ប្រជាជនអ្នកមានតែ១០% បញ្ចេញឧស្ម័នពុលកាបូនិកដល់ពាក់កណ្តាល
ពលរដ្ឋអ្នកមានតែប្រមាណ១០% បានបញ្ចេញឧស្ម័នពុលកាបូនិក ដល់ទៅជាងពាក់កណ្តាល នៃឧស្ម័នពុលក្នុងបរិយាកាសនៅលើភពផែនដី។ ឯចំណែកពលរដ្ឋក្រីក្រខ្លាំងនៅលើពិភពលោក សរុបគ្នាដល់ទៅជាងពាក់កណ្តាលមនុស្សក្រីក្រទៅហើយ បញ្ចេញឧស្ម័នពុលតែប្រមាណ១០%ប៉ុណ្ណោះ។ នេះគឺជាការធានាអះអាងរបស់អង្គការក្រៅរដ្ឋាភិបាលអង់គ្លេស Oxfam ក្នុងរបាយការណ៍ចេញផ្សាយនៅថ្ងៃពុធទី ២ ធ្នូនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
បុគ្គលអ្នកមាន អ្នកបញ្ចេញឧស្ម័នកាបូនិកច្រើន ត្រូវតែទទួលខុសត្រូវលើអ្វីដែលខ្លួនបានបញ្ចេញ ! ប្រទេសកំពុងអភិវឌ្ឍន៍ត្រូវចូលរួមចំណែក ប៉ុន្តែគឺប្រទេសអ្នកមានដែលត្រូវបង្ហាញផ្លូវនិងទទួលបន្ទុកដោះស្រាយផលវិបាកដ៏ធ្ងន់ធ្ងរបង្កឡើងដោយសាររបៀបរស់នៅនិងហូបចុកហឺហា។ នេះគឺអ្វីដែលមានចែងក្នុងរបាយការណ៍Oxfam។
បើតាមរបាយការណ៍ មនុស្សម្នាក់ ដែលស្ថិតក្នុងចំណោមអ្នកមានបំផុត១% នៅលើលោក បានបញ្ចេញឧស្ម័នពុលកាបូនិក ១៧៥ដងលើស ជនក្រីក្រម្នាក់ដែលរស់នៅក្នុងចង្កោម១០%ជាអ្នកទុរគតខ្លាំង។
វិសមភាពដូចមេឃនិងដី ក្នុងទំនាក់ទំនងមានបាន និងការបញ្ចេញឧស្ម័នកាបូនិក បានចេញផ្សាយ នាឱកាសដែលអន្តរជាតិកំពុងចរចាស្វែងរកកិច្ចព្រមព្រៀងរួម ប្រកបដោយមហិច្ឆតា កំរិតការឡើងកំដៅកុំឱ្យលើសពី២អង្សារ បើប្រៀបទៅនឹងសម័យមារោងចក្រនឧស្សាហកម្ម។
“បញ្ហាទំនួលខុសត្រូវក្នុងអតីតកាល” របស់ប្រទេសមហាឧស្សាហកម្ម ដែលបានធ្វើអាកាសធាតុប្តូរផ្លាស់ និងការផ្តល់ជំនួយហិរញ្ញវត្ថុដល់ប្រទេសក្រីក្រកំពុងអភិវឌ្ឍន៍ឱ្យសម្របខ្លួនទៅតាមធម្មជាតិ គឺជាចំណុចដ៏ចម្រូងចម្រាសបំផុតក្នុងកិច្ចចរចាអាកាសធាតុនៅក្រុងប៉ារីសពេលនេះ។
ក្រុមប្រទេសកំពុងអភិវឌ្ឍន៍ប្រកាន់យកគោលការណ៍ “ទទួលខុសត្រូវរួម តែញែកឱ្យខុសគ្នា” មានន័យថាប្រទេសអ្នកមានមានកាតព្វកិច្ចច្រើនជាង។ ឯខាងបណ្តាប្រទេសមហាឧស្សាហកម្មវិញ ចង់ឃើញប្រទេសកំពុងលូតលាស់ខ្លាំងដូចយ៉ាងចិន ឥណ្ឌា ប្រេស៊ីល លូកដៃឱ្យបានជ្រៅខ្លាំងក្នុងប្រយុទ្ធប្រឆាំងនឹងការប្រែប្រួលអាកាសធាតុ នៅឆ្នាំ២០៣០ ប្រទេសទាំងពីរនេះនឹងវ៉ាឈ្នះអាមេរិក ក្លាយជាបំពុលបរិយាកាសខ្លាំងទីមួយនិងទីពីរ នៅលើពិភពលោក។
ប៉ុន្តែបើតាមOxfam ប្រទេសមានឧស្សាហកម្មលូតលាស់ខ្លាំង និងកំពុងអភិវឌ្ឍន៍ បញ្ចេញឧស្ម័នពុលកាន់តែច្រើននិងខ្លាំងជាមុនមែន តែដើម្បីប្រទេសផ្សេងដែរ។ ជាសរុបទៅ ប្រជាជននៅក្នុងប្រទេសអភិវឌ្ឍន៍នៅតែបញ្ចេញខ្ពស់ជាងប្រជាជនក្នុងប្រទេសក្រីក្រដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ