សភាបារាំងពិភាក្សាគ្នាពីការទទួលស្គាល់ប៉ាឡេស្ទីនជារដ្ឋពេញសិទ្ធិ
នៅថ្ងៃសុក្រទី២៨ វិច្ឆិកានេះ រដ្ឋសភាបារំាង ដោយមានការស្នើរសុំពីសំណាក់តំណាងរាស្រ្ត មកពីគណបក្សសង្គមនិយម បានចាប់ផ្តើមធ្វើការពិភាក្សាគ្នា មុននឹងឈានទៅដល់ការបោះឆ្នោតមួយ នៅថ្ងៃ ២ ធ្នូ ដើម្បីទទួលស្គាល់ដែនដីប៉ាឡេស្ទីន ជាប្រទេសពេញសិទ្ធិ មានឯករាជ្យបរិបូរណ៍។ ទោះបីយ៉ាងណា បើសភាបោះឆ្នោតយល់ព្រមមែន ការទទួលស្គាល់នេះ គ្រាន់តែជាការទទួលស្គាល់ជានិមិត្តរូបប៉ុណ្ណោះ វាមិនបានប៉ះពាល់ ដល់គោលជំហររបស់រដ្ឋាភិបាលបារាំងឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
វាជាការទទួលស្គាល់ជានិមិត្តរូបមែនពិត ប៉ុន្តែការទទួលស្គាល់នេះ មានតម្លៃខ្លាំងណាស់ សំរាប់ប្រជាជនប៉ាឡេស្ទីនរាប់លានអ្នក ដែលទន្ទឹងរងចាំសន្តិភាព អស់ពេលជាយូរមកហើយ។ ប្រជាជនប៉ាឡេស្ទីន នឹងមានសង្ឃឹមថា បារាំងនិងប្រជាជាតិផ្សេងទៀតនៅអឺរ៉ុប នឹងមិនទុក ប៉ាឡេស្ទីនចោលទេ។
ជាការពិតណាស់ ការពិភាក្សាគ្នារបស់តំណាងរាស្រ្តក្នុងសភាបារំាង ដែលចាប់ផ្តើមនៅថ្ងៃសុក្រទី ២៨ វិច្ឆិកានេះ មិនបានធ្វើឡើងដោយស្ងាត់ស្រួលនោះទេ។ ក្នុងចំណោមអ្នកនយោបាយបារាំង មកពីគ្រប់គណបក្ស មានការខ្វែងគំនិតគ្នា អ្នកខ្លះយល់ថាទង្វើនេះវានឹងមិនបានផលប្រយោជន៍អ្វីទាំងអស់ ក្រៅតែពីបង្កការថ្នាក់ថ្នាំងចិត្តជាមួយអ៊ីស្រាអែល ហើយចាក់អ៊ីស្រាអែល ឲ្យកាន់តែខឹង។ តែតាមមតិអ្នកខ្លះវិញយល់ថា ទោះបីការទទួលស្គាល់នេះមានលក្ខណៈ ជានិមិត្តរូបមែនពិត ប៉ុន្តែវាសរបង្ហាញអំពីឆន្ទៈរបស់ស្ថាប័នរដ្ឋសភាបារាំង ដែលឈរលើគោលការណ៍តែមួយ គឺចង់ឃើញដែនដីប៉ាឡេស្ទីន ក្លាយជាប្រទេសពេញលេញដូចគេដូចឯង ហើយសង្គ្រាមកាន់កាប់ទឹកដី ជាមួយអ៊ីស្រាអែល នឹងត្រូវបញ្ចប់។ រដ្ឋសភាធ្វើនេះ គ្រាន់តែជាការអញ្ជើញប៉ុណ្ណោះ គោលជំហរយ៉ាងណា គឺអាស្រ័យលើរដ្ឋាភិបាលបារំាងផ្ទាល់ ជាអ្នកសម្រេច។
សូមបញ្ជាក់ថា ស៊ុយអែដជាប្រទេសទីមួយនៅអឺរ៉ុប ដែលបានប្រកាសទទួលស្គាល់ប៉ាឡេស្ទីន ជារដ្ឋឯករាជ្យ។ ភ្លាមៗអ៊ីស្រាអែល បានដកទូតចេញពីស៊ុយអែដ។ សភាអង់គ្លេស និង អេស្ប៉ាញ ក៏បានធ្វើការសម្រេចចិត្តរួមមួយដែរ ក្នុងការទទួលស្គាល់ប៉ាឡេស្ទីន ជាប្រទេសពេញសិទ្ធិ។ ទង្វើរបស់សភាបារាំងនាពេលនេះ បានបញ្ឆេះកំហឹងអ៊ីស្រាអែលកាន់តែខ្លាំង ហើយបានតិះដៀលបារាំងថា មិនព្រមបើកភ្នែកមើល វិបត្តិនៅតំបន់មជ្ឈឹមបូព៌ា យកពេលមកចំណាយចោលលើរឿងឥតប្រយោជន៍។ អ៊ីស្រាអែលរិះគន់ តំណាងរាស្រ្តបារំាងថា កាន់តែជើងប៉ាឡេស្ទីន ហើយពេលដែលពួកភេរវករប៉ាឡេស្ទីន ចូលទៅសម្លាប់ប្រជាជនអ៊ីស្រាអែល៤នាក់ នៅក្នុងវិហារស៊ីណាហ្គក យ៉ាងស្រស់ៗ ម្តេចមិនលើកឡើងមកនិយាយផង?
រហូតមកដល់ពេលនេះ មានប្រទេស១២៣ហើយ ដែលទទួលស្គាល់ដែនដីប៉ាឡេស្ទីនជាប្រទេសពេញសិទ្ធិ។ ចាប់តាំងពីឆ្នាំ២០១២ មក ប៉ាឡេស្ទីនក្លាយជាប្រទេសសង្កេតការណ៍នៅអង្គការសហប្រជាជាតិ តែមិនមែនជាសមាជិកពេញសិទ្ធិទេ។ លោក ឡូរ៉ង់ ហ្វាប៊្យូស រដ្ឋមន្រ្តីការបរទេសបារាំង បានថ្លែងឲ្យដឹងថា បារាំងនឹងលៃលកធ្វើយ៉ាងណា ដាក់ស្នើទៅក្រុមប្រឹក្សាសន្តិសុខអង្គការសហប្រជាជាតិ ដើម្បីធ្វើសេចក្តីសម្រេចចិត្តរួមមួយ ជាផ្លូវការ ដើម្បីទទួលស្គាល់រដ្ឋប៉ាឡេស្ទីន នៅឆ្នាំ២០១៦យ៉ាងយូរ បើសិនជាភាគីទាំងពីរ អ៊ីស្រាអែល-ប៉ាឡែស្ទីន នៅតែ មិនស្រុះស្រួលគ្នាតាមរយៈការចរចា។
គោលជំហររបស់សភា និងរដ្ឋាភិបាលបារាំងនាពេលនេះ បង្ហាញថា បារាំងចង់ដើរតួនាទីនាំមុខក្នុងការស្វែងរកសន្តិភាពរវាង អ៊ីស្រាអែល-ប៉ាឡែស្ទីន ជំនួសឲ្យសហរដ្ឋអាមេរិក ដែលបានបរាជ័យម្តងហើយម្តងទៀត ហើយពេលនេះ បើសិនជាមានការបោះឆ្នោតនៅក្រុមប្រឹក្សាសន្តិសុខ អាមេរិក ក៏ប្រហែលជានឹងមិនបោះឆ្នោតវ៉េតូទេមើលទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ