អាមេរិកផ្ទៀងផ្ទាត់ការលក់កាំជ្រួចមីស្ស៊ីលរុស្ស៊ី S-300 ទៅឲ្យអ៊ីរ៉ង់
រដ្ឋបាលស.រ.អា.ពិនិត្យផ្ទៀងផ្ទាត់មើល តើការដែលរុស្ស៊ី គ្រោងលក់ប្រព័ន្ធមីស្ស៊ីល ការពារដែនអាកាសធុន S-300 ទៅឲ្យអ៊ីរ៉ង់ ធ្លាក់ឬទេទៅនៅក្រោមធរមាននៃច្បាប់អាមេរិកាំង ស្តីអំពីទណ្ឌកម្ម។ មូលហេតុនៃសេចក្តីថ្លែងការណ៍នេះ របស់ក្រសួងការបរទេសអាមេរិកាំង គឺ មកពី មានដំណឹងលេចឮចេញមកនាថ្ងៃ១៨សីហាថា ក្នុងសប្តាហ៍ក្រោយ ក្រុង តេហេរ៉ង់ សង្ឃឹមចុះជាមួយក្រុងម៉ូស្គូ កិច្ចសន្យាថ្មី ដើម្បីទិញប្រព័ន្ធមីស្ស៊ីលរុស្ស៊ីនោះ។ ប៉ុន្តែ ក្រសួងការបរទេសរុស្ស៊ី បានថ្លែងទៅហើយថា កិច្ចសន្យានេះ គឺប៉ះតែលើភាគីរុស្ស៊ីនិងអ៊ីរ៉ង់ប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
“ការផ្ទេរទៅឲ្យអ៊ីរ៉ង់ នូវប្រព័ន្ធសព្វាវុធសម្រាប់ការពារ គឺឥតហាមប្រាមដោយ សេចក្តីសម្រេចរបស់ក្រុមប្រឹក្សាសន្តិសុខអ.ស.ប.ឡើយ ប៉ុន្តែយើងនឹងពិនិត្យមើល តើការនេះ បំពានឬ ក៏មិនបំពានទេ លើច្បាប់អាមេរិកាំង ស្តីអំពីទណ្ឌកម្មប្រឆាំងអ៊ីរ៉ង់?” - សេចក្តីនេះ ថ្លែងល្ងាចថ្ងៃ ១៨សីហា ដោយអ្នកនាំពាក្យផ្លូវការនៃក្រសួងការបរទេសអាមេរិក លោក John Kirby ដោយធ្វើ អត្ថាធិប្បាយទៅលើដំណឹងដែលមាន។
អ្នកនាំពាក្យនេះ ក៏កត់សម្គាល់ថា គោលជំហរស.រ.អា. ស្ថិតនៅឥតប្រែប្រួលទេ ដូចដែលប្រមុខការទូតអាមេរិក លោក John Kerry ធ្លាប់បានសំដែងនូវក្តីកង្វល់របស់ខ្លួន អំពីរឿងនេះ ទៅកាន់សមភាគីរុស្ស៊ី លោក Serguei Lavrov ថា “ក្រុងវ៉ាស៊ីនតោន ជំទាស់នឹងការលក់កាំជ្រួច S-300 របស់រុស្ស៊ី ទៅឲ្យអ៊ីរ៉ង់”។
លោក Kirby ពន្យល់បំភ្លឺ ពីក្តីកង្វល់នេះរបស់អាមេរិក ដោយអ៊ីរ៉ង់ខាងនយោបាយក្រៅប្រទេស គាំទ្រដល់ពពួកក្រុមនៅតំបន់ដើមបូព៌ា ដែលត្រូវក្រុងវ៉ាស៊ីនតោន ចាត់ទុក ជា ក្រុមភេរវនិយម។
គឺម្សិលមិញ ដែលទីភ្នាក់ងារពត័មានស៊ីរី SANA យោងទៅលើសេចក្តីថ្លែងការណ៍ របស់លោករដ្ឋមន្ត្រីការពារជាតិអ៊ីរ៉ង់ ឧត្តមសេនីយ Hossein Dehghan ផ្សាយថា ក្រុង តេហេរ៉ង់ សង្ឃឹមចុះ ក្នុងសប្តាហ៍ក្រោយ ជាមួយក្រុងម៉ូស្គូ នូវកិច្ចសន្យាថ្មី ដើម្បីទិញមីស្ស៊ីលរុស្ស៊ី ធុន S-300 ក្នុងទឹកប្រាក់ច្រើនជាងមុនឆ្ងាយ។
ជាការរំលឹក ក្នុងឆ្នាំ២០០៧ អ៊ីរ៉ង់បានចុះកិច្ចសន្យា ម្តងទៅហើយដើម្បីទិញពីរុស្ស៊ី នូវប្រព័ន្ធមីស្ស៊ីល S-300 ក្នុងទឹកប្រាក់ ៩០០លានដុល្លារ។ ប៉ុន្តែនៅឆ្នាំ ២០១០ ដោយបំពេញ តាម សេចក្តីសម្រេចនៃក្រុមប្រឹក្សាសន្តិសុខអ.ស.ប. ឆ្នាំនោះឯង ដែលជាទូទៅ ហាមមិនឲ្យលក់ អាវុធទៅអ៊ីរ៉ង់ លោកឌ្មីទ្រី មេដវេដេវ ដែលកាលណោះជាប្រធានាធិបតីរុស្ស៊ី បានចេញក្រិត្យ ខ្ទប់តែម្តង ការលក់មីស្ស៊ីល S-300 ទៅ ក្រុង តេហេរ៉ង់ ។
ក្រសួងការបរទេសរុស្ស៊ី បានថ្លែងទៅហើយថា ការដែលរុស្ស៊ីលក់ប្រព័ន្ធការពារដែនអាកាស ធុន S-300 ទៅអ៊ីរ៉ង់ វាជាកិច្ចការទ្វេភាគីសុទ្ធសាធ ហើយឥតតម្រូវឲ្យមានការចូលរួមអ្វីណា ពីខាងភាគីទី៣ឡើយ។
មីស្ស៊ីល S-300 គឺទុកសម្រាប់បាញ់ចេញពីដីទៅកំទេច ទីដៅក្នុងអាកាស ដែលស្ថិតនៅកំពស់ ចាប់ពីប៉ុន្មានសិបម៉ែត្រ រហូតដល់ រាប់រយគីឡូម៉ែត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ