អូតង់ពង្រឹងកម្លំាងនៅអឺរ៉ុបខាងកើត ដោយបង្កើតកម្លំាងទ័ពថ្មីចំនួន ៥ ០០០នាក់ និងអគ្គបញ្ជាការដ្ឋានថ្មីចំនួន ៦កន្លែង
នៅថ្ងៃព្រហស្បតិ៍ ទី៥ មករា អង្គការអូតង់បានសម្រេចពង្រឹងកម្លំាងការពារនៅប៉ែកខាងកើត ដោយបង្កើតកម្លំាងទ័ពថ្មីចំនួន ៥ ០០០នាក់ និងអគ្គបញ្ជាការដ្ឋានថ្មីចំនួន ៦ នៅក្នុងបណ្តាប្រទេសអឺរ៉ុបខាងកើតដែលជាអតីតរដ្ឋក្នុងសម័យសហភាពសូវៀត។ ការសម្រេចយ៉ាងដូចនេះត្រូវបានធ្វើឡើងនៅក្នុងទីក្រុងព្រុចសែល ប្រទេសបែលហ្ស៊ិក នាសម័យប្រជុំថ្នាក់រដ្ឋមន្រ្តីការពារជាតិរបស់ប្រទេសសមាជិកអង្គការអូតង់។ គោលដៅ គឺដើម្បីប្រឈមទប់នឹងមហិច្ឆតាវាតទី ក៏ដូចជាការគំរាមកំហែងរបស់ប្រទេសរុស្ស៊ីនៅក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
កម្លំាងទ័ពថ្មីរបស់អង្គការអូតង់ដែលមានគ្នាចំនួន ៥ ០០០នាក់នេះត្រូវបានគេហៅថា ជាកម្លំាងប្រតិកម្មរហ័ស និងដែលអាចផ្តើមប្រតិបត្តិការនៅឆ្នំា ២០១៦ ខាងមុខ។ មកដល់ពេលនេះ មាន ៦ប្រទេស គឺបារំាង អាល្លឺម៉ង់ អ៊ីតាលី ប៉ូឡូញ អេស្បាញ និងប្រទេសអង់គ្លេសដែលបានប្រកាសចូលរួមនៅក្នុងកម្លំាងថ្មីនោះមុនគេ។ លោកអគ្គលេខាធិការអូតង់ Jens Stoltenberg បានប្រាប់ឲ្យដឹងថា កម្លំាងប្រតិកម្មរហ័សដែលមានគ្នាប្រមាណជា ៥ ០០០នាក់នោះ គឺជាទ័ពថ្មើរជើងសុទ្ធសាធ តែនឹងមានការជួយគំាទ្រពីកម្លំាងទ័ពជើងអាកាស និងជើងទឹកនៅក្នុងករណីចេញប្រតិបត្តិការ។ ការបង្កើតឲ្យមានកម្លំាងទ័ពថ្មីអូតង់បានធ្វើឡើង ចំពេលដែលរុស្ស៊ីកំពុងបន្តគំរាមវាតទីនៅអឺរ៉ុបខាងកើត ពិសេសនៅក្នុងប្រទេសអ៊ុយក្រែនសព្វថ្ងៃ។
តែដើម្បីកុំឲ្យរុស្ស៊ីក្តៅក្រហាយ មូលដ្ឋានរបស់កម្លំាងទ័ពថ្មើរជើងអូតង់នឹងត្រូវបោះទីតំាងនៅអឺរ៉ុបប៉ែកខាងលិច តែត្រូវចូលរួមសមយុទ្ធនៅក្នុងបណ្តាប្រទេសនៅអឺរ៉ុបខាងកើតដែលអតីតរដ្ឋក្នុងសម័យសហភាពសូវៀត។ ក្រៅពីត្រៀមខ្លួនដើម្បីអន្តរាគមន៍នៅក្នុងដែនដីអឺរ៉ុប កម្លំាងទ័ពថ្មីអូតង់ក៏នឹងអាចចូលទៅអន្តរគមន៍នៅក្នុងតំបន់អាហ្រ្វិកខាងជើង និងតំបន់ដើមបូព៌ាដែរ។ ទន្ទឹមនឹងការបង្កើតកម្លំាងទ័ពថ្មី អង្គការអូតង់ក៏បានសម្រេចបង្កើតអគ្គបញ្ជាការដ្ឋានថ្មីចំនួន ៦ នៅក្នុងប្រទេសប៊ុលហ្គារី អេស្តូនី ឡេតូនី លីទុយអានី ប៉ូឡូញ និងប្រទេសរូម៉ានីដែលសុទ្ធសឹងជាអតីតរដ្ឋក្នុងសម័យសហភាពសូវៀត។
លោក Jens Stoltenberg បានបញ្ជាក់ថា ការបង្កើតអគ្គបញ្ជាការដ្ឋាននៅក្នុងអតីតរដ្ឋក្នុងសម័យសហភាពសូវៀត គឺដើម្បីផ្តល់ភាពកក់ក្តៅដល់ប្រទេសក្បែរខាងរុស្ស៊ីទំាងនោះនៅចំពោះមុខការគំរាមកំហែងរបស់ក្រុងម៉ូស្គូ។ ប្រមុខអង្គការអូតង់រូបនេះដដែលបានបន្ថែមថា ក្នុងករណីដែលមានវិបត្តិថ្មី កម្លំាងជាតិរបស់ប្រទេសពាក់ព័ន្ធ រួមនឹងកម្លំាងអូតង់អាចនឹងចេញប្រតិបត្តិការរួមគ្នាភ្លាមៗជាបន្ទាន់។ យោងតាមលោក Jens Stoltenberg នេះជាការពង្រឹងកម្លំាងការពារដ៏សំខាន់មួយដែលអូតង់មិនធ្លាប់បានធ្វើទេ គិតតំាងពីការបញ្ចប់សង្រ្គាមត្រជាក់មកដល់បច្ចុប្បន្ន និងថា វាជាការឆ្លើយតបចំពោះការគំរាមកំហែងរបស់រុស្ស៊ីដែលបានរំលោភបំពានច្បាប់អន្តរជាតិដោយចូលទៅយកដីគ្រីមេរបស់អ៊ុយក្រែន និងដែលកំពុងព្យាយាមត្របាក់យកតំបន់ប៉ែកខាងកើតអ៊ុយក្រែនទៀតនៅពេលនេះ។
ទាក់ទងនឹងការសុំជំនួយអាវុធរបស់ពីរដ្ឋាភិបាលអ៊ុយក្រែនដើម្បីប្រឈមទប់នឹងពួកឧទ្ទាមបះបោរ លោក Jens Stoltenberg បានគូសបញ្ជាក់ជាថ្មីថា អង្គការអូតង់អត់មានអាវុធក្នុងដៃទេ និងបានទម្លាក់រឿងនេះទៅឲ្យប្រទេសសមាជិកអូតង់ជាសម្រេចចិត្តរៀងៗខ្លួន។ តែនៅក្នុងកិច្ចប្រជុំក្នុងទីក្រុងព្រុចសែល មានរដ្ឋមន្រ្តីការពារជាតិនៃប្រទេសសមាជិកអូតង់ជាច្រើនបានបង្ហាញជំហរជំទាស់នឹងការបញ្ជូនអាវុធឲ្យអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ