ក្បួនព្យុហយាត្រារបស់កងទ័ពអាហ្រ្វិក នៅChamps Elyséesបង្កឲ្យមានការរិះគន់
កងពលអាហ្វ្រិកមកពី១៣ប្រទេសបានដើរដង្ហែក្បួនក្នុងថ្ងៃបុណ្យជាតិ បារាំង ១៤ កក្កដា ដែលរៀបចំឡើងនៅរុក្ខវិថី Champs Elysées ក្នុងទីក្រុងប៉ារីស។ ជាលើកទីមួយ បារំាងបានអញ្ជើញ ប្រទេសអតីតស្ថិតនៅក្រោមអាណានិគមរបស់ខ្លួនឲ្យមកចូលរួមក្នុងថ្ងៃ បុណ្យជាតិ និងព្រមទាំងអនុញ្ញាតឲ្យក្រុមប្រទេសអាហ្រ្វិកទាំងនោះធ្វើពិធី រំលឹកខួប ៥០ឆ្នាំ នៃឯករាជ្យភាពរបស់ខ្លួន។ ការរៀបចំពិធីបុណ្យឯករាជ្យរបស់អាហ្រ្វិកក្នុងបុណ្យជាតិបារាំង និងវត្តមានកងទ័ពរបស់ប្រទេសអាហ្រ្វិកផ្តាច់ការ មួយចំនួន បានបង្កឲ្យមានគំនិតរិះគន់យ៉ាងសម្បើមក្នុងប្រទេសបារាំង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍ របស់ឈាង បុប្ផា
នៅលើវេទិកាគណអធិបតី គេឃើញមានប្រមុខដឹកនាំ១២ រូបនៃបណ្តាប្រទេសអាហ្រ្វិក អង្គុយក្នុងជួរជាមួយប្រធានាធិបតីបារាំង លោក Nicolas Sarkozy ចំណែក នៅលើរុក្ខវិថី Champs Elysées ឯណោះវិញ កងទ័ពអាហ្រ្វិកមកពី១៣ប្រទេសមានមោទនភាព ដែលបានចូលរួមដើរដង្ហែក្បួន ជាមួយកងពលបារាំង។
ជាផ្លូវការ បារាំងអញ្ជើញអាហ្រ្វិកឲ្យមកដើរដង្ហែរក្បួនក្នុងថ្ងៃបុណ្យជាតិរបស់ខ្លួន គឺក្នុងន័យដឹងគុណដល់កងទ័ពអាហ្រ្វិក។ កងទ័ពអាហ្រ្វិកដែលធ្លាប់ស្ថិតនៅក្រោមការគ្រប់គ្រងរបស់អាណានិគមបារាំង ធ្លាប់ចូលរួមជួយបារាំងច្បាំងក្នុងអំឡុងសង្រ្គាមលោក។ ក្នុងសប្តាហ៍នេះដែរ លោកប្រធានាធិបតីបារាំងបានបញ្ជាក់ថា អតីតយុទ្ធជនបរទេសដែលធ្លាប់ជួយច្បាំងការពារបារាំង នឹងទទួលបា្រក់សោធននិវត្តន៍ស្មើនឹងអតីតអ្នកប្រយុទ្ធបារាំង។
ក្នុងបំណងពង្រឹងទំនាក់ទំនងបារាំងអាហ្រ្វិកលើកនេះ ប្រធានាធិបតីបារាំងបានអញ្ជើញក្រុមប្រទេសអាហ្រ្វិកទាំងអស់ ១៤ ប៉ុន្តែអវត្តមានថ្នាក់ដឹកនាំពីររូប គឺប្រធានាធិបតីប្រទេសម៉ាដាហ្កាស្កាដែលអន្តរជាតិមិនទទួលស្គាល់ និងប្រធានាធិបតីCôte d’ivoireដែលបដិសេធមិនមកចូលរួម។ អ្នកជំនាញពន្យល់ថា អវត្តមាននេះមក ពី មូលហេតុនយោបាយ។ គេគួរដឹងថា ទំនាក់ទំនងបារាំង និងCôte d’ivoireនៅតែមានភាពល្វីងជូរចត់ បន្ទាប់ពីបារាំងបានវាយប្រហារយ៉ាងចាស់ដៃ បំផ្លាញហេដ្ឋារចនាសម្ព័ន្ធ និងមូលដ្ឋានទ័ពអាកាសCôte d’ivoire ក្នុងអំឡុងសង្គ្រាមស៊ីវិលក្នុងប្រទេសនេះ នា ឆ្នាំ២០០៤។
Côte d’ivoireដែលបដិសេធមិនចូលរួមក្នុងក្បួនព្យុហយាត្រាក្នុងប្រទេសបារាំងមានការមិនពេញចិត្តផងដែរ ដែលប្រទេសអាហ្វ្រិកដទៃទៀតសុខចិត្តរៀបចំពិធីបុណ្យរំលឹកខួបថ្ងៃឯករាជ្យរបស់ខ្លួនក្នុងប្រទេសបារាំង។ បារាំងដែលធ្លាប់ធ្វើជាម្ចាស់អាណានិគមរបស់ខ្លួន។ អគ្គរដ្ឋទូត Côte d’ivoire ប្រចាំប្រទេសបារាំងវាយតម្លៃថា គំនិតផ្តួចផ្តើម និងបំណងរបស់បារាំងមានលក្ខណៈមិនច្បាស់លាស់។
ម្យ៉ាងវិញទៀត រដ្ឋាភិបាលបារាំងទទួលការរិះគន់ផងដែរពីក្រុមសង្គមស៊ីវិលមួយចំនួន នៅពេលដែលបារាំងបានអញ្ជើញទាហានអាហ្រ្វិកដូចជា ទាហានពីប្រទេសTchad Togo និងពីCongo Brazzaville មកចូលរួមក្នុងថ្ងៃបុណ្យជាតិបារាំង។ អង្គការសិទ្ធិមនុស្សបាននិយាយរិះគន់ថា បារាំងកំពុងអនុញ្ញាតឲ្យទាហានឃោឃៅសម្លាប់មនុស្ស និងផ្តាច់ការរបស់ប្រទេស Congo Brazzaville និងទាហានកុមាររបស់ប្រទេសTchad ដើរក្បួន ក្នុងថ្ងៃបុណ្យជាតិបារាំង៕
{{ scope.legend }}
© {{ scope.credits }}ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ