បារាំងនិងរុស្ស៊ី នៅតែដោះស្រាយគ្នាមិនដាច់រឿងនាវាចម្បាំងមីស្ត្រាល់
ប្រធានាធិបតីបារាំង និងរុស្ស៊ី ប្រមុខរដ្ឋប្រទេសនៅអឺរ៉ុបធំពីរ ដែលទទួលស្គាល់អំពើប្រល័យពូជសាសន៍អាមេនី បានអញ្ជើញជាអធិបតីក្នុងពិធីរំលឹក ខួប១០០ឆ្នាំ នៃព្រឹត្តិការណ៍ដ៏សោកសៅនេះ នៅថ្ងៃសុក្រទី ២៤មេសា ២០១៥។ ប៉ុន្តែក៏ជាឱកាសដែលរដ្ឋបុរសទាំងពីរឆ្លៀតជួបគ្នាដើម្បីពិភាក្សាអំពីវិបត្តិចម្បងៗមួយចំនួនដូចជា បញ្ហាអ៊ុយក្រែន ការលក់ទិញនាវាចម្បាំងមីស្ត្រាល់ ឬ ការប្រយុទ្ធប្រឆាំងនឹងការជួញដូរអន្តោប្រវេសន៍តាមមេឌីទែរ៉ាណេ។
ចុះផ្សាយនៅថ្ងៃ៖
ស្តាប់ - ០១:៤២
អ្វីដែលប្រធានាធិបតីបារាំងនិងរុស្ស៊ីបានបង្ហាញរួមគ្នានៅពេលនេះ គឺគេមិនអាចបដិសេធអំពើប្រល័យពូជសាសន៍របស់រដ្ឋាភិបាលតួកគីសម័យចក្រភពអូតូម៉ង់ទេ។ លោកហ្វ្រង់ស័រហូឡង់ បានអំពាវនាវឱ្យតួកគីទទួលទង្វើកាលពីឆ្នាំ១៩១៥ដែលមានលក្ខណៈប្រល័យពូជសាសន៍ ឯចំណែកលោកពូទីន បានប្រកាសថាគ្មានហេតុផលណាគ្រប់គ្រាន់សម្រាប់ធ្វើការប្រល័យមនុស្សទាំងពូជទេ។
ក៏ប៉ុន្តែនៅក្នុងជំនួបមួយទល់នឹងមួយ ដោយបិទទ្វារ ក្រៅក្របខ័ណ្ឌរំលឹកខួបប្រល័យពូជសាសន៍អាមេនីវិញ សំឡេងបារាំងនិងរុស្ស៊ី ហាក់ដូចជាមិនស៊ីចង្វាក់គ្នាសោះ។ ប្រធានាធិបតីបារាំង លោកហ្វ្រង់ស័រហូឡង់ បានជំរុញឱ្យសមភាគី លោក ពូទីន សំឡឹងទៅមុខ ក្នុងការអនុវត្តកិច្ចព្រមព្រៀងក្នុងមីស្ក៍ ដើម្បីសន្តិភាពអ៊ុយក្រែន។ ឯចំណែកលោកពូទីន បានត្រឹមសម្តែងការសោកស្តាយដែលមិនគួរណាទំនាក់ទំនងរុស្ស៊ី-បារាំង រុស្ស៊ី-សហភាពអឺរ៉ុប ត្រូវធ្លាក់ចុះយ៉ាប់យឺនយ៉ាងដូច្នេះសោះ។
ចំណែកប្រធានបទដ៏សំខាន់ទាក់ទងនឹងការលក់នាវាចម្បាំងមីស្ត្រាល់ ដែលគ្រប់គ្នារង់ចាំវិញ មិនត្រូវប្រមុខរដ្ឋទាំងពីរអារកាត់សម្រេចនាឱកាសនេះទេ។ ប្រភពស្និទ្ធនឹងរុស្ស៊ី បានព្រលយមុនជំនួបឱ្យដឹងថា បារាំងនិងរុស្ស៊ីកំពុងឈានទៅសម្រេចព្រមព្រៀង លុបចោលកិច្ចសន្យាបារាំងត្រូវប្រគល់នាវាចម្បាំងមីស្ត្រាល់ទៅរុស្ស៊ី និងសំណងប្រាក់កក់ហើយ។ ដោយសារវិបត្តិនៅអ៊ុយក្រែន បារាំងបានសម្រេចផ្អាកមិនប្រគល់នាវាចម្បាំងនោះ ទៅឱ្យរុស្ស៊ីតាមកិច្ចសន្យា ដែលមានតម្លៃដល់ទៅ ១២០០លានអឺរ៉ូទេ។ មុននេះពីរថ្ងៃប្រធានាធិបតីបារាំង បានលើកឡើងអំពីលទ្ធភាពសងលុយម៉ូស្គូ ប្រសិនបើពិតជាគ្មានការប្រគល់ទំនិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ