វិបត្តិជនអន្តោប្រវេសន៍នៅអឺរ៉ុប កាន់តែបន្ទាន់ និង ធ្ងន់ធ្ងរ
គ្រាន់តែក្នុងរយៈពេលមួយសប្តាហ៍កន្លងទៅ មានជនអន្តោប្រវេសន៍ចំនួន ២ម៉ឺន១ពាន់អ្នក ដែលបានធ្វើដំណើរ មកដល់កោះកូស ភាគអាគ្នេយ៍ប្រទេសក្រិក។ ជនអន្តោប្រវេសន៍ទាំងនោះ បានធ្វើដំណើរថ្មើរជើង ឆ្លងកាត់ប្រទេសផ្សេងៗ ក្នុងតំបន់បាល់កង់ មុននឹងឆ្លងទៅដល់ប្រទេសសមាជិកសហភាពអឺរ៉ុប ដូចជាអាល្លឺម៉ង់ បារាំង អូទ្រីស ជាដើម។ ដូចគ្នា ជាមួយនឹងអ៊ីតាលី ក្រិក គ្មានលទ្ធភាពគ្រប់គ្រាន់ ដើម្បីទទួលជនភៀសខ្លួន ដែលកើនឡើងពីមួយថ្ងៃទៅមួយថ្ងៃ។ លោកស្រី ប្រមុខរដ្ឋាភិបាលអាល្លឺម៉ង់ បានអំពាវនាវ ឲ្យសហភាពអឺរ៉ុប រកដំណោះស្រាយរួមមួយ ដើម្បីដោះស្រាយបញ្ហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៥៣
ពេលវេលាកាន់តែទៅមុខ វិបត្តិជនអន្តោប្រវេសន៍ នៅអឺរ៉ុប កាន់តែធ្ងនធ្ងរទៅៗ។ កាលពីប៉ុន្មានខែមុននេះ អ៊ីតាលីបានជួបការលំបាកច្រើនជាងគេ ដោយសារតែមានជនអន្តោប្រវេសន៍ ជាច្រើនម៉ឺននាក់ បានឆ្លងទូក មកដល់ទឹកដីរបស់ខ្លួន។ ឥឡូវពេលនេះ គឺក្រិកម្តង ដែលកំពុងតែជួបការលំបាក។ដោយគ្រាន់តែយើងក្រឡេកមើល លើតួលេខផ្លូវការ នៃការមកដល់ របស់ជនអន្តោប្រវេសន៍ គឺយើងដឹងរួចទៅហើយថា ស្ថានការណ៍វាធ្ងន់ធ្ងរ និងបន្ទាន់កំរិតណា។
ទឹកបាក់ទំនប់ ទប់ខាងលិច ធ្លាយខាងកើត៖
តួលេខខែកក្កដា ឆ្នាំ២០១៥ នេះ គឺមានចំនួនលើសមួយគុណជាបី បើប្រៀបធៀបទៅ ខែកក្កដាឆ្នាំ២០១៤ ពោលគឺ ចំនួនជនអន្តោប្រវេសន៍ ដែលបានមកដល់ព្រំដែនសហគមន៍អឺរ៉ុប គឺមានចំនួន ១សែន ៧ពាន់៥រយនាក់។ នេះយើងនៅមិនរាប់ ចំនួនមនុស្សដែលមិនបានមកចុះឈ្មោះផង។ បើគិតពីដើមឆ្នាំ មកដល់ពាក់កណ្តាលខែសីហានេះ មានជនអន្តោប្រវេសន៍ ចំនួន១សែន ៦ម៉ឺននាក់ ដែលបានមកដល់ក្រិក តាមផ្លូវទឹក។ ហើយអ្នកដែលមកដល់តាមផ្លូវគោក ឆ្លងតាមតួកគី មានជិត២ម៉ឺននាក់ផ្សេងទៀត។នៅក្រិក គ្រាន់តែសប្តាហ៍មុន មានជនអន្តោប្រវេសន៍ មកដល់ ចំនួន ២ម៉ឺន១ពាន់នាក់ វាសឹងតែស្មើចំនួនសរុប កាលពីឆ្នាំទៅ នៅក្រិក។ ហើយវាមិនទាន់ឈប់ត្រឹមហ្នឹងទេ គឺជនអន្តោប្រវេសន៍ នឹងបន្តមកថែមទៀត កាន់តែច្រើន។
កោះកូស នៅភាគអាគ្នេយ៍ក្រិក ក្បែរនឹងឆ្នេរប្រទេសតួកគី កំពុងជួបការលំបាកជាងគេ ដោយសារតែមានជនអន្តោប្រវេសន៍ជាច្រើន បានមកដល់ ហើយអាជ្ញាធរក្រិក គ្មានលទ្ធភាព គ្រប់គ្រាន់ដើម្បីទទួលពួកគេទេ។ ក្នុងមួយយប់ៗ មានជនអន្តោប្រវេសន៍មកដល់តាមទូក ជាច្រើនរយនាក់។ បើយើងមើលរូបភាពដែលគេផ្សព្វផ្សាយតាមទូរទស្សន៍ក្រិកវិញ យើងឃើញថា វាអនោចអធម៌ណាស់ ព្រោះជនអន្តោប្រវេសន៍រាប់ពាន់នាក់ ទាំងក្មេង ទាំងចាស់ ដេករកេតរកូតតាមផ្លូវ តាមទីវាល ក្រោមកំដៅថ្ងៃក្តៅហែង។ ដោយសារតែខ្វះលទ្ធភាព រដ្ឋាភិបាលក្រិក បានផ្តល់អាទិភាព ទៅឲ្យតែ ជនអន្តោប្រវេសន៍ ដែលមកពីស៊ីរី តែប៉ុណ្ណោះ ព្រោះពួកគេ រត់គេចចេញពីសង្រ្គាម។ សហគមអឺរ៉ុប ទើបបានសន្យាថា នឹងផ្តល់កញ្ចប់ថវិកាបន្ទាន់ ដល់ក្រិក ដើម្បីយកទៅដោះស្រាយ ក្នុងការចំណាយទទួលជនភៀសខ្លួន។ តែទោះបីជាយ៉ាងណា ក៏វានៅតែមិនគ្រប់គ្រាន់ដែរ។
ប្រទេសខាងជើងអឺរ៉ុប ជាគោលដៅចុងក្រោយ របស់ជនអន្តោប្រវេសន៍៖
ជនអន្តោប្រវេសន៍ទាំងនេះ ភាគច្រើនលើសលប់ គឺមិនចង់សុំសិទ្ធិរស់នៅ ក្នុងប្រទេសក្រិក រឺអ៊ីតាលីទេ។ គោលដៅរបស់ពួកគេ គឺទៅប្រទេសណា ដែលមានស្ថានភាពសេដ្ឋកិច្ច ល្អប្រសើរ មានការយកចិត្តទុកដាក់ពីរដ្ឋ និងសំបូរការងារធ្វើ។ ប្រទេសគោលដៅធំៗ របស់ជនអន្តោប្រវេសន៍ទាំងនោះ រួមមាន អាល្លឺម៉ង់ អង់គ្លេស បារាំង ស៊ុយអែដ និងហ្វាំងឡង់ជាដើម។ ដូចយើងបានដឹងស្រាប់ហើយ កាលពីប៉ុន្មានខែមុន ជនអន្តោប្រវេសន៍ ដែលមកដល់អ៊ីតាលី នាំគ្នាបន្តដំណើរ ដើម្បីឆ្លងទៅបារាំង។ ឥឡូវពេលនេះ មានដំណឹងជាច្រើន ដែលបានរ៉ាយរ៉ាប់ ពីការធ្វើដំណើរ របស់ជនភៀសខ្លួន ចេញពីប្រទេសក្រិក ឆ្លងចូលទៅតំបន់បាល់កង់ រាប់ពាន់គីឡូម៉ែត្រ មុននឹងទៅដល់ប្រទេសហុងគ្រី រឺអូសទ្រីស ដែលជាសមាជិកសហភាពអឺរ៉ុប។
កាលពីខែកក្កដា សហភាពអឺរ៉ុប បានមូលមតិគ្នា ផ្តល់អាទិភាពដល់ជនអន្តោប្រវេសន៍ មកពីប្រទេសស៊ីរី ចំនួន២ម៉ឺន ២ពាន់៥រយនាក់ ដោយបានផ្តល់សិទ្ធិជ្រកកោន ក្នុងនាមជាជនភៀសខ្លួន។ ប៉ុន្តែជនអន្តោប្រវេសន៍ ជាង៤ម៉ឺននាក់ទៀត អត់មានប្រទេសណា ទទួលស្គាល់ថាជាជនភៀសខ្លួន និងទទួលឲ្យស្នាក់នៅទេ។ ជនអន្តោប្រវេសន៍ទាំងនោះ គឺនៅរាយប៉ាយ រសាត់អណ្តែតពាសពេញហ្នឹង គ្មានក្រដាសស្នាមត្រឹមត្រូវតាមច្បាប់ គ្មានកន្លែងស្នាក់នៅ គ្មានការងារធ្វើ។
គួររំលឹកថា តាមច្បាប់ ជនអន្តោប្រវេសន៍ទាំងអស់ ដែលបានធ្វើដំណើរ មកដល់ទឹកដីសហភាពអឺរ៉ុប គឺត្រូវបំពេញបែបបទសុំសិទ្ធិជ្រកកោន ក្នុងនាមជាជនភៀសខ្លួន។ មានលក្ខខណ្ឌច្រើនណាស់ ដែលត្រូវបំពេញ មុននឹងគេទទួលស្គាល់ ថាជាជនភៀសខ្លួន ឧទាហរណ៍ដូចជាស្ថានភាពសង្រ្គាម នៅក្នុងប្រទេសកំណើតជាដើម ដែលធ្វើឲ្យជននោះអាចជួបនឹងគ្រោះថ្នាក់ បើសិនជាត្រូវបញ្ជូន ឲ្យត្រឡប់ទៅវិញ។
លក្ខខណ្ឌមួយទៀត ដោយយោងទៅតាមកិច្ចព្រមព្រៀងក្រុងឌុបប្លាំង គឺតំរូវឲ្យជនអន្តោប្រវេសន៍ ធ្វើបែបបទសុំសិទ្ធិជ្រកកោន ជាជនភៀសខ្លួន ក្នុងប្រទេសទីមួយ ដែលខ្លួនបានមកដល់។ អញ្ចឹងគឺមានតែអ៊ីតាលី និង ក្រិកទេ ក្នុងករណីនេះ ដែលត្រូវទទួលដោះស្រាយពាក្យសុំទាំងអស់នេះ។ នេះហើយជាការត្អូញត្អែរ របស់ក្រិក និងអ៊ីតាលី ព្រោះគេគ្មានលទ្ធភាពធ្វើវាទេ ហើយជនអន្តោប្រវេសន៍ ទៀតសោត ក៏គ្មាននរណាចង់នៅក្រិក និងអ៊ីតាលីដែរ។
ជនអន្តោប្រវេសន៍ ជាង៦សែននាក់ ដាក់ពាក្យសុំសិទ្ធិជ្រកកោននៅអាល្លឺម៉ង់ ឆ្នាំ២០១៥៖
មានជនអន្តោប្រវេសន៍ច្រើនណាស់ បានមកដល់អាល្លឺម៉ង់ នារយៈពេលចុងក្រោយនេះ ហើយដែលធ្វើឲ្យស្ថានភាពមានការផ្លាស់ប្តូរ និងត្រូវរកដំណោះស្រាយបន្ទាន់។ តួលេខឆ្នាំ២០១៤ បង្ហាញថា មានជនអន្តោប្រវេសន៍ ២សែននាក់ ដែលបានដាក់ពាក្យសុំសិទ្ធិជ្រកកោន នៅអាល្លឺម៉ង់។ ហើយបើតាមការប៉ាន់ស្មាន ឆ្នាំ២០១៥នេះ មានចន្លោះពី ៦ ទៅ ៧សែននាក់ ឯណោះ។
ដំណោះស្រាយ វាមានទាំងផ្ទៃក្នុងរបស់អាល្លឺម៉ង់ផ្ទាល់ និងដំណោះស្រាយរួមគ្នា រវាងប្រទេសសហភាពអឺរ៉ុបទាំងមូល។ ក្នុងន័យនេះ រដ្ឋាភិបាលអាល្លឺម៉ង់ ចង់សំដៅឲ្យមានការសហការគ្នា ឲ្យបានច្រើន ពីសំណាក់ប្រទេសមាជិកផ្សេងទៀត។ លោកស្រីអង់ហ្គេឡា មែគែល បានចាត់ទុកថា បញ្ហាជនអន្តោប្រវេសន៍ ដែលកំពុងតែចោទឡើងនេះ វាមិនត្រឹមតែជាបញ្ហាមនុស្សធម៌ដែលត្រូវដោះស្រាយបន្ទាន់ប៉ុណ្ណោះទេ តែវាជាបញ្ហាការទូរ និងយុទ្ធសាស្ត្រក្នុងតំបន់ ដែលសមាជិកសហភាពអឺរ៉ុបត្រូវតែរួមគ្នាដោះស្រាយ។ កន្លងមក រដ្ឋាភិបាលអាល្លឺម៉ង់ ធ្លាប់បានស្នើរថា ឲ្យមានការបែងចែកកូតាគ្នា ឲ្យស្មើរភាព មិនមែនម្នាក់យករួចខ្លួន តែរៀងៗខ្លួនទេ។ ប៉ុន្តែសំណើរនេះបានជួបបរាជ័យទៅហើយ។
តារាងបញ្ជីរឈ្មោះ ”ប្រទេសគ្មានគ្រោះថ្នាក់”៖
ពេលនេះ អាល្លឺម៉ង់ ចង់ស្នើរថា បើមិនបង្កើតកូតាក៏ហីចុះ តែត្រូវរួមគ្នា បង្កើតជាតារាងឈ្មោះប្រទេសប្រភពដើម របស់ជនអន្តោប្រវេសន៍ ដែលអាចចាត់ទុកថា ជាប្រទេសមិនមានគ្រោះថ្នាក់។ សរុបទៅគេចង់បែកចែង ឲ្យច្បាស់លាស់ថា ជនអន្តោប្រវេសន៍ មានពីរប្រភេទ មួយជាជនអន្តោប្រវេសន៍ ដែលរត់គេចពីសង្រ្គាម មួយទៀត ជាជនអន្តោប្រវេសន៍សេដ្ឋកិច្ច ដែលរត់មក ដើម្បីរកការងារធ្វើ ព្រោះប្រទេសដើមកំណើតខ្លួន ពុំមានសង្រ្គាម និងគ្រោះថ្នាក់នោះទេ។
ដូច្នេះ ក្នុងគំនិតនេះ គេចង់ផ្តល់អាទិភាព ទទួលតែជនអន្តោប្រវេសន៍ ដែលមកពីប្រទេសណា ដែលមានសង្រ្គាម មានគ្រោះថ្នាក់តែប៉ុណ្ណោះ។ ប៉ុន្តែការបែងចែក ធ្វើតារាងរាយឈ្មោះប្រទេសនេះ នៅមិនទាន់ប្រាដកថា អាចធ្វើទៅរួចទេ ព្រោះសូម្បីតែផ្ទៃក្នុងអាល្លឺម៉ង់ ក៏និយាយមិនទាន់ត្រូវគ្នាដែរ។
គម្រោង៤ចំណុច លើកឡើងដោយបារាំង និងអាល្លឺម៉ង់៖
បើយោងតាមប្រសាសន៍របស់លោក ឡូរង់ ហ្វាប៊្យូស រដ្ឋមន្ត្រីការបរទេសបារាំង បានបញ្ជាក់ថា គម្រោងរួមគ្នា រវាងអាល្លឺម៉ង់ និងបារាំង ដែលគេកំពុងតែសិក្សា គឺឈរលើចំណុច៤សំខាន់៖
១- បង្កើតជា ចំណុចទីតាំងចុះឈ្មោះទទួលពាក្យសុំសិទ្ធិជ្រកកោន ឲ្យបានច្រើន នៅតាមកន្លែងដែលជនភៀសខ្លួនមកដល់ ដូចជានៅក្រិក អ៊ីតាលី និង ហុងគ្រី ជាដើម។
២- បន្ទាប់ពីទទួលពាក្យសុំហើយ ត្រូវធ្វើយ៉ាងណា សម្រេចផ្តល់ចម្លើយ ឲ្យបានឆាប់រហ័ស ដើម្បីទទួលស្គាល់សិទ្ធិជាជនភៀសខ្លួន។ ចំណែកអ្នកដែលត្រូវគេបដិសេធ មិនទទួលស្គាល់ គឺត្រូវរៀបចំ បញ្ជូនជននោះ ត្រឡប់ទៅប្រទេសដើមវិញ ឲ្យបានឆាប់រហ័ស។
៣- ទីបី គឺ ត្រូវជួយប្រទេសដើមរបស់ជនភៀសខ្លួន ក្នុងការស្វែងរកស្ថិរភាពសង្គម និងសេដ្ឋកិច្ច ដើម្បីធ្វើយ៉ាងណា ឲ្យប្រជាជនរស់នៅក្នុងជីវភាព និងលក្ខខណ្ឌល្អប្រសើរ។ ធ្វើដូច្នេះ ទើបពួកគេមិនធ្វើចំណាកស្រុក។
៤- ជាចុងក្រោយ គឺ ជួយប្រទេសដែលនៅក្បែរខាង ជាប់ព្រំដែនសហភាពអឺរ៉ុប ឲ្យប្រទេសទាំងនោះ អាចទាក់ទាញ ជនអន្តោប្រវេសន៍បានខ្លះ កុំឲ្យជនអន្តោប្រវេសន៍ ប្រើប្រាស់ប្រទេសទាំងនោះ គ្រាន់តែជាប្រទេសឆ្លងកាត់
តាមការគ្រោងទុក លោកស្រីអង់ហ្គេឡា មែគែល និងជួបលោកប្រធានាធិបតីបារាំង នៅក្រុងប៊ែកឡាំង នៅថ្ងៃចន្ទក្រោយ ដើម្បីពិភាក្សាគ្នា រកដំណោះស្រាយ លើវិបត្តិជនអន្តោប្រវេសន៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ