IMF ប្រកាសកាលបរិច្ឆេទក្នុងការជ្រើសរើសអគ្គនាយកថ្មីជំនួសលោក Dominique Strauss-Kahn
នៅថ្ងៃសុក្រ ទី ២០ ឧសភាម្សិលមិញ លោក Dominique Strauss-Kahn អតីតអគ្គនាយកមូលនិធិរូបិយវត្ថុអន្តរជាតិ (IMF) បានចាកចេញពីពន្ធនាគារ ឆ្ពោះទៅកាន់លំនៅឋានមួយក្នុងទីក្រុងញូវយ៉ក។ គឺជាលំនៅឋានមួយដែលមានការឃ្លំាមើលដោយកាមេរ៉ាវីដេអូ ២៤ម៉ោង លើ ២៤ម៉ោង និងមានអ្នកយាមម្នាក់ប្រដាប់ដោយអាវុធ។ ការជាប់ឃុំនៅក្នុងលំនៅឋាននឹងអនុញ្ញាតឲ្យលោក Strauss-Kahn អាចត្រៀមសំណុំរឿងដើម្បីការពារខ្លួននៅក្នុងសវនាការនាថ្ងៃទី ៦ មិថុនាខាងមុខ។ ទន្ទឹមគ្នា មូលនិធិរូបិយវត្ថុអន្តរជាតិកំពុងស្វែងរកអគ្គនាយកថ្មីជំនួសលោក Strauss-Kahn ដែលទើបលាឈប់ពីមុខតំណែង។ កាលបរិច្ឆេទសម្រាប់ចុះឈ្មោះជាបេក្ខជនប្រមុខ FMI ត្រូវបានប្រកាសជាផ្លូវការហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ក្រុមប្រឹក្សាភិបាលនៃមូលនិធិរូបិយវត្ថុអន្តរជាតិទើបបានប្រកាសជាផ្លូវការថា ឥស្សរជនណាដែលមានបំណងចង់អង្គុយកៅអីអគ្គនាយកមូលនិធិរូបិយវត្ថុអន្តរជាតិនៅទីក្រុងវ៉ាស៊ីនតោន ត្រូវដាក់ពាក្យចាប់ពីថ្ងៃច័ន្ទ ទី២៣ ឧសភា រហូតដល់ថ្ងៃសុក្រ ទី១០ មិថុនា។ បន្ទាប់មក នៅក្នុងចំណោមបេក្ខជនទំាងអស់ដែលដាក់ពាក្យ ក្រុមប្រឹក្សាភិបាលនឹងធ្វើការជជែក ពិភាក្សា និងជ្រើសរើសយកតែបេក្ខជនចំនួន ៣រូបប៉ុណ្ណោះ។ បន្តមកទៀត សមាជិកទំាង ២៤រូបនៃក្រុមប្រឹក្សាភិបាល IMF នឹងធ្វើការសាកសួរលើបេក្ខជនម្នាក់ៗក្នុងចំណោមបេក្ខជនទំាង ៣រូបនោះ។ មូលនិធិរូបិយវត្ថុអន្តរជាតិសង្ឃឹមថា គេនឹងអាចរកឃើញរូបអគ្គនាយកថ្មី ចាប់ពីពេលនេះ ដល់ដំណាច់ខែមិថុនាខាងមុខ។
រហូតមកដល់ពេលនេះ សង្រ្គាមដណ្តើមតំណែងអគ្គនាយកមូលនិធិរូបិយវត្ថុអន្តរជាតិបានចាប់ផ្តើមហើយ ដោយមានឥស្សរជនមកពីគ្រប់ជ្រុងជ្រោយទំាងអស់ ពិសេសមកពីបណ្តាប្រទេសដែលកំពុងមានសេដ្ឋកិច្ចរីកលូតលាស់ខ្លំាង ដូចយ៉ាងប្រទេសឥណ្ឌា ម៉ិចស៊ិច រុស្ស៊ី ឬមួយក៏ប្រទេសអាហ្វ្រិកខាងត្បូងជាដើម។ បណ្តាប្រទេសទំាងនេះបាននិងកំពុងចេញមុខប្រឆំាងនឹងសហភាពអឺរ៉ុបដែលរហូតមកទល់ពេលនេះ បានកាន់កាប់តំណែងអគ្គនាយក IMF សឹងតែផ្តាច់មុខទៅហើយ។
ប្រសិនបើអឺរ៉ុបបានឯកភាពគ្នាលើបេក្ខជនរបស់ខ្លួននោះ អឺរ៉ុបមានសំឡេងឆ្នោតជាង ១ ភាគ ៣ នៅក្នុងការបោះឆ្នោត។ ក៏ប៉ុន្តែ បើអាមេរិក និងជប៉ុនរួមដៃគ្នាគំាទ្របេក្ខជនរបស់គេវិញ អឺរ៉ុបប្រាកដជាជួបការលំបាកជាមិនខាន។
យ៉ាងណាក៏ដោយ ខណៈនេះ លោកស្រី Christine Lagarde ដែលបច្ចុប្បន្នជារដ្ឋមន្រ្តីក្រសួងសេដ្ឋកិច្ចបារំាង អាចនឹងត្រូវសហភាពអឺរ៉ុបជ្រើសយកជាបេក្ខនារីរបស់ខ្លួន។ ប៉ុន្តែពេលនេះ លោកស្រី Christine Lagarde កំពុងជាប់រឿងក្តីនៅឯតុលាការបារំាងពាក់ព័ន្ធនឹងសំណុំរឿងលោក Bernard Tapie។
ដូច្នេះ បើរឿងក្តីក្តំានេះមិននំាឲ្យរំខានដល់ការឈរឈ្មោះរបស់លោកស្រី និងបើសហរដ្ឋអាមេរិកមិនចេញមុខជំទាស់នឹងបេក្ខនារីរបស់អឺរ៉ុបទេនោះ លោកស្រី Christine Lagarde អាចនឹងឡើងអង្គុយកៅអីអគ្គនាយកមូលនិធិរូបិយវត្ថុអន្តរជាតិនៅទីក្រុងវ៉ាស៊ីនតោន ក្នុងរយៈពេលជាង ១ខែទៀតខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ