តួកគីចង់ស្វែងរកដៃគូផ្គត់ផ្គង់ប្រេង ក្រៅពីរុស្ស៊ី
ភាពតានតឹង និងសង្រ្គាមពាក្យសំដី នៅតែបន្តមានរវាងរុស្ស៊ី និងតួកគី គិតចាប់តាំងពីតួកគីបាញ់ទម្លាក់យន្តហោះទម្លាក់គ្រាប់រុស្ស៊ី កាលពីថ្ងៃទី ២៤វិច្ឆិកា។ នៅថ្ងៃសៅរ៍ ទី ៥វិច្ឆិកា នៅក្នុងសេចក្តីថ្លែងនៅវិទ្យុជាតិ ប្រធានាធិបតីតួកគី លោករេស៊ីប អ៊ែរដូហ្កាន បាននិយាយថា តួកគីកំពុងរកប្រទេសផ្គត់ផ្គង់ប្រេង និងឧស្ម័ន ក្រៅពីរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
តើតួកគីនៅតែបន្តនយោបាយមុខពីរ ឬយ៉ាងណា? នៅផ្នែកការទូត រដ្ឋមន្រ្តីក្រសួងការបរទេសតួកគី កាលពីថ្ងៃសៅរ៍ ទើបតែបានអំពាវនាវឲ្យមានការពិភាក្សា ជាមួយរុស្ស៊ី ដើម្បីបន្ថយភាពតានតឹង ប៉ុន្តែ នៅផ្នែកនយោបាយវិញ ប្រមុខរដ្ឋតួកគីបានប្រកាសដំណឹងមួយដែលនឹងធ្វើឲ្យទីក្រុងម៉ូស្គូមិនសប្បាយចិត្ត។
នៅក្នុងសុន្ទរកថា ថ្លែងនៅវិទ្យុ កាលពីថ្ងៃសៅរ៍ដដែល ប្រធានាធិបតីតួកគី លោករេស៊ីប អ៊ែរដូហ្កាន បានមានប្រសាសន៍ថា តួកគីនឹងរកប្រទេសផ្គត់ផ្គង់ថាមពលឲ្យតួកគី ក្រៅតែពីរុស្ស៊ី។ ដើម្បីទ្រទ្រង់សេដ្ឋកិច្ចរបស់ខ្លួន តួកគីទិញនាំចូល ប្រេង និងឧស្ម័នសឹងតែ១០០ ភាគរយ។ រហូតមកដល់សព្វថ្ងៃនេះ តួកគី ទិញ នាំចូលប្រេងពីរុស្ស៊ី ប្រមាណ៥០ភាគយនៃតម្រូវការសរុប ហើយនិងឧស្ម័ន រុស្ស៊ី ប្រមាណ៣០ភាគរយ។
ការប្រកាសរបស់តួកគី ដែលចង់ស្វែងរកប្រភពផ្គត់ផ្គង់ថាមពលថ្មី ក្រៅពីរុស្ស៊ី កើតមានបន្ទាប់ពីទីក្រុងម៉ូស្គូប្រកាសដាក់ទណ្ឌកម្មសេដ្ឋកិច្ចទៅលើតួកគី ដើម្បីសងសឹកនឹងការណ៍ដែលតួកគីបាញ់ទម្លាក់យន្តហោះចម្បាំងរុស្ស៊ី កាលពីពីរសប្តាហ៍មុន។ លោកប្រធានាធិបតី រុស្ស៊ី ពូទីន នៅបានថ្លែងចំៗ ឈ្មោះ ប្រធានាធិបតីតួកគី និងក្រុមគ្រួសារ ថា ជាអ្នកទិញប្រេងពីក្រុមជីហាតអង្គការរដ្ឋអ៊ីស្លាម រហូតធ្វើឲ្យក្រុមនេះ មានលុយសម្រាប់ធ្វើសង្រ្គាមភេរវកម្ម។ លោកប្រធានាធិបតីតួកគី អ៊ែរដូហ្កាន បានទាត់ចោលការចោទប្រកាន់ ដែលលោកចាត់ទុកថា គ្មានសីលធម៌ពីភាគីប្រធានាធិបតីរុស្ស៊ី។
ប្រធានាធិបតីតួកគី កាលពីថ្ងៃសៅរ៍បានបញ្ជាក់ថា ជម្លោះ សងសឹកតួកគី និងរុស្ស៊ី នៅមិនទាន់ប៉ះពាល់ ទៅដល់កិច្ចសន្យា ទិញប្រេង ពីរុស្ស៊ី នៅឡើយទេ ប៉ុន្តែ យ៉ាងណាក៏ដោយ តាមលោករេស៊ីប អ៊ែរដូហ្កាន តួកគី នៅសប្តាហ៍នេះ បានចុះហត្ថលេខាទិញប្រេងពីការតា។ លើសពីនោះ តួកគីកំពុងមានគម្រោងផងដែរ ចង់ទិញឧស្ម័នពីប្រទេស អាស៊ែបៃហ្សង់។
ខឹងនឹងតួកគីដែលមិនព្រមសុំទោស ក្នុងរឿងបាញ់ទម្លាក់យន្តហោះទម្លាក់គ្រាប់បែករបស់ខ្លួន នៅក្នុងប្រទេសស៊ីរី ទីក្រុងម៉ូស្គូ នៅសប្តាហ៍នេះបានប្រកាសចាត់វិធានការជាច្រើនដាក់ទណ្ឌកម្មលើតួកគី។ ក្រៅតែពីហាមឈប់ឲ្យនាំចូល ផ្លែឈើ បន្លែពីតួកគី ប្រធានាធិបតីរុស្ស៊ី បានហាមផ្តាច់ មិនឲ្យក្រុមហ៊ុនរុស្ស៊ី រើសបញ្ចូលបុគ្គលិកជនជាតិតួកគី។ រុស្ស៊ី នៅបានសម្រេចឲ្យប្រជាជនតួកគីត្រូវសុំទិដ្ឋាការ ដើម្បីចូលរុស្ស៊ី ចាប់តាំងពីខែមករា ឆ្នាំក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ