ប្រធានាធិបតីតួកគីអ៊ួតថា អឺរ៉ុបទទួលជនភៀសខ្លួន មិនបានច្រើនដូចតួកគី
លោកប្រធានាធិបតីតួកគីដែលកំពុងតែបំពេញទស្សនកិច្ច នៅឥណ្ឌូណេស៊ី បានឆ្លៀតថ្លែងចំអក ឲ្យទៅប្រទេសនៅអឺរ៉ុប ថាបានព្រងើយកណ្តើយ មិនព្រមជួយសង្រ្គោះជនភៀសខ្លួន រាប់ម៉ឺននាក់ បណ្តោយឲ្យពួកគេ លង់ទឹកសមុទ្រស្លាប់។ ខុសពីតួកគី ដែលកន្លងមកនេះ បានទទួលជនភៀសខ្លួន ដល់ទៅ២លាននាក់ ក្នុងទឹកដីរបស់ខ្លួន ដែលភាគច្រើន ជាជនជាតិអ៊ីរ៉ាក់ និងជនជាតិស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ឆ្លៀតក្នុងឱកាស ដែលលោកកំពុងតែបំពេញទស្សនកិច្ចនៅក្នុងទីក្រុងចាការតា រដ្ឋធានីប្រទេសឥណ្ឌូនេស៊ី លោកប្រធានាធិបតីតួកគី អ៊ែកដូហ្គង់ បាននិយាយបែបចំអក ដោយអួតសរសើរពីខ្លួនលោក ហើយបន្តុះបង្អាប់ក្រុមប្រទេសសហភាពអឺរ៉ុប ទាក់ទិនទៅនឹង វិបត្តិជនភៀសខ្លួន។
នៅក្នុងសន្ទរកថា ដែលលោកថ្លែងនៅក្នុងពិធីតាំងបង្ហាញគ្រឿងសព្វាវុធយោធាឥណ្ឌូណេស៊ី លោកអ៊ែកដូហ្កង់ ថ្លែងថា ប្រទេសតួកគីរបស់លោក បានទទួលជនភៀសខ្លួន ដល់ទៅ២លាននាក់ ចំនែកប្រទេសសហភាពអឺរ៉ុបវិញ និយាយមិនត្រូវគ្នា ឱបដៃមើលទុកឲ្យជនភៀសខ្លួន លង់ទឹកស្លាប់រាប់ពាន់នាក់។ លោកបន្តថា ប្រទេសហភាពអឺរ៉ុបទាំងអស់ ទទួលជនភៀសខ្លួន សរុបត្រឹមតែ ២០ម៉ឺននាក់ ប៉ុណ្ណោះ ខណៈដែលតួកគីតែមួយ ទទួលជនភៀសខ្លួន ស៊ីរី ដល់ទៅ ១លាន៧សែននាក់ និងជនភៀសខ្លួនអ៊ីរ៉ាក់ ៣សែននាក់។
ជាការពិតណាស់ ប៉ុន្មានខែចុងក្រោយនេះ វិបត្តិជនភៀសខ្លួនដែលនាំគ្នាគេចចេញពីប្រទេសក្រីក្រ នៅអាហ្វ្រិក និងតំបន់មានសង្គ្រាមនៅដើមបូព៌ា បានធ្វើឲ្យសហភាពអឺរ៉ុប ត្រូវគេរិះគន់ យ៉ាងខ្លាំង។ កាលពីចុងខែមិថុនា ជំនួបកំពូលអឺរ៉ុប ដែលប្រាថ្នាចង់ធ្វើការបែកចែកកូតាគ្នា ឲ្យប្រទេសនីមួយ ទទួលយកជនភៀសខ្លួន ៦ម៉ឺននាក់ ត្រូវបានបរាជ័យ។ ប្រទេសមួយចំនួន ដូចជាអង់គ្លេសជាដើម បានប្រកែកដាច់អហង្ការថា គេមិនទទួលយកជនភៀសខ្លួនជាដាច់ខាត។
យោងតាមតួលេខរបស់អង្គការជនភៀសខ្លួនអន្តរជាតិ OIM គិតពីដើមឆ្នាំ មកត្រឹមដើមខែកក្កដា មាន ជនភៀសខ្លួន ចំនួន១សែន៥ម៉ឺននាក់ ដែលបានធ្វើដំណើរ មកដល់ទឹកដីអឺរ៉ុប ដែលភាគច្រើនលើសលប់ គឺបានមកដល់ទឹកដីអ៊ីតាលី និងក្រិក។ ទោះបីជាយ៉ាងណាក៏ដោយ ករណីជនភៀសខ្លួន មានច្រើននៅប្រទេសតួកកី គឺដោយសារតែប្រទេសនេះមានព្រំដែនជាប់នឹងស៊ិរី។ ហើយម្យ៉ាងទៀត ជនភៀសខ្លួនដែលបានទៅដល់តួកគី គឺគ្រាន់តែ ជាស្ពានឆ្លង ដើម្បីបន្តដំណើរទៅកាន់ប្រទេសអឺរ៉ុប ខាងលិចតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ