ម៉ូស្គូ និងប៉ារីសទើបព្រមព្រៀងគ្នាលើថ្លៃសំណងប៉ះប៉ូវមកឲ្យរុស្ស៊ីដោយបារាំង
កិច្ចចរចាដែលបានពន្យារទៅអស់៨ខែ បានចប់ស្រេចបាច់ហើយ ទាំងអំពីទំហំ ទឹកប្រាក់សំណង ទាំងអំពីរយៈពេល ដែលបារាំងត្រូវបង់មកឲ្យរុស្ស៊ី ចំពោះការដែលភាគីបារាំង មិនអាចបំពេញតាមកិច្ចសន្យាចុះតាំងពីឆ្នាំ២០១១ ដើម្បីលក់មកឲ្យរុស្ស៊ី នាវាចម្បាំងពីរគ្រឿង ធុន Mistral។ សេចក្តីនេះ ថ្លែងទៅប្រព័ន្ធផ្សព្វផ្សាយរុស្ស៊ី ល្ងាចថ្ងៃ៣០កក្កដា ដោយ តំណាង វិមានក្រេមឡាំង។ ចំណែក ភាគីបារាំង មិនធ្វើអត្ថាធិប្បាយអ្វីណាទេ ទៅលើព័ត៌មាននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ជាបឋម គួររំលឹកថា ស្របនឹងកិច្ចសន្យា ចុះខែមិថុនាឆ្នាំ២០១១ ជំនាន់លោក ប្រធានាធិបតីបារាំង Nicolas Sarkozy ភាគីបារាំង ត្រូវលក់មកឲ្យរុស្ស៊ី គឺនាវា ផ្ទុកឧទ្ធម្ភាគចក្រ ពីរគ្រឿង ធុន Mistral ក្នុងតម្លៃសរុប ១.២០០លានអឺរ៉ូ។ ពីក្នុងតម្លៃនេះ រុស្ស៊ី បានបង់ប្រាក់កក់ ៨៤០លានអឺរ៉ូទៅហើយ។ ហើយស្របនឹងកុងត្រាដែលមានចុះ នាវានេះទី១ ដែលមានឈ្មោះ រុស្ស៊ីថា Vladivostok ត្រូវភាគីបារាំង ប្រគល់ឲ្យរុស្ស៊ី គឺនៅខែតុលាឆ្នាំ២០១៤ សម្រាប់រុស្ស៊ី បញ្ជូលទៅក្នុងកងនាវាខ្លួនដែលប្រចាំនៅ មហាសមុទ្រប៉ាស៊ីហ្វិក។ ហើយអាទី២ ឈ្មោះ Sebastopol សម្រាប់បញ្ចូលទៅក្នុងកងនាវារុស្ស៊ីប្រចាំនៅសមុទ្រខ្មៅ ត្រូវបារាំងប្រគល់មក គឺឲ្យបាន មុនដំណាច់ឆ្នាំ២០១៥នេះ។
ប៉ុន្តែ ដោយរុស្ស៊ី ជាប់ក្នុងទណ្ឌកម្មបស្ចិមលោក មកពីវិបត្តិនៅអ៊ុយក្រែន បារាំង ដោយ បំពេញតាមទណ្ឌកម្មនេះ នៅខែវិច្ឆិកាឆ្នាំមុន បានសម្រេចព្យួរទុកសិន រឿងប្រគល់នាវា ទាំងពីរគ្រឿងនោះ មកឲ្យរុស្ស៊ី។ ហើយតាំងពីពេលនោះមក គូភាគី បានធ្វើកិច្ចចរចារកច្រក ចេញ ពីស្ថានការណ៍ដែលកើតឡើង។ ភាគីរុស្ស៊ី ទាមទារពីបារាំង ឲ្យសងមកវិញ មិនគ្រាន់តែ ប្រាក់កក់ប៉ុណ្ណោះទេ តែក៏ទាំងការចំណាយនានា ដោយរុស្ស៊ីដើម្បីបណ្តុះបណ្តាល ពួកនាវិកខ្លួន ជាង៤០០នាក់ ឲ្យចេះប្រើនាវាបារាំងនោះ ព្រមទាំងការចំណាយផ្សេងៗទៀត។
កាសែតក្រុងម៉ូស្គូ Kommersant លេខថ្ងៃ៣១កក្កដានេះ យោងទៅលើប្រភពដែលជំនិត នឹង កិច្ចចរចានោះ ចុះផ្សាយថា ប៉ារីសសុខចិត្តសងមកឲ្យរុស្ស៊ីសរុបទៅ គឺ ១.១៦០លានអឺរ៉ូ។ ប៉ុន្តែ ព័ត៌មាននេះ នៅមិនទាន់ទទួល ការបញ្ជាក់ជាផ្លូវការនៅឡើយ។ ជំនួយការប្រធានាធិបតីរុស្ស៊ី ខាងបញ្ហាសហប្រតិបត្តិការយោធានិងបច្ចេកទេស លោក Vladimir Kojine ដោយថ្លែងទៅពួកអ្នកកាសែត សំដែងសេចក្តីសង្ឃឹមថា ក្នុងពេលឆាបៗខាងមុខ ម៉ូស្គូ និង ប៉ារីស នឹងចុះកិច្ចព្រមព្រៀងស្តីអំពីការរំលាយចោល កិច្ចសន្យាចុះកាលពី៤ឆ្នាំមុន។ ហើយ ពេលនោះ នឹងមានប្រកាសជាផ្លូវការទំហំពិតប្រាកដ នៃទឹកប្រាក់ជាសំណងប៉ះប៉ូវ ដែលបារាំង ត្រូវបង់ មកឲ្យរុស្ស៊ី។
ចំណែកភាគីបារាំង ប្រកែកមិនព្រមធ្វើអត្ថាធិប្បាយអ្វីណាទេ ទៅលើដំណឹងខាងលើ ដែល ផ្សព្វផ្សាយដោយភាគីរុស្ស៊ី។ លោកប្រធានាធិបតីបារាំង François Hollande កាលពីថ្ងៃចន្ទ ២៧កក្កដា បានចង្អុលឲ្យឃើញថា ការពិភាក្សា ចេះតែបន្តទៅ ហើយសេចក្តីសម្រេចជាក់លាក់ នឹងត្រូវអនុម័ត គឺ ក្នុងប៉ុន្មានសប្តាហ៍ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ