បោះឆ្នោតក្រុមប្រឹក្សាខេត្ត ៖ គណបក្សស្តាំជ្រុលនិយមកំពុងចាក់ឬសជាចរន្តទីបីនៃនយោបាយបារាំង
នៅថ្ងៃអាទិត្យទី ២២ មីនា ម្សិលមិញ បារាំងបានរៀបចំបោះឆ្នោតក្រុមប្រឹក្សាខេត្តជុំទីមួយ។ ជុំទីពីរនឹងប្រព្រឹត្តទៅថ្ងៃអាទិត្យសប្តាហ៍ក្រោយ។ លទ្ធផលបណ្តោះអាសន្នដំបូង បានបង្ហាញថាគណបក្សស្តាំនិយមUMP ដែលដឹកនាំដោយលោកនីកូឡា សាកូហ្ស៊ី (អតីតប្រធានាធិបតីបារាំង) បាននាំមុខគេ។ គណបក្សសង្គមនិយម PS ដែលកំពុងកាន់អំណាចវិញ បានបាត់សំឡេងយ៉ាងច្រើន។ ប៉ុន្តែអ្វីគួរឱ្យកត់សម្គាល់ខ្លាំងគឺគណបក្សស្តាំជ្រុលនិយម FN បានកើនសំឡេងខ្លាំងមិនធ្លាប់មាន មកឈរនៅលំដាប់ទីពីរ។ ឯអត្រាអ្នកចូលរួមបោះឆ្នោតក៏ខ្ពស់។
ចុះផ្សាយនៅថ្ងៃ៖
ស្តាប់ - ០៦:១៥
គណបក្សស្តាំនិយមUMP ដែលមានលោកនីកូឡា សាកូហ្ស៊ី (Nicola Sarkozy) ជាប្រធាន កំពុងនាំមុខគេ ដោយបានទទួលសំឡេងគាំទ្រប្រមាណ ជា៣៩%។ គណបក្សស្តាំជ្រុលនិយមរបស់លោកស្រី ម៉ារីន ឡឺប៉ែន(Marine Le Pen) ២៥% បានឡើងមកឈរនៅលំដាប់ទីពីរ។ ឯគណបក្សសង្គមនិយមកំពុងកាន់អំណាច និងមានភាពប្រេះឆាក្នុងរង្វង់អ្នកឆ្វេងនិយមដូចគ្នា បានទទួលសំឡេងត្រឹមប្រមាណ ពី ២១ ទៅ ២៥%។ ប៉ុន្តែគណបក្សនេះសង្ឃឹមថានឹងអាចដណ្តើមសំឡេងមកនាំមុខគណបក្សស្តាំជ្រុលនិយមរបស់លោកស្រី ម៉ារីនឡឺប៉ែនវិញ នៅពេលបូកសរុបសំឡេងនិងលទ្ធផលចុងក្រោយ។
លោកនីកូឡាសាកូហ្ស៊ី អតីតប្រធានាធិបតីបារាំង ដែលទើបវិលចូលឆាកនយោបាយ សង្ឃឹមលើលទ្ធផលឆ្នោតនេះហើយ សម្រាប់សាងស្ពានអនាគត។ ជាជោគជ័យដំបូង ក្នុងនាមលោកជាប្រធានបក្ស តែក៏ជាជោគជ័យសម្រាប់រូបលោកផ្ទាល់ដែរ។ ជាមួយលទ្ធផលនេះ លោក នីកូឡា សាកូហ្ស៊ី បានមើលឃើញជាស្រេច ថា “ការប្តូរឆ្លាស់បានមកដល់ហើយ ហើយក៏គ្មានអ្វីអាចទប់ជាប់ដែរ"។ ទាំងរូបលោក ទាំងនាយករដ្ឋមន្ត្រីនៃគណបក្សសង្គមនិយម កំពុងបង្កើនការឃោសនា និងប្រមូលផ្តុំពលរដ្ឋឱ្យទៅបោះឆ្នោតបានកាន់ច្រើនថែមទៀត។ ប៉ុន្តែលោកបដិសេធមិនណែនាំឱ្យសកម្មជននិងអ្នកគាំទ្របក្សUMP បោះឆ្នោតឱ្យបេក្ខជនបក្សសង្គមនិយម ឬ បេក្ខជនបក្សរណសិរ្សទេ ក្នុងករណីបេក្ខជនរបស់បក្សអវត្តមាន ព្រោះម្ខាងមាននយោបាយដែលបក្សចង់ប្រយុទ្ធប្រឆាំង និងម្ខាងទៀតមាននយោបាយខុសគ្នា។
ចាញ់ដោយកិត្តិយស
ការបដិសេធដែលបានធ្វើឱ្យនាយករដ្ឋមន្ត្រីនិងគណបក្សសង្គមនិយមចាត់ទុកថាគ្មានទំនួលខុសត្រូវ។ ផ្ទុយទៅវិញ លោកនាយករដ្ឋមន្ត្រីបានអំពាវនាវ ឱ្យពលរដ្ឋជាម្ចាស់ឆ្នោត ទាំងអស់ ក្នុងនាមជាអ្នកសាធារណរដ្ឋ ទប់ស្កាត់បក្សស្តាំជ្រុលនិយម FN នៅជុំទីពីរ ដោយសុខចិត្តបោះឆ្នោតឱ្យគណបក្សប្រឆាំង UMP ប្រសិនបើគណបក្សសង្គមមិនឈរឈ្មោះ។
លោកនាយករដ្ឋមន្ត្រី ម៉ាណុយអែល វ៉ាល (Manuel Valls)នៃគណបក្សសង្គម ដែលជាអ្នកដឹកនាំឃោសនាផ្ទាល់ បានចេញមុខថ្លែងសុន្ទរកថាក្រោយការប្រកាសលទ្ធផលបឋមភ្លាម លើកសរសើរអំពីលទ្ធផលដែលគណបក្សសង្គមនិយមទទួលបាន ថាជាលទ្ធផលកិត្តិយស។ ជាពិសេសទៅទៀត អ្វីដែលលោករីករាយខ្លាំង គឺមិនបានឃើញគណបក្សស្តាំជ្រុលនិយម FN ក្លាយជាគណបក្សឈ្នះនាំមុខទីមួយ នៅក្នុងប្រទេសបារាំង។ សូមបញ្ជាក់ថា គណបក្សស្តាំជ្រុលនិយមបារាំង បានឡើងប្រជាប្រិយភាពយ៉ាងខ្លាំង នៅក្នុងការបោះឆ្នោតចុងក្រោយ ជាក់ស្តែងការបោះឆ្នោតសភា ការបោះឆ្នោតឃុំសង្កាត់ និងពិសេសការបោះឆ្នោតអឺរ៉ុប ដែលFN បានក្លាយជាបក្សនាំមុខគេ។
ដំណើរឆ្ពោះទៅរកកម្លាំងនយោបាយបីនៅពេលបោះឆ្នោត
អ្នកនយោបាយបារាំងទំនងត្រូវបោះបង់ទម្លាប់ចាស់ ចំណាស់ ជាង៧០ឆ្នាំ ដោយចាប់ទទួលយកទិដ្ឋភាពថ្មី ថានឹងមានបក្សនយោបាយបី ជាគូបក្ខដិបក្ខ ត្រូវប្រកួតប្រជែងគ្នា នៅពេលបោះឆ្នោត។ កម្លាំងនយោបាយបីនេះ គ្មានឆន្ទៈចង់ដឹកនាំប្រទេសរួមគ្នាទេ ហើយក៏ទំនងជាមិនអាចស្វែងរកការព្រមព្រៀងណាមួយជាមួយគ្នាបានឡើយ។ តែទាំងបីនាក់ក៏ទំនងជាអាចអួតអាងទាមទារយកសំឡេងភាគច្រើនដាច់ខាតតែម្នាក់បានទេ។
លទ្ធផលនៃការបោះឆ្នោតក្រុមប្រឹក្សាខេត្តម្សិលមិញជាមេរៀន។ ការបោះឆ្នោតក្រុមប្រឹក្សាខេត្តជាវិញ្ញាសាសាកល្បងចុងក្រោយ មុននឹងឈានដល់ការបោះឆ្នោតជ្រើសរើសប្រធានាធិបតី ឆ្នាំ២០១៧ ដែលគ្រប់បក្សនយោបាយកំពុងផ្តោតចក្ខុរក។ ពីមុនៗមក គេឃើញតែគណបក្សធំៗពីរ ស្តាំនិយមUMP និងឆ្វេងនិយមPS ប្រដេញសំឡេងគ្នា និងឆ្លាស់គ្នាជាប់ឆ្នោត។ ប៉ុន្តែនៅលើកនេះ ថ្វីត្បិតតែFNរបស់លោកស្រី ឡឺប៉ែន មិនឈ្នះឆ្នោតលំដាប់លេខមួយមែន ក៏គណបក្សនេះ បានកើនសំឡេងជាលំដាប់ បានឡើងដល់កំរិតដែលមិនធ្លាប់មានឡើយ ជាពិសេសការបោះឆ្នោតថ្នាក់មូលដ្ឋានយ៉ាងដូច្នេះ។ បើថ្នាក់មូលដ្ឋាន ដែលFN មិនធ្លាប់មានការគាំទ្រផង គ្មានបេក្ខជនទៅឃោសនាបោះឆ្នោតដល់ផង បានលទ្ធផលប៉ុណ្ណឹងហើយ ចុះតើការបោះឆ្នោតជាតិថ្ងៃមុខនឹងកើនឡើងប៉ុណ្ណា ?!
កាលពី៥ឆ្នាំមុន គណបក្សFNមានតំណាងតែម្នាក់គត់បានជាប់ឆ្នោត ! តែនៅលើកនេះ មាន៨នាក់រួចទៅហើយ បានជាប់ឆ្នោតរួច នៅជុំទីមួយ និងកំពុងនាំមុខក្នុងខេត្តជាងសែសិប ត្រូវបន្តប្រកួតប្រជែងនៅជុំទីពីរ។ តើនរណាធ្លាប់គិតស្រម៉ៃយ៉ាងដូច្នេះ កាលពីពីរបីឆ្នាំមុន ! គ្មានទេ ! ហេតុដូច្នេះបានជាលោកស្រីប្រមុខបក្ស ម៉ារីន ឡឺប៉ែន ត្រូវស្រែកយ៉ាងក្តែងៗអំពីជោគជ័យដ៏ត្រចះត្រចង់ និងជាប្រវត្តិសាស្ត្រ នៅថ្ងៃនេះ។ លោកស្រី ម៉ារីន ឡឺប៉ែន កំពុងចាក់ឬសបក្សFNនៅមូលដ្ឋាន ដែលជាស្ពានដ៏ចាំបាច់ ចម្លងលោកស្រីទៅរកការបោះឆ្នោតប្រធានាធិបតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ