អន្តោប្រវេសន៍តំបន់កាឡេ៖កិច្ចព្រមព្រៀងបារាំង-អង់គ្លេស គេរិះគន់ផង គេអបអរផង
នៅថ្ងៃព្រហស្បតិ៍ ទី២០ សីហា រដ្ឋមន្ត្រីក្រសួងមហាផ្ទៃបារាំង និងអង់គ្លេស បានជួបគ្នា នៅក្រុងកាឡេ ភាគខាងជើងប្រទេសបារាំងដើម្បី ចុះហត្ថលេខា លើកិច្ចព្រមព្រៀង ទ្វេរភាគី ដើម្បីបង្កើនកិច្ចសហការ ក្នុងការគ្រប់គ្រងច្រកចេញចូលក្រោមសមុទ្រតំបន់កាឡេ ដែលកន្លងមក ត្រូវបានក្លាយជាកន្លែងលួចឆ្លង ដោយខុសច្បាប់ ពីបារាំងទៅអង់គ្លេស របស់ជនអន្តោប្រវេសន៍ ជាច្រើនពាន់នាក់។ ថ្វីបើមានការអបអរ ដោយឃើញពីឆន្ទៈក្នុងការដោះស្រាយបញ្ហា របស់ភាគីអង់គ្លេស កិច្ចព្រមព្រៀងនេះ ត្រូវបានគេរិះគន់ផងដែរ ដោយគេចោទថា បារាំងក្លាយជាអ្នកស៊ីឈ្នួល យាមព្រំដែនឲ្យអង់គ្លេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
លោក Bernard Cazeneuve រដ្ឋមន្ត្រីក្រសួងមហាផ្ទៃបារាំង និងលោកស្រី Theresa May រដ្ឋមន្ត្រីក្រសួងមហាផ្ទៃអង់គ្លេស បានចុះហត្ថលេខា លើកិច្ចព្រមព្រៀងទ្វេរភាគី ដើម្បីទប់ស្កាត់ការលួចឆ្លងចូលទៅ ប្រទេសអង់គ្លេស តាមផ្លូវក្រោមសមុទ្រ នៅតំបន់កាឡេ ភាគខាងជើងប្រទេសបារាំង។ កិច្ចព្រមព្រៀងនេះ សំដៅសំខាន់ បង្កើនការត្រួតពិនិត្យ នៅស្ថានីយ៍ EuroTunnel ព្រមទាំងតាមកម្ចាត់បណ្តាញជួញដូរមនុស្ស របស់ក្រុមជនទុច្ចរិត ដែលរកស៊ីបញ្ជូន ជនអន្តោប្រវេសន៍ ឲ្យឆ្លងទៅប្រទេសអង់គ្លេស។
កិច្ចព្រមព្រៀងបានកំណត់ជាអាទិ៍ ការបង្កើតទីតាំងបញ្ជាការរួមមួយ នៅតំបន់កាឡេ ដែលអាជ្ញាធរបារាំង និងអង់គ្លេស ត្រូវធ្វើការរួមគ្នា ដើម្បីទប់ស្កាត់ការជួញដូរ បញ្ជូនជនអន្តោប្រវេសន៍។ ហើយមួយទៀត គឺការបន្ថែមកម្លាំង និងសម្ភារៈទំនើប ដើម្បីធ្វើការត្រួតពិនិត្យ មួយថ្ងៃ២៤ម៉ោង រាល់ការចេញដំណើរ របស់យានយន្ត និងរថភ្លើង ដែលត្រូវឆ្លងទៅអង់គ្លេស។
បន្ថែមលើទឹកប្រាក់ ចំនួន២៥ លានអឺរ៉ូ ដែលអង់គ្លេសបានសន្យាថា នឹងប្រគល់ដើម្បីអនុវត្តផែនការនេះ អង់គ្លេសនឹងប្រគល់ប្រាក់ចំនួន១០លានអឺរ៉ូផ្សេងទៀត។ ទឹកប្រាក់នេះ នឹងយកទៅប្រើប្រាស់ជាពិសេស ក្នុងការកសាងមណ្ឌលស្នាក់នៅ សម្រាប់ជនអន្តោប្រវេសន៍ណា ដែលបានដាក់ពាក្យសុំសិទ្ធិជ្រកកោនជាជនភៀសខ្លូននៅបារាំង ហើយមណ្ឌលនោះត្រូវសង់នៅឲ្យឆ្ងាយ ពីស្ថានីយEuroTunnel។ មួយផ្នែកទៀត ប្រាក់នេះនឹងត្រូវយកទៅប្រើ ដើម្បីផ្តល់ឲ្យទៅជនអន្តោប្រវេសន៍ណា ដែលស្ម័គ្រចិត្តត្រឡប់ទៅប្រទេសដើមវិញ។
លោក Antonio Guterres អ្នកតំណាង UNHCR បានថ្លែងអបអរដល់កិច្ចព្រមព្រៀងទេ្វរភាគីនេះ ដោយបានលើកឡើង ពីសារសំខាន់ក្នុងការគិតគូដល់ស្ថានភាពរបស់ជនអន្តោប្រវេសន៍ កន្លែងស្នាក់នៅ និងភាពងាយរងគ្រោះរបស់ពួកគេ ដោយសារតែចាញ់បោកមេខ្យល់។ ទោះបីជាយ៉ាងណា ក្រុមអ្នកស្ម័គ្រចិត្ត នៃអង្គការមនុស្សធម៌ផ្សេងៗ ដែលកំពុងតែដុតដៃដុតជើងជួយសម្រាលការលំបាកជនអន្តោប្រវេសន៍ បានត្អូញត្អែរថា កិច្ចព្រមព្រៀងនេះ គឺវាមិនគ្រប់គ្រាន់នោះទេ។ ការសាងសង់មណ្ឌលថ្មី ដែលទទួលមនុស្សបានតែ១០០០នាក់ គឺវានៅតិចខ្លាំងណាស់ បើប្រៀបធៀប ទៅចំនួនជនអន្តោប្រវេសន៍។ អ្នកនយោបាយបារាំងមួយចំនួន បានរិះគន់រដ្ឋាភិបាលបារាំង ថាស៊ីឈ្នួលយាមព្រំដែនឲ្យអង់គ្លេស។ ជនអន្តោប្រវេសន៍ចង់ឆ្លងទៅអង់គ្លេស វាជាកាតព្វកិច្ចរបស់អង់គ្លេស ដែលត្រូវរារាំង មិនមែនបារាំងទេ។
គួរបញ្ជាក់ថា បច្ចុប្បន្ននេះ កម្លាំងនគរបាលបារាំងប្រមាណជា ១៣០០នាក់ កំពុងធ្វើការយ៉ាងសកម្មក្នុងការការពារស្ថានីយ EuroTunnel មិនឲ្យជនអន្តោប្រវេសន៍បន្លំឆ្លងទៅអង់គ្លេស។ ក្នុងប៉ុន្មានសប្តាហ៍កន្លងមកនេះ មានករណីស្លាប់ជនអន្តោប្រវេសន៍ ជាង១០នាក់ ដោយសារតែពួកគេរត់ទៅតោងរថភ្លើង រឺតោងពីក្រោមរថយន្តដឹកទំនិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ