អឺរ៉ុបនិងអូតង់នាំគ្នារំលឹកខ្លាំងអំពីកម្លាំងទ័ព ដើម្បីសម្លុតរុស្ស៊ីឬ?!
ចុះផ្សាយនៅថ្ងៃ៖
ស្តាប់ - ០៤:១២
ប៊ុលហ្ការី រ៉ូមានី តួកគី ប្រទេសជាសមាជិកអង្គការអូតង់តាមបណ្តោយសមុទ្ទខ្មៅ បានចូលរួម ជាមួយសមាជិកបួនប្រទេសផ្សេងទៀត របស់អង្គការសម្ព័ន្ធអាត្លង់ទិក ធ្វើសមយុទ្ធជើងទឹក នៅក្នុងសមុទ្ទខ្មៅ មិនឆ្ងាយប៉ុន្មានពីជ្រោយគ្រីមេ ដែលរុស្ស៊ីចាប់យកធ្វើជារណបកាលពីឆ្នាំទៅ។ ទន្ទឹមគ្នានេះ នៅខាងអឺរ៉ុបវិញ គណៈកម្មការអឺរ៉ុបបានប្រកាសចង់ឱ្យសហភាពអឺរ៉ុបបង្កើតកងទ័ពរួម។ ដំណោះស្រាយតាមផ្លូវការទូតមិនសូវបានលទ្ធផល ដល់វេលាដែលអឺរ៉ុបនិងសម្ព័ន្ធមិត្តអូតង់ ត្រូវបង្ហាញសាច់ដុំកំញោញរុស្ស៊ីឬយ៉ាងណា ?
ក្នុងពេលដែលអឺរ៉ុបនិងរុស្ស៊ី កំពុងប្រឈមដាក់គ្នាយ៉ាងតានតឹង ប្រធានគណៈកម្មការអឺរ៉ុបបានបង្ហាញឆន្ទៈចង់ឱ្យសហភាពអឺរ៉ុបបង្កើតកម្លាំងកងទ័ពរួម មានរចនាសម្ព័ន្ធយោធាថ្នាក់សហភាព មិនមែនកំរិតត្រឹមមាននយោបាយសន្តិសុខនិងការពារជាតិរួមគ្នា តែកងទ័ពស្ថិតក្រោមអំណាចប្រទេសរៀងៗខ្លួនឡើយ។ នេះមិនមែនជាគំនិតថ្មីថ្មោងឡើយ ! ជាង៦០ឆ្នាំហើយដែលសហគមន៍អឺរ៉ុបចង់មានប្រព័ន្ធការពារជាតិរួម តែមិនបានសម្រេច។ មានប្រទេសតិចណាស់ ដែលសុខចិត្តបូព៌ាបូរណភាពជាតិទៅបង្កើតសហព័ន្ធយោធាថ្នាក់អឺរ៉ុបនោះ។ អ្នកខ្លះ ហ៊ានទាំងអះអាងថាវាជាការស្រមើស្រមៃ ភាន់ភ្នែកជ្រុលពេកហើយ ! រហូតមកទល់នឹងពេលនេះ កម្លាំងកងទ័ពរបស់អឺរ៉ុបហាក់បែងចែកជាក្រុមជាពួកខ្លាំងណាស់ ៖ មានក្រុមប្រទេសធំៗ បារាំងអាល្លឺម៉ង់ មួយក្រុមដឹកមុខដោយអង់គ្លេស ឯក្រុមប្រទេសតូចៗវិញពឹងពំនាក់អាស្រ័យលើអូតង់ច្រើន មិនចង់ជ្រកក្រោមផ្លាកសហភាពអឺរ៉ុបមិនប្រាកដប្រជាឡើយ។
ប៉ុន្តែនៅលើកនេះ ជាមួយបរិបទតានតឹងជាមួយម៉ូស្គូ អឺរ៉ុបអាចប្តូរគំនិតចាប់គិតគូរជាថ្មីឡើងវិញ ទេដឹង?! បើតាមអំណះអំណាងរបស់លោកប្រធានគណៈកម្មការអឺរ៉ុប បើអឺរ៉ុបមានកម្លាំងទ័ពរួម នោះរុស្ស៊ីនឹងមើលអឺរ៉ុបក្នុងក្រសែភ្នែកផ្សេង ឯចំណាយថវិកាផ្នែកការពារជាតិក៏អស់តិចសម្រាប់សមាជិកទាំង២៨។
អូតង់ក៏ភ្ញាក់ស្មារតីដែរ ! តាំងពីវិបត្តិនៅអ៊ុយក្រែនបានផ្ទុះឡើង ក្រុមសមាជិកអឺរ៉ុបនៅភាគខាងកើត និងជាខ្លះអតីតសហភាពសូវៀតផង បានងាកទៅរកការការពារពីអាមេរិក ដើម្បីគេចខ្លួនពីការគំរាមកំហែងរបស់រុស្ស៊ី។ អូតង់ បានរកឃើញតួនាទីដើម វិលមកដើរតួនាទីជាអ្នកការពារសមូហភាព ពីការឈ្លានពានរបស់អ្នកក្រៅ។ អូតង់ បានរៀបចំធ្វើសមយុទ្ធជាញឹកញយនៅភាគខាងកើតអឺរ៉ុប ដើម្បីកាត់បន្ថយក្តីព្រួយបារម្ភរបស់ប្រទេសជាសមាជិក។ តាំងពីថ្ងៃអង្គារទី ១០មីនាមក នាវាមីស៊ីលអាមេរិក នាវាចម្បាំង នាវាមុជទឹករបស់សមាជិកសម្ព័ន្ធអូតង់ ៦ប្រទេសផ្សេងទៀត បូកបន្ថែមដោយការចូលរួមរបស់ប៊ុលហ្ការី រ៉ូមានី និងតួកគី ព្រមទាំងកាណាដា អាល្លឺម៉ង់ និងអ៊ីតាលី បានមកប្រមូលផ្តុំគ្នាក្នុងសមុទ្ទខ្មៅ ជាកិច្ចចាប់ផ្តើមសមយុទ្ធជើងទឹករួមគ្នា។
ជាអតីតប្រទេសជំនិតនឹងសហភាពសូវៀត ប៊ុលហ្ការី បានក្លាយជាសមាជិកអូតង់នៅឆ្នាំ២០០៤ និងបានចូលរួមជាពិសេសក្នុងសមយុទ្ធលើកនេះ ក្នុងលំហាត់ត្រៀមប្រយុទ្ធតបតនឹងការវាយប្រហារតាមផ្លូវអាកាសនិងក្រោមទឹក។ ម្យ៉ាងវិញទៀត កងទ័ពអាមេរិកប្រមាណជាងបីរយនាក់ រថក្រោះ៧៥០គ្រឿង រថយន្ត សម្ភារៈយោធាជាច្រើនទៀត បានបញ្ជូនទៅដល់ប្រទេសលីទុយអានី ក្នុងក្របខ័ណ្ឌសមយុទ្ធ ការពារសម្ព័ន្ធមិត្តក្នុងតំបន់ ដែលព្រួយបារម្ភនឹងការគំរាមកំហែងរុស្ស៊ី។
ក៏ប៉ុន្តែសម្រាប់រុស្ស៊ី ទង្វើរបស់អូតង់ និងសហរដ្ឋអាមេរិកថ្ងៃនេះ គឺជាការបង្កហេតុសុទ្ធសាធ ! ជាទង្វើដែលមិនធានាដល់ស្ថិរភាព និងដំណើរការសន្តិភាពនៅអ៊ុយក្រែនសោះ។ បើអូតង់គ្មានទំនុកចិត្តលើរុស្ស៊ីទៅហើយ ម៉ូស្គូមានតែត្រូវបង្ខំចិត្តចាត់វិធានការតបវិញឱ្យបានសក្តិសម។ នេះបើសម្តីនាយកដេប៉ាតឺម៉ង់សម្រាប់កិច្ចសហប្រតិបត្តិការជាមួយអឺរ៉ុបនៃក្រសួងការបរទេសរុស្ស៊ី។
រុស្ស៊ីបានប្រកាសភ្លាមនៅថ្ងៃអង្គារដកខ្លួនចេញពីគណៈកម្មាធិការត្រួតពិនិត្យគោរពសន្ធិសញ្ញាស្តីពី យោធានៅអឺរ៉ុប។ ប៉ុន្តែរុស្ស៊ីត្រៀមទៅពិភាក្សាលើសន្ធិសញ្ញាថ្មីដែលឆ្លើយតបទៅនឹងស្ថានភាពពិតនាពេលបច្ចុប្បន្នផងនិងឆ្លើយតបដល់ផលប្រយោជន៍រុស្ស៊ីផង។ អូតង់ខកចិត្ត តែការដកខ្លួនចេញនេះមិនមែនជាការភ្ញាក់ផ្អើលអ្វីឡើង ព្រោះរុស្ស៊ី ដែលជាប្រទេសហត្ថលេខីមួយដែរ បានព្យូរសកម្មភាពរបស់ខ្លួនតាំងពីឆ្នាំ២០០៧មកម្ល៉េះ។
សន្ធិសញ្ញាត្រួតពិនិត្យអាវុធអឺរ៉ុបនេះ ដែលត្រូវបានចុះហត្ថលេខានៅទីក្រុងប៉ារីស នៅឆ្នាំ១៩៩០ ដោយតំណាងសមាជិកអូតង់ទាំង២២ និងកត្តិការសញ្ញាក្រុងវ៉ាសូវី មានកំណត់អំពីកំរិតនៃអាវុធយុទ្ធភណ្ឌ រថក្រោះ រថពាសដែក ឧទ្ធម្ភាគចក្រ យន្តហោះចម្បាំង ឬកាំភ្លើងធុនធ្ងន់ ដែលរដ្ឋនីមួយៗអាចដាក់ពង្រាយក្នុងតំបន់នៃដែនឥទ្ធិពលរបស់សន្ធិសញ្ញា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ