផ្ទុយទៅវិញ បើរដ្ឋាភិបាលអេស្ប៉ាញ សម្រេចបញ្ជូនកំលាំង មករារាំង ពួកគេ នោះរដ្ឋាភិបាលនេះ នឹងកាន់តែស្អុយឈ្មោះ ហើយវាក៏កាន់តែជំរុញទឹកចិត្ត ប្រជាជនកាតាឡូញ៉ា ឲ្យកាន់តែចង់បានឯករាជ្យឡើង។
សន្ទរកថារបស់ព្រះមហាក្សត្រ ដូចយកសាំងមកជះលើភ្លើង
ជាការពិតមែន អ្នកវិភាគជាច្រើន បានលើកឡើងថា អន្តរាគមន៍របស់ព្រះមហាក្សត្រអេស្ប៉ាញ ដែលបានថ្លែងថ្កោលទោសការធ្វើប្រជាមតិ ហើយគំរាមអនុវត្តមាត្រា ១៥៥នៃរដ្ឋធម្មនុញ្ញនោះ គឺប្រៀបបាននឹងយកសាំង មកជះលើភ្លើងដូច្នេះ។ ក្នុងកាលៈទេសៈបែបនេះ មហាក្សត្រ គួរណា តែអំពាវនាវ ឲ្យមានការយោគយល់ រំងាប់កំហឹង ធ្វើចិត្តឲ្យស្ងប់ ដើម្បីស្វែងរកច្រកនយោបាយមួយ តាមរយៈការចរចាគ្នា។ តែផ្ទុយទៅវិញ ព្រះអង្គបែរជាថ្កោលទោសការធ្វើប្រជាមតិ។
សម្រាប់ប្រជាជនកាតាឡូញ៉ា ដែលបានទៅបោះឆ្នោតកាលពីថ្ងៃអាទិត្យ គឺមិនខុសពីមហាក្សត្រថ្កោលទោសពួកគេទេ។ បញ្ហានេះ វាបានជំរុញ ឲ្យពួកគេកាន់តែខឹង និងពុះកញ្ជ្រោល។ រីឯអ្នក ដែលធ្លាប់តែស្ទើរស្ទាក់ មិនចង់គាំទ្រការផ្តាច់ខ្លួននេះ អាចនឹងសម្រេចចិត្តគាំទ្រការទាមទារឯករាជ្យ ព្រោះគេយល់ថា មហាក្សត្រអេស្ប៉ាញ មិនបានយល់ស្ថានការណ៍លំបាក របស់គេ នៅតែក្នុងវាំងស្រណុកស្រួល ហើយមកថ្លែងថ្កោលទោសគេទៀត។ ជាងនេះទៅទៀត ក្នុងសន្ទរកថា របស់មហាក្សត្រ ព្រះអង្គមិនបានលើកឡើង អំពីបាតុករជាង៩០នាក់ ដែលរងរបួសធ្ងន់ ដោយសារតែការបង្រ្កាប ដ៏សាហាវ របស់នគរបាលអេស្ប៉ាញ កាលពីថ្ងៃអាទិត្យនោះទេ។ ត្រង់នេះ បានធ្វើឲ្យសាធារណៈមតិកាតាឡូញ៉ា កាន់តែមិនពេញចិត្តព្រះអង្គ ហើយស្អប់រដ្ឋាភិបាលអេស្ប៉ាញខ្លាំងឡើង។
ប្រជាមតិ មិនមានសុពលភាពស្របច្បាប់?
បើយើងនិយាយពីសុពលភាពស្របច្បាប់ នៃប្រជាមតិនេះ គឺថាមានចំណុចច្រើនណាស់ ដែលយើងអាចយកមកពិភាក្សាបាន។ ទីមួយ វាជាការរៀបចំបោះឆ្នោតប្រជាមតិ ដោយគ្មានការយល់ព្រម ពីអំណាចកណ្តាលរបស់អេស្ប៉ាញ។ ពោលគឺសភា និងថ្នាក់ដឹកនាំតំបន់ស្វយ័តកាតាឡូញ៉ា ជាអ្នកសម្រេចធ្វើតែម្នាក់ឯង។
ទីពីរ ការបោះឆ្នោតនេះ ពុំមានបញ្ជីរាយនាម អ្នកមានសិទ្ធិបោះឆ្នោតទេ ហើយក៏គ្មាន គណកម្មការរៀបចំការបោះឆ្នោត ឬអ្នកសង្កេតការណ៍ណាចូលរួម ត្រួតពិនិត្យដែរ។ ដូច្នេះ ភាពសុក្រិត្យយុត្តិធម៌ នៃដំណើរការបោះឆ្នោតនេះ មិនត្រូវបានធានានោះទេ។ ហើយទីបី គឺចំនួនអ្នកចូលរួមបោះឆ្នោត ដែលយើងលើកមកនិយាយបាន។ ក្រុមទាមទារឯករាជ្យអះអាងថា គេបានសម្លេងឆ្នោតគាំទ្រ ដល់ទៅ៩០%។ តែធាតុពិត គឺ៩០% នៃប្រជាជនដែលបានទៅចូលរួមបោះឆ្នោតប៉ុណ្ណោះ។ ហើយអ្នកដែលទៅចូលរួមបោះឆ្នោត កាលពីថ្ងៃអាទិត្យ គឺមានតែជាង៤៣% ប៉ុណ្ណោះ ដែលស្មើនឹង ២,២៦លាននាក់។ ដូច្នេះ លទ្ធផលប្រជាមតិនេះ មិនអាចសម្តែងពីសម្លេងពិតប្រាកដ នៃបំណងរបស់ប្រជាជនកាតាឡូញ៉ាបានទេ។
អាសាច់ជូនខ្លា ទើបនៅសុខបាន!
ប្រជាមតិ មានសុពលភាពឬុមិនមាន គឺជារឿងមួយ។ តែដំណោះស្រាយពេលនេះ គឺមានតែមួយគត់ គឺត្រូវស្វែងរកការចរចា គ្នា។ តាមពិតទៅ អេស្ប៉ាញ គួរណាតែធ្វើកំណែទម្រង់រដ្ឋធម្មនុញ្ញ ជាយូរណាស់មកហើយ ដើម្បីរៀបចំប្រព័ន្ធវិមជ្ឈការ បែងចែកអំណាចទៅដល់តំបន់ទាំងអស់ ឲ្យបានល្អប្រសើរ និងឆ្លើយតបទៅនឹងស្ថានភាពជាក់ស្តែង។ គេមិនត្រូវទុកបញ្ហា ឲ្យក្លាយជាបែបនេះទេ។
នៅល្ងាចនេះ សភា នៃសហភាពអឺរ៉ុបនឹងបើកប្រជុំ ដើម្បីស្វែងរកគោលជំហរ ទាក់ទិននឹងបញ្ហាអេស្ប៉ាញនេះ។ តែបើតាមការស្មាន អឺរ៉ុប ប្រាកដជាប្រកាន់ជំហរនៅខាងរដ្ឋាភិបាលអេស្ប៉ាញ ហើយអំពាវនាវ ឲ្យភាគីទាំងពីរ ដាក់គូទអង្គុយចរចាគ្នា។
តែយ៉ាងណា ភាគីម្ខាងៗ កំពុងសង្រ្កឺតធ្មេញដាក់គ្នាក្នុងពេលនេះ។ រដ្ឋាភិបាលគំរាមប្រើកំលាំង ដើម្បីគ្រប់គ្រងតំបន់កាតាឡូញ៉ា រីឯក្រុមសហជីពធំៗ នានា បានចាប់ផ្តើមធ្វើកូដកម្ម។ ប្រជាជនប្រាកដជាចុះផ្លូវធ្វើបាតុកម្មទៀត ទៅតាមការអំពាវនាវ របស់ក្រុមផ្តាច់ខ្លួន។ វិបត្តិនេះ អាចមិនទាន់ចប់ភ្លាមៗទេ បើសិនជារដ្ឋាភិបាលអេស្ប៉ាញ មិនព្រមធ្វើសម្បទាននយោបាយខ្លះទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ