តួកគីថ្លែងថាបានប្រគល់មកម៉ូស្គូគឺតឹកតាងនៃការរំលោភដែនអាកាសតួកគីដោយ យន្តហោះយោធារុស្ស៊ី
តាមប្រព័ន្ធផ្សព្វផ្សាយរុស្ស៊ីថ្ងៃនេះ ដោយថ្លែងក្នុងសន្និសីទកាសែត ល្ងាចមិញ នៅ អារ៉ាប៊ី សាអ៊ូឌីត រដ្ឋមន្ត្រីការបរទេសតួកគី បានអះអាងថា ក្រុងអង់ការ៉ា បានបញ្ជូនមកឲ្យម៉ូស្គូ តាមខ្សែរយៈយោធាគឺ ភស្តុតាងស្តីអំពីការរំលោភដែនអាកាសតួកគី ដោយយន្តហោះប្រដេញរបស់រុស្ស៊ីធុន Sukhoi-34។ ប៉ុន្តែ ក្រុងម៉ូស្គូ នៅមិនទាន់បញ្ជាក់ពីការទទួលតឹកតាងនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ថ្លែងក្នុងសន្និសីទកាសែតនោះ លោករដ្ឋមន្ត្រីការបរទេសតួកគីMevlut Cavusoglu លើកឡើងជាអាទ៏ ៖ ខ្ញុំសង្ឃឹមថា រុស្ស៊ីមុខជានឹងប្រកាន់ឥរិយាបថ ស្គាល់នាទីទទួលខុសត្រូវ ឲ្យកាន់តែមធ្យ័តឡើង ក្នុងបញ្ហានេះ ហើយមុខជាហ៊ាននិយាយការពិតពុំខាន។ គឺតាមខ្សែរយៈ យោធាដែល ក្រុងអង់ការ៉ា បានប្រគល់ ទៅម៉ូស្គូទៅហើយ នូវទិន្នន័យ ស្តីអំពីការបំពានលើ ដែនអាកាសតួកគី ដោយ យន្តហោះចម្បាំងរុស្ស៊ី ធុន Sukhoi-34។
លោក Cavusoglu កត់សម្គាល់ថា ភាគីតួកគី ប្រាថ្នារៀបរយទំនាក់ទំនងជាមួយរុស្ស៊ី ឲ្យមាន ប្រក្រតីភាពឡើងវិញ ដោយមើលឃើញប្រទេសរុស្ស៊ី មិនគ្រាន់តែជាប្រទេសជិតខាងប៉ុណ្ណោះទេ តែ ក៏ជាដៃគូសំខាន់។ ប៉ុន្តែដើម្បីសម្រេចគោលដៅនេះ បើមានតែជំហានឯកតោភាគី ពី ខាង តួកគី ប៉ុណ្ណោះ គឺ នៅមិនទាន់គ្រប់គ្រាន់ទេ។
ជាការរំលឹក កាលពីថ្ងៃសោរ៏ម្សិលម៉្ងៃ ក្រសួងការបរទេសតួកគី បានកោះអញ្ជើញឯកអគ្គរដ្ឋទូត រុស្ស៊ី ដោយប្រគល់ទៅគាត់នូវកំណត់ទូតតវ៉ា ចំពោះការដែល យន្តហោះប្រដេញរុស្ស៊ី ធុន Sukhoi-34 ក្នុងប្រតិបត្តិការនៅស៊ីរី កាលពីថ្ងៃសុក្រ ២៩មករា នៅវេលាម៉ោង១១និង៤៥នាទី បានហោះជ្រុលចូលដែនអាកាសតួកគី ហើយបានស្ថិតនៅក្នុងដែនអាកាសនេះអស់ ២២វិនាទី។
ប៉ុន្តែ ក្រសួងការពារជាតិរុស្ស៊ី បានថ្លែងបដិសេធច្រានចោលការចោទប្រកាន់របស់តួកគី ដោយហៅ ការចោទប្រកាន់នោះ ថាជា “ ការឃោសនាននលគកគ្មានអ្វីជាសំអាងសោះ” និងជាការខិតខំរកលេសដោះសារ ការបាញ់បំផ្លាញដោយតួកគី យន្តហោះទំលាក់គ្រាប់បែករុស្ស៊ី ធុន Sukhoi-24 កាលពីថ្ងៃ២៤វិច្ឆិកា។
មកពីមូលហេតុនេះ ដែលលោកប្រធានាធិបតីតួកគី អ៊ែរដូហ្កាន បានស្នើឲ្យមានជំនួបជាបន្ទាន់រវាងរូបគាត់និងលោកប្រធានាធិបតីរុស្ស៊ីពូទីន ដើម្បីបញ្ចៀសកុំឲ្យមានកើតឡើងទៀតឡើយ ជាផលវិបាក ដូចឧប្បត្តិហេតុជាមួយយន្តហោះរុស្ស៊ី ធុន Sukhoi-24 នោះ។ ប៉ុន្តែគាត់ស្តាយដែលនៅតែមិនទាន់មានចម្លើយពីខាងសមភាគីរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ