សម្តេចប៉ាប ថ្លែងបរិហារអំពើពុករលួយនៅអ៊ីតាលី និងសុំឲ្យបើកទ្វារទទួលជនភៀសខ្លួន
សម្តេចប៉ាប ហ្រ្វង់ស័រ ប្រមុខសង្ឃកាតូលិក ដែលកំពុងមានវត្តមាន នៅទីក្រុងទូរាំង ភាគខាងជើងប្រទេសអ៊ីតាលី ក្នុងឱកាសបុណ្យសាសនាគ្រិះមួយ បានធ្វើឲ្យមានការភ្ញាក់ផ្អើល នៅពេលថ្លែងសន្ទរៈកថា ទៅកាន់គ្រិះបរិស័ទទាំងអស់ ដោយព្រះអង្គបានរិះគន់និងបរិហារដោយចំៗ ពីបញ្ហាអំពើរលួយ និងក្រុមជនទុច្ចរិតម៉ាហ្វីយ៉ា ដែលជាដំបៅសង្គមអ៊ីតាលី។ បន្ថែមពីនេះ ព្រះអង្គបានអំពាវនាវ ឲ្យគ្រប់គ្នា បើកចិត្ត និងបើកទ្វារព្រំដែនទទួលជនភៀសខ្លួន ដែលកំពុងតែដង្ហើយហៅរកជំនួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ឆ្លៀតក្នុងឱកាសពិធីសាសនា នៅក្នុងព្រះវិហារCathédrale Saint Jean Baptiste កណ្តាលទីក្រុងទូរាំង ភាគខាងជើងប្រទេសអ៊ីតាលី សម្តេចប៉ាប ហ្វ្រង់ស័រ បានយកឱកាសនេះ ថ្លែងពីសេចក្តីយល់ឃើញពិតប្រាកដ និងការព្រួយបារម្ភរបស់ព្រះអង្គ ចំពោះមុខស្ថានភាពសង្គមបច្ចុប្បន្ន។
នៅចំពោះមុខ គ្រិះបរិស័ទ ប្រមាណជា៦ពាន់នាក់ ព្រះអង្គបានថ្លែងថា ៖ “ ជនភៀសខ្លួន ដែលចូលមកក្នុងទឹកដីអឺរ៉ុប អាចចូលមកដណ្តើមទីផ្សារការងាររបស់បងប្អូនមែនពិត។ ប៉ុន្តែយើងមិនត្រូវទំលាក់កំហុសលើគ្នាទេ។ ជនភៀសខ្លួនទាំងនោះ គឺជាជនរងគ្រោះ រងគ្រោះដោយសារអំពើអយុតិ្តធម៌ អំពើហិង្សា សង្រ្គាម និងវិបត្តិសេដ្ឋកិច្ច ដែលរុញច្រាន ពួកគេធ្លាក់ក្នុងភាពក្រីក្រ គ្មានជំរើស។ ជីវិតមនុស្ស មិនមែនជាទំនិញ ដែលត្រូវគេចង់ទុក ទុក ចង់ចោល ចោល តាមតែចិត្តនោះទេ”។
បន្ទាប់ពីសម្លេងកងរំពង ទះដៃអបអររបស់មនុស្សម្នា ដែលមកឈរស្តាប់ សម្តេចសង្ឃបានបន្តសន្ទរៈកថា ដោយបានលើកឡើង ពីដំបៅសង្គមអ៊ីតាលី នោះគឺ អំពើពុករលួយស៊ីសំណូក និងជំនួញរបស់ក្រុមជនទុច្ចរិតម៉ាហ្វីយ៉ា ជាច្រើនក្រុម ដែលអាជ្ញាធរអ៊ីតាលី គ្មានសមត្ថភាព នឹងបង្ក្រាបបាន។ ព្រះអង្គបានបរិហារថា គ្រប់គ្នាឈរនៅស្ងៀម ធ្វើជាហី គ្មាននរណាអើពើរ និងអំពើអយុត្តិធម៌សង្គមទាំងនេះសោះ។
សូមបញ្ជាក់ថា អំពើហិង្សា អំពើពុករលួយដែលបង្កឡើង ដោយក្រុមមេក្លោងទុច្ចរិក ម៉ាហ្វីយ៉ា នៅតំបន់ភាគខាងជើងប្រទេសអ៊ីតាលី ត្រូវបានគេដឹងថា កំពុងតែស៊ីរូងកាន់តែជ្រៅ ដែលរដ្ឋអំណាចអ៊ីតាលី ខ្លាចរអារ មិនហ៊ានចាត់វិធានការនោះទេ។ ទាំងនេះក៏ដោយសារតែ មនុស្សមានអំណាច បានទទួលលុយសំណូក យ៉ាងក្រាសក្រែល។ ១០% នៃប្រជាជន នៅតំបន់ទូរាំង ត្រូវបានផាត់ចេញពីសង្គម ដោយសារតែភាពក្រីក្រតោកយ៉ាកជាទីបំផុត។ ភាគច្រើនលើសលុប នៃប្រជាជនក្រីក្រទាំងនោះ គឺកុមារ និងមនុស្សចាស់ជរា។ ចំណែកចំនួនមនុស្សអត់ការងារធ្វើ ក្នុងចំណោមយុវជនពេញកំលាំង មានប្រមាណជា ៤០% ឯណោះ។
សន្ទរៈកថា របស់សម្តេចប៉ាបនេះ បានធ្វើឲ្យសាធារណៈមតិជាច្រើន ពេញចិត្តជាខ្លាំង។ គេពេញចិត្ត កោតសរសើរសម្តេចប៉ាបអង្គនេះ ដោយសារតែព្រះអង្គមានចិត្តក្លាហាន ហ៊ាននិយាយការពិត ហ៊ានបរិហារអំពើអយុត្តិធម៌ ផ្ទុយពីអ្នកនយោបាយខ្លះ ដែលបានតែនិយាយបញ្ជោរ ស្របតាមតែគេប្រាប់ មិនព្រមបើកភ្នែកមើលការពិត ជាក់ស្តែងក្នុងសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ