វិបត្តិជនអន្តោប្រវេសន៍នៅអឺរ៉ុប៖ សោដនាកម្មនៅតែបន្ត តែគ្មានចម្លើយរួម
វិបត្តិជនអន្តោប្រវេសន៍ ដែលសម្រុកចូលមកទ្វីបអឺរ៉ុប នៅមិនទាន់មានដំណោះស្រាយរួមនៅឡើយ ពីសំណាក់ប្រទេសសហភាពអឺរ៉ុបទាំងអស់។ ទន្ទឹមគ្នានេះ ចំនួនជនអន្តោប្រវេសន៍ ដែលបានស្លាប់ ក្នុងពេលធ្វើដំណើរ មិនថាតាមផ្លូវទឹក រឺតាមផ្លូវគោក កាន់តែមានការកើនឡើង។ បារាំងនិង អាល្លឺម៉ង់ បានស្នើឡើង នូវវិធានការជាច្រើន ដើម្បីដោះស្រាយបញ្ហានេះ មានជាអាទិ៍ ការតាក់តែងច្បាប់គ្រប់គ្រង និងទទួលជនភៀសខ្លួន រួមគ្នាតែមួយ ទូទាំងសហភាពអឺរ៉ុប។ កិច្ចប្រជុំកំពូល វិសាមញ្ញ នឺងអាចធ្វើឡើង ក្នុងអំឡុងពេល ២សប្តាហ៍ទៀត។
ចុះផ្សាយនៅថ្ងៃ៖
ស្តាប់ - ០២:៣១
គិតចាប់ពីពាក់កណ្តាលសប្តាហ៍នេះមក ដំណឹងស្តីពីគ្រោះថ្នាក់ ស្លាប់ជនអន្តោប្រវេសន៍ ដែលធ្វើដំណើរមកកាន់ទឹកដីអឺរ៉ុប បានលេចឮឡើងជាបន្តបន្ទាប់ គួរឲ្យអនោចអធម្មជាទីបំផុត។ ជនអន្តោប្រវេសន៍ ៧១នាក់ ស្លាប់គរជើងគ្នា ដោយថប់ដង្ហើម នៅក្នុងរថយន្ត ពេលធ្វើដំណើរឆ្លងប្រទេសអូទ្រីស។ មិនបានមួយថ្ងៃទៀតផង មានដំណឹងថា មានជនអន្តោប្រវេសន៍ ៥២នាក់ ស្លាប់ដោយលង់ទឹក នៅបាតទូក ដែលពូកឈ្មួញ ប្រើប្រាស់ដើម្បីដឹកពួកគេឆ្លងសមុទ្រមេឌីទែរ៉ាណេ។ មិនទាន់ចប់ត្រឹមនេះទេ ទូកមួយទៀត បានលិចក្នុងសមុទ្រ ហើយមានជនមនុស្សយ៉ាងហោចណាស់ ១០២នាក់ បានស្លាប់។ ទាំងនេះ គ្រាន់តែជាតួលេខ នៃហេតុការណ៍ ដែលកើតឡើងក្នុងសប្តាហ៍នេះ តែប៉ុណ្ណោះ។
បារាំងនិង អាល្លឺម៉ង់ បានអំពាវនាវ ឲ្យប្រទេសសហភាពអឺរ៉ុប រៀបចំតាក់តែង ច្បាប់ស្តីពីជនភៀសខ្លួនរួមគ្នា ដូចគ្នាតែមួយ ដើម្បីឆ្លើយតបទៅនឹង តថៈភាពអាសន្នបច្ចុប្បន្ន ហើយមួយវិញទៀត គឺជាការទទួលខុសត្រូវរួមគ្នា សាមគ្គីគ្នា ដើម្បីជួយជនភៀសខ្លួន។ ក្នុងន័យនេះដែរ បារាំងនិងអាល្លឺម៉ង់ សំណូមពរថា ត្រូវធ្វើការបែងចែក ដោយផ្តល់អាទិភាពដល់ជនភៀសខ្លួន ដែលរត់គេចពីសង្គ្រាម និងការកាប់សម្លាប់ ជាជាងជនអន្តោប្រវេសន៍ ដែលរត់មកអឺរ៉ុប ដើម្បីរកការងារធ្វើ។
ក្រៅពីអាល្លឺម៉ង់ និងបារាំង ដែលបានសម្តែងចេតនា ដោះស្រាយបញ្ហា និងទទួលយកជនអន្តោប្រវេសន៍ គេពុំឃើញមានប្រទេសណាផ្សេងទៀត កំរើកទាល់តែសោះ។ ផ្ទុយទៅវិញ ប្រទេសហុងគ្រីបានធ្វើរបងស្រាស់បន្លាលួស តាមបណ្តោយព្រំដែនជាមួយស៊ែប៊ី ដើម្បីទប់ស្កាត់ជនអន្តោប្រវេសន៍ ទាំងដឹងថា ជនអន្តោប្រវេសន៍ដែលបានប្តេជ្ញាចិត្តផ្សងគ្រោះថ្នាក់ នឹងមិនខ្លាចនឹងផ្លោះរបងនេះក៏ដោយ។ ត្រឹមមិនដល់មួយសប្តាហ៍ផង មានជនអន្តោប្រវេសន៍ ជិត ៣ពាន់នាក់ បានឆ្លងពីស៊ែប៊ី មកហុងគ្រី។
ដូចគ្នា ដែរ ប្រទេសហូឡង់ ទើបបានសម្រេច រិតបន្តឹងច្បាប់អន្តោប្រវេសន៍ ដោយបានសម្រេចកាត់ផ្តាច់ ជំនួយឧបត្ថម្ភ ពីជនអន្តោប្រវេសន៍ណា ដែលមិនត្រូវបានទទួលស្គាល់ ជាជនភៀសខ្លួន ហើយមិនព្រមត្រឡប់ទៅស្រុកកំណើតវិញ។ បន្ថែមពីនេះ ប្រទេសនេះ ក៏នឹងបិទទ្វារមណ្ឌលទទួលជនអន្តោប្រវេសន៍ ចំនួន៣០ ផងដែរ។ នេះគឺជាកាយវិការផ្ទុយស្រឡះ ពីអ្វីដែលគេហៅថា ជាការសាមគ្គីគ្នា រវាងសមាជិកសហភាពអឺរ៉ុប ដែលបារាំង និងអាល្លឺម៉ង់ តែងតែអំពាវនាវ។
នៅថ្ងៃអាទិត្យទៅ ៣០ សីហានេះ លោករដ្ឋមន្ត្រីមហាផ្ទៃបារាំង លោករដ្ឋមន្ត្រីមហាផ្ទៃអាល្លឺម៉ង់ បានស្រុះស្រួលគ្នា ដោយមានការយល់ព្រមពីរដ្ឋមន្ត្រីមហាផ្ទៃអង់គ្លេស ដើម្បីស្នើសុំទៅ សហភាពអឺរ៉ុប ឲ្យរៀបចំកិច្ចប្រជុំកំពូលវិសាមញ្ញមួយ រវាងរដ្ឋមន្ត្រីមហាផ្ទៃ និងរដ្ឋមន្ត្រីយុត្តិធម៌ នៃសមាជិកសហភាពអឺរ៉ុបទាំងអស់។ កិច្ចប្រជុំនេះ អាចនឹងត្រូវធ្វើឡើង ក្នុងរយៈពេល២សប្តាហ៍ទៀត យ៉ាងយូរបំផុត។ រដ្ឋមន្ត្រីប្រទេសទាំងបី ក៏ព្រមព្រៀងគ្នាដែរ ក្នុងការធ្វើបញ្ជីរឈ្មោះប្រទេសដើម ដែលអាចចាត់ទុកថាជាប្រទេសមិនមានគ្រោះថ្នាក់ ដើម្បីងាយស្រួលក្នុងការផ្តល់អាទិភាព ទៅឲ្យជនអន្តោប្រវេសន៍ ដែលមកពីប្រទេសផ្សេងទៀត ជាប្រទេសមានសង្រ្គាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ