កិច្ចព្រមព្រៀងរវាងក្រិក និងអ្នកផ្តល់មូលនិធិពាក់ព័ន្ធនឹងផែនការត្បិតត្បៀតថ្មី
អ្នកដឹកនាំអឺរ៉ុបដែលមកចូលរួមប្រជុំជំនួបកំពូលនៅទីក្រុងព្រុចសែល បានសន្យានៅថ្ងៃព្រហស្បតិ៍ទី២៣មិថុនាម្សិលមិញ ឲ្យមាន “ផែនការត្បិតត្បៀតថ្មី”មួយសម្រាប់ជួយស្រោចស្រង់ប្រទេសក្រិកឲ្យចៀសផុតពីធនក្ស័យនិងដើម្បីកុំឲ្យវិបត្តិហិរញ្ញវត្ថុនេះរីករាលដាលដល់ប្រទេសដទៃទៀតនៃតំបន់ប្រើប្រាក់អឺរ៉ូ។ ជាថ្នូរប្តូរនឹងជំនួយហិរញ្ញវត្ថុនេះ ទីក្រុងអាថែនត្រូវតែបន្តអនុវត្តវិធានការត្បិតត្បៀតរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
ប្រទេសក្រិកបានធ្វើការសុំជាផ្លូវការហើយនូវ “ផែនការជំនួយថ្មី”ពីសហភាពអឺរ៉ុបនិងពីមូលនិធីរូបិយវត្ថុអន្តរជាតិ FMI ។ ក៏ប៉ុន្តែទីក្រុងអាថែនត្រូវធ្វើយ៉ាងណាឲ្យសភាក្រិកអនុម័តជាមុនសិនចាប់ពីពេលនេះទៅទល់ចុងខែមិថុនា នូវវិធានការត្បិតត្បៀតថ្មីមួយចំនួន ទើបគេព្រមផ្តល់ជំនួយវគ្គចុងក្រោយនៃ “ផែនការទី១ជួយស្រោចស្រង់ប្រទេសក្រិក”ដែលមានចំនួនទឹកប្រាក់១១០ពាន់លានអឺរ៉ូដែលគេបានអនុម័តកាលពីឆ្នាំទៅ។
ហេតុដូច្នេះហើយ បានជាលោក Geoerges Papandréou នាយករដ្ឋមន្ត្រីនៃប្រទេសក្រិកបានអញ្ជើញមកធ្វើការបញ្ជាក់ដើម្បីឲ្យអ្នកដឹកនាំអឺរ៉ុបមានទំនុកចិត្តកក់ក្តៅ ដោយបានអះអាងថា រដ្ឋាភិបាលក្រិកបានប្តេជ្ញាចិត្តថា នឹងអនុវត្តតាមវិធានការត្បិតត្បៀតនិងធ្វើកំណែទម្រង់ ដើម្បីធ្វើឲ្យសេដ្ឋកិច្ចនិងហិរញ្ញវត្ថុនៃប្រទេសក្រិកស្គាល់ស្ថិរភាពឡើងវិញ ទោះបីជាប្រទេសក្រិកត្រូវធ្វើពលិកម្មយ៉ាងណាក៏ដោយ។
ជាថ្នូរប្តូរមកវិញ ទីក្រុងអាថែនសង្ឃឹមថា អ្នកផ្តល់ជំនួយនឹងរៀបចំឲ្យមានយ៉ាងឆាប់រហ័សនូវ “ផែនការជំនួយទីពីរដើម្បីជួយស្រោចស្រង់ប្រទេសក្រិក” នៅខែកក្កដាខាងមុខនេះ។ “ផែនការជំនួយទីពីរ”នេះ អាចមានចំនួនទឹកប្រាក់លើសពី១០០ពាន់លានអឺរ៉ូ ហើយនឹងមានសហភាពអឺរ៉ុបនិងមូលនិធីរូបិយវត្ថុអន្តរជាតិ FMI ជាអ្នកផ្តល់ជំនួយហិរញ្ញវត្ថុដ៏ច្រើនសន្ធឹកសន្ធាប់នេះឲ្យប្រទេសក្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ