រដ្ឋមន្ត្រីការពារជាតិរុស្ស៊ីបាននាំសារលោកពូទីនទៅជូនលោកប្រធានាធិបតីអ៊ីរ៉ង់
ថ្ងៃ២១កុម្ភៈ ក្នុងក្របខ័ណ្ឌនៃទស្សនកិច្ច ឥតមានប្រកាសជាមុន នៅក្រុង តេហេរ៉ង់ លោករដ្ឋមន្ត្រីការពារជាតិរុស្ស៊ី បានត្រូវទទួលជួបប្រាស្រ័យដោយលោកប្រធានាធិបតីអ៊ីរ៉ង់និងបានប្រគល់ជូនគាត់នូវសាររបស់លោកប្រធានាធិបតីរុស្ស៊ីព្រមទាំងបានជួបចរចា ជាមួយ រដ្ឋមន្ត្រីការពារជាតិអ៊ីរ៉ង់ផង - ដំណឹងនេះ ផ្សាយដោយទីភ្នាក់ព័ត៌មានផ្លូវការរុស្ស៊ី ITAR-TASS យោងទៅលើទីភ្នាក់ងារព័ត៌មានអ៊ីរ៉ង់ IRNA។
ចុះផ្សាយនៅថ្ងៃ៖
ស្តាប់ - ០២:១០
វិមានក្រេមឡាំងគូសបញ្ជាក់ថា ទស្សនកិច្ចលោករដ្ឋមន្ត្រីការពារជាតិរុស្ស៊ី Serguei Shogu នៅអ៊ីរ៉ង់ គឺជាការបន្តទៅការសន្ទនាគ្នាជារឿយៗ រវាងក្រុងម៉ូស្គូនិងតេហេរ៉ង់។ តាមអ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ គឺមួយសប្តាហ៏មុនថ្ងៃ១៥កុម្ភៈ ដែលពេលបំពេញទស្សនកិច្ចនៅម៉ូស្គូ លោករដ្ឋមន្ត្រីការពារជាតិអ៊ីរ៉ង់ Hossein Dehghan ក៏ត្រូវបានទទួល ជួបដោយលោកប្រធានាធិបតីរុស្ស៊ីពូទីន ដែលកាលណោះ សាច់រឿង គឺប៉ះលើ“បញ្ហាប្លែកៗ នៃសហប្រតិបត្តិការយោធា-បច្ចេកទេស “។
ហើយតាមដែល ITAR-TASS ផ្សាយនាកិច្ចចរចាថ្ងៃ២១កុម្ភៈម្សិលមិញ នៅក្រុង តេហេរ៉ង់ លោករដ្ឋមន្ត្រីការពារជាតិរុស្ស៊ី Serguei Shogu បានពិភាក្សាជាមួយប្រធានាធិបតីអ៊ីរ៉ង់ លោកHassan Rouhani គឺ “ អំពីដំណើរវិវឌ្ឍន៍ទៅនៃស្ថានការណ៍នៅតំបន់និងមាគ៌ាបំផុសបំផុលសហប្រតិបត្តិការក្នុងវិស័យយោធានិងវិស័យការពារប្រទេស “។
រីឯទីភ្នាក់ងារព័ត៌មាន អ៊ីរ៉ង់ IRNA អះអាងថា ក្នុងសារលិខិតលោកពូទីន មាននិយាយអំពីអភិក្រមនៃកិច្ចចរចាជុំវិញដំណោះស្រាយវិបត្តិនៅស៊ីរី ប៉ុន្តែវិមានក្រេមឡាំងមិនធ្វើអត្ថាធិប្បាយអ្វីណាទេ ទៅលើដំណឹងផ្សាយដោយ IRNA។ មិនតែប៉ុណ្ណោះ លោក Shoguនិងលោក Rouhani ក៏ បានពិភាក្សាអំពី “ វិធានការពង្រឹងសន្តិសុខតំបន់ “។
ចំណែកខ្លឹមសារនៃកិច្ចចរចាម្សិលមិញរវាងរដ្ឋមន្ត្រីការពារជាតិរុស្ស៊ីនិងអ៊ីរ៉ង់នៅតេហេរ៉ង់ ត្រូវបានបង្ហើបឲ្យដឹងដោយទីភ្នាក់ងារព័ត៌មានរុស្ស៊ី Interfax គឺថា៖ គូភាគីបានពិភាក្សាទៅលើ“ ដំណើរបំពេញតាមកិច្ចព្រមព្រៀងអន្តររដ្ឋាភិបាល ដែលមានចុះកាលពីខែមករាឆ្នាំមុន ស្តីអំពី សហប្រតិបត្តិការក្នុងវិស័យយោធា“។
គួរនិយាយថា ជាលទ្ធផលនៃ ទស្សនកិច្ច រដ្ឋមន្ត្រីការពារជាតិអ៊ីរ៉ង់ នៅម៉ូស្គូ មួយសប្តាហ៍មុន ភាគីអ៊ីរ៉ង់ សំដែងនូវការយកចិត្តទុកដាក់ ចង់ទិញទាំងប្រព័ន្ធមីស៊ីលការពារដែនអាកាសរបស់រុស្ស៊ីធុនទំនើបបំផុត S-400 ដែលទាក់ទងនឹងរឿងនេះតាមការចុះផ្សាយនៃកាសែតរុស្ស៊ី គូភាគីហាក់បីបានចាប់ផ្តើមកិច្ចចរចាទៅហើយ។
តាមកាសែតក្រុងម៉ូស្គូ Kommersant យោងទៅលើប្រភពនៅរុស្ស៊ីផ្ទាល់ អ៊ីរ៉ង់គ្រោងទិញពីរុស្ស៊ីគឺសព្វាវុធក្នុងទឹកប្រាក់ ៨ ០០០ លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ