ម៉ូស្គូឲ្យភ្លើងខៀវ ដល់ការពង្រាយ កងកម្លាំងរក្សាសន្តិភាព នៅតំបន់ខាងកើតអ៊ុយក្រែន
លោកប្រធានាធិបតីរុស្ស៊ី វ៉្លាឌីមៀរ ពូទីន បានថ្លែងយល់ព្រមចំពោះ ការពង្រាយ កងកម្លាំងរក្សាសន្តិភាព សម្រាប់ការពារពួកអ្នកសង្កេតការណ៍ របស់ អង្គការដើម្បីសន្តិសុខ និងសហប្រតិបត្តិការនៅទ្វីបអឺរ៉ុប OSCE លើដែនដីតំបន់ខាងកើតអ៊ុយក្រែន ដែលញាំញីដោយការផ្ទុះអាវុធ គ្មានឈប់ រវាងកងទ័ពរដ្ឋាភិបាលអ៊ុយក្រែន និង ពួកបះបោរផ្តាច់ទឹកដី ដែលរុស្ស៊ីនិយម។
ចុះផ្សាយនៅថ្ងៃ៖
ស្តាប់ - ០២:១៩
“ ខ្ញុំយល់ថាជាការសមគួរ បើសិនជាមានវត្តមាននៃកងកម្លាំងរក្សាសន្តិភាព ឫ និយាយឲ្យចំ គឺក្រុមអ្នកដែលធានា សុវត្ថិភាពដល់បេសកកម្ម នៃអង្គការដើម្បីសន្តិសុខនិងសហប្រតិបត្តិការនៅទ្វីបអឺរ៉ុប OSCE ហើយ ខ្ញុំមិន ឃើញមានអ្វីជាអាក្រក់ទេ”។ សេចក្តីនេះ ថ្លែងដោយលោកពូទីន ក្នុងសន្និសីទសារពត៏មាន នៅក្រុង Xiamen ប្រទេសចិន បិទបញ្ចប់ ជំនួបកំពូល នៃក្រុម៥ប្រទេសមានសេដ្ឋកិច្ចលូតលាស់ដោយចង្វាក់ខ្ពស់ BRICS។
“ផ្ទុយទៅវិញ ខ្ញុំគិតថា ការនេះនឹងជួយដល់ដំណោះស្រាយបញ្ហា នៅតំបន់អាគ្នេយ៏អ៊ុយក្រែន “ លោកពូទីន គូសបញ្ជាក់ទាំងផ្ទុកផ្តាក់ ក្រសួងការបរទេសគាត់ ឲ្យដាក់ជូនអង្គការសហប្រជាជាតិពិនិត្យមើល និងពង្រាងនូវសេចក្តីសម្រេច ក្នុងន័យដែលមាន។
គួរនិយាយថា ក្រុងគៀវតាំងពីយូរមកហើយ តែងសុំឲ្យបញ្ជូនកងកម្លាំងរក្សាសន្តិភាព ប៉ុន្តែចង់ឲ្យ កងកម្លាំង នេះ ពង្រាយ នៅពេញលើតំបន់ជម្លោះតែម្តង។ តាមលោកពូទីន កងកម្លាំងនេះ ត្រូវដាក់ឲ្យប្រចាំការ តែ ដើម្បី”ធានាសន្តិសុខ”ដល់បេសកកម្ម OSCE ហើយតែនៅតាម “ខ្សែដែលខ័ណ្ឌ” ទីតាំងពួកឧទ្ទាម និង ទីតាំងកងទ័ពអ៊ុយក្រែន តែប៉ុណ្ណោះ។
សម្រាប់ក្រុងគៀវ ប្រតិបត្តិការប្រភេទនេះ ត្រូវ “ប្រមើលនូវការដករាល់តែយោធា បរទេសណាដែលថាកាន់កាប់” តំបន់នេះ ហើយ”ធានានូវការត្រួតត្រាយ៉ាងកក់ក្តៅ លើព្រំដែនរុស្ស៊ី-អ៊ុយក្រែន ដើម្បី បញ្ចៀសកុំឲ្យមាន ការជ្រៀតចូលពីខាងរុស្ស៊ី ទៅក្នុងតំបន់បះបោរនោះ ដូចជាការបញ្ជូនទាហាន អាវុធ សម្ភារៈ និង ពួកយុទ្ធជនស្ម័គ្រចិត្តរុស្ស៊ី ជាដើម។
សព្វថ្ងៃមានអ្នកសង្កេតការណ៍ OSCE ប្រមាណ ៦០០ នាក់ បំពេញភារកិច្ចខាងតាមដាន ដំណើរគោរព តាមកិច្ចព្រមព្រៀងឈប់បាញ់ ដោយភាគីបដិបក្ខនោះ។ កាលពីចុងខែមេសា សហការីម្នាក់របស់ OSCE ជា ជាតិអាមេរិកាំង បានធ្លាក់ខ្លួនស្លាប់ ក្នុងការផ្ទុះមីន ក្នុងពេលបំពេញប្រតិបត្តិការល្បាត។
ទោះបីមានចុះកិច្ចព្រមព្រៀងឈប់បាញ់ច្រើនដងក្តី ក៏ការប៉ះទង្គិចគ្នា រវាងភាគីបដិបក្ខ តែងប្រព្រឹត្ត ទៅជារឿយៗ ដោយម្ខាងចោទម្ខាងទៀត ថាជាអ្នករំលោភ។ សម្រាប់អ៊ុយក្រែន និងប្រទេសលោកខាងលិច គឺរុស្ស៊ីដែលជាអ្នកគាំទ្រផ្លូវយោធា ដល់ក្រុមឧទ្ទាម។ យោងតាមតួលេខអង្គការសហប្រជាជាតិ ក្នុង៣ឆ្នាំ៦ខែកន្លងទៅ សង្រ្គាមនេះ បានផ្តាច់ជីវិតមនុស្សអស់ជាង ១ម៉ឺននាក់ ទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ