នាវាចម្បាំងមីស្ត្រាល់បារាំង មានអតិថិជនថ្មីចាប់អារម្មណ៍ តែជាជំនួញខាតដើម
ចុះផ្សាយនៅថ្ងៃ៖
ស្តាប់ - ០៤:១៥
ភាពជាដៃគូយុទ្ធសាស្ត្ររវាងបារាំងនិងអេហ្ស៊ីប បានក្លាយជាកិត្តិយសនាឱកាសបើកសម្ពោធព្រែកជីកស៊ុយអេថ្មីមួយទៀត កាលពីថ្ងៃទី៦សីហា។ បន្ទាប់ពីបានបង្ហាញខ្លួនទន្ទឹមគ្នាលើវេទិកាប្រធានាធិបតី មើលព្យុះហយាត្រាយន្តហោះប្រដេញរ៉ាហ្វាល់ និងនាវាប្រើបានគ្រប់យ៉ាង Fremm ដែលអេហ្ស៊ើបទើបទិញបានពីបារាំងកាលពីខែកុម្ភៈ លោក ហ្វ្រង់ស័រ ហូឡង់ ប្រធានាធិបតីបារាំងនិងសមភាគីអេហ្ស៊ីប លោក អាប់ឌែល ហ្វាតះ អាលស៊ីស៊ី កំពុងខ្សិបខ្សៀវគ្នាពង្រីកភាពជាដៃគូ លើកិច្ចសន្យាសំខាន់មួយទៀត។ ក្រុងគែរ កំពុងសំឡឹងចង់ទិញតនាវាចម្បាំងមីស្ត្រាល់សាងសង់ដោយបារាំងសម្រាប់រុស្ស៊ី ដ៏ចម្រូងចម្រាស។
សំណុំរឿងនាវាចម្បាំងមីស្ត្រាល់បារាំងឈប់លក់ឱ្យរុស្ស៊ី ដោយហេតុវិបត្តិអ៊ុយក្រែន ទើបត្រូវបានបិទបញ្ចប់ បន្ទាប់ពីប៉ារីសនិងម៉ូស្គូបានព្រមព្រៀងគ្នា បារាំងសុខចិត្តសងលុយទៅម៉ូស្គូ ជំនួសការប្រគល់ទំនិញ។ ជាសរុបបារាំងត្រូវសងរុស្ស៊ី ១១៦៣ លានអឺរ៉ូ (ដែល៧៨៤លានជាថ្លៃប្រាក់កក់រុស្ស៊ី បូកនឹងតម្លៃសាងសង់សំបកនាវានៅរុស្ស៊ី និងថ្លៃបង្ហាត់ទាហានជើងទឹករុស្ស៊ី៤០០នាក់ ព្រមទាំងសម្ភារៈបច្ចេកទេសផ្សេងៗទៀត)។ ប៉ុន្តែគ្មានទេការបង់ពិន័យ និង គ្មានទេការប្តឹងផ្តល់ទៅតុលាការ រឿងបារាំងមិនគោរពសន្យា ព្រមទាំងបានទទួលសិទ្ធិជាម្ចាស់នាវាយ៉ាងពេញលេញ មានន័យថាបារាំងអាចលក់នាវាឱ្យប្រទេសទីបីដោយសេរី។
ព័ត៌មាននេះមិនត្រូវបានភាគីបារាំងធ្វើអត្ថាធិប្បាយអ្វីទាំងអស់។ បើតាមរដ្ឋមន្ត្រីក្រសួងការពារជាតិបារាំង មានប្រទេសច្រើន ចាប់អារម្មណ៍ចង់បាននាវាចម្បាំងមីស្តា្រល់ ! តែមិនបានបង្ហើបថាប្រទេសណាឡើយ ! ចំណែក ប្រធានាធិបតីបារាំងលោក ហ្វ្រង់ស័រ ហូឡង់ បានធានាអះអាងពីប្រទេសអេហ្ស៊ីប កាលពីថ្ងៃព្រហស្បតិ៍សប្តាហ៍មុន ថា បារាំងអាចលក់នាវានេះបានដោយគ្មានការលំបាកសោះ។
ក៏ប៉ុន្តែសួរថាតើលក់ឱ្យនរណា និងក្នុងថ្លៃប៉ុន្មាន បានរួចខ្លួនដែរឬទេ ?! ព្រោះសូមបញ្ជាក់ថា បារាំងគ្មានចេតនា និងមធ្យោបាយ រក្សាទុកនាវាចម្បាំងនេះសម្រាប់ប្រើប្រាស់ជារបស់ផ្ទាល់ខ្លួនទេ។ នាវាប្រភេទមីស្ត្រាល់នេះ ត្រូវការចំណាយច្រើនណាស់ ! គ្រាន់តែនៅបញ្ឈរស្ងៀមលើកំពង់ផែ ក៏គេត្រូវចំណាយប្រាក់អស់ប្រមាណ១លានអឺរ៉ូ ក្នុងមួយខែៗ ថ្លៃបង់ពន្ធផែ ថ្លៃថែទាំ ថ្លៃយាម ... ហើយការលក់ទៅឱ្យប្រទេសផ្សេងក្រៅពីរុស្ស៊ី មិនប្រាកដជាតម្លៃដដែលដូចប៉ារីស និងម៉ូស្គូធ្លាប់ព្រមព្រៀងគ្នាឡើយ។
ថ្វីបើអាចគេធ្លាប់ឮអ្នកឯកទេសរអ៊ូរទាំងអំពីការពិបាកលក់ ព្រោះមីស្ត្រាល់ជានាវាដែលសាងសង់ឡើងដោយបច្ចេកវិទ្យាទំនើប សម្រាប់ទប់ទល់និងប្រើប្រាស់ក្នុងប្រទេសត្រជាក់ ជាហេតុធ្វើឱ្យប្រទេសឥណ្ឌា និងប្រេស៊ីល អតិថិជនដ៏មានសក្តានុពលទាំងពីរពិបាកទទួលយក ព្រមទាំងត្រូវរុះរើកែសម្រួលបច្ចេកវិទ្យាខ្លះជារបស់រុស្ស៊ីក្តី ក៏ពេលនេះ មានដំណឹងខ្សឹបខ្សៀវថាអេហ្ស៊ីបនិងអារ៉ាប៊ីសាអ៊ូឌីត ចង់បានខ្លាំងនាវាមីស្ត្រាល់ទាំងពីររបស់បារាំងនេះ។ ប្រភពការទូតបារាំង បានបង្ហើបថា ព្រះចៅសាល់ម៉ាន របស់អារ៉ាប៊ីសាអ៊ូឌីត ចង់ឃើញអេហ្ស៊ីបមានបំពាក់នាវាចម្បាំងដ៏ទំនើប ដើម្បីការពារតំបន់ ការពារសមុទ្ទក្រហម និងសមុទ្ទមេឌីទែរ៉ាណេ។ ក្នុងទិសនេះ និងក្នុងដំណើរឈានឆ្ពោះទៅរកការមានកម្លាំងទ័ពអារ៉ាបរួម ស្តេចអារ៉ាប៊ីសាអ៊ូឌីត និងប្រធានាធិបតីអេហ្ស៊ីប បានចុះកិច្ចព្រមព្រៀងរវាងគ្នា កាលពីថ្ងៃទី ៣០កក្កដា។
តាំងពី អេហ្ស៊ីបមានលោក ស៊ីស៊ី ជាប្រមុខដឹកនាំមក ក្រុងគែរ និងរីយ៉ាត បានផ្សាភ្ជាប់ទំនាក់ទំនងកាន់តែស្អិតល្មួត អារ៉ាប៊ីសាអ៊ូឌីត ផ្តល់ជំនួយហិរញ្ញវត្ថុដើម្បីអេហ្ស៊ីបរស់ ឯអេហ្ស៊ីបគាំទ្រម្ចាស់ទុន បញ្ជូនកម្លាំងនិងមធ្យោបាយទៅក្នុងគ្រប់យុទ្ធនាការយោធា។ ដូច្នេះឈរលើប្រយោជន៍រួម សម្រាប់ថ្នាក់ជាតិ និងថ្នាក់តំបន់ អារ៉ាប៊ីសាអ៊ូឌីត មិនខ្លាចនឹងបន្ថែមជំនួយហិរញ្ញវត្ថុ ជួយអេហ្ស៊ីបឱ្យទិញ នាវាមីស្ត្រាល់ទាំងពីរពីបារាំង ផ្ទុកទាហានបានមួយពាន់នាក់ រថក្រោះ និងឧទ្ធម្ភាគចក្រ ដែលអាចបម្រើប្រយោជន៍ផ្ទាល់ក្នុងសង្គ្រាមនៅយេម៉ែន ឬលីប៊ីផងបើចាំបាច់នោះទេ។
រវាងបារាំងនិងអេហ្ស៊ីប ទំនាក់ទំនងក៏ល្អប្រសើរ ជាដៃគូប្រកបដោយយុទ្ធសាស្ត្រជាពិសេសក្នុងយុទ្ធនាការប្រយុទ្ធប្រឆាំងនឹងភេរវនិយម និងលើផ្នែកសន្តិសុខ។ អេហ្ស៊ីបទើបព្រមព្រៀងចុះកិច្ចសន្យាទិញយន្តហោះរ៉ាហ្វាល់ ២៤គ្រឿង។ កាលពីសប្តាហ៍មុនប្រធានាធិបតីបារាំងក្លាយជាភ្ញៀវកិត្តិយសនាឱកាសបើកសម្ពោធព្រែកជីកស៊ុយអេទីពីរ។ ការចរចាដោយស្ងាត់ៗ ទំនងជាបានប្រព្រឹត្តពេលប្រមុខរដ្ឋទាំងពីរជួបគ្នាមួយទល់មួយ ទន្ទឹមគ្នានឹង កិច្ចពិភាក្សាជាមួយប្រទេសផ្សេងទៀតដែលចាប់អារម្មណ៍ចង់បានមីស្ត្រាល់ដែរ ដូចជាកាណាដា ឬសិង្ហបុរី។ ជាកិច្ចពិភាក្សាលឿនរហ័ស ព្រោះបារាំងចង់សម្រេចរកម្ចាស់ថ្មីឱ្យមីស្ត្រាល់បានលឿនៗ នេះបើតាមប្រភពការទូតបារាំងដដែល តែបារាំងមិនចង់ប្រកាសក្តូងក្តាំងភ្លាមៗ អំពីជម្រើសរបស់ខ្លួន ព្រោះមីស្ត្រាល់សំណុំរឿងដ៏ប្រទាញប្រទង់ខ្លាំងអស់រយៈពេលជាង៨ខែ ទើបតែត្រូវបិទបញ្ចប់តាមរយៈ កិច្ចព្រមព្រៀងជាមួយរុស្ស៊ី មិនទាន់ស្ងួតទឹកខ្មៅស្រួលបួលផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ