អង្គការរដ្ឋអ៊ីស្លាមបង្ហាញវិដេអូចំណាប់ថ្នូរអង់គ្លេស ជាថ្មី
ក្នុងពេលដែលបារាំងនិងបែលហ្ស៊ិកទើបចាប់បានខ្លួនជនជីហាតសង្ស័យបង្កភេរវកម្មនៅក្រុងប៉ារីស អង្គការរដ្ឋអ៊ីស្លាមបានបង្ហោះផ្សព្វផ្សាយខ្សែវីដេអូថ្មីមួយទៀត នៅថ្ងៃសៅរ៍នេះ បង្ហាញរូបភាពអ្នកកាសែតជនជាតិអង់គ្លេស លោក John Cantlie ជាប់ជាចំណាប់ខ្មាំងក្នុងដៃពួកគេតាំងពីជាងបីឆ្នាំមកហើយ។ ជារូបភាពដែលទំនងជាថតនៅក្នុងក្រុងម៉ូសូល ភាគខាងជើងប្រទេសអ៊ីរ៉ាក់។
ចុះផ្សាយនៅថ្ងៃ៖
ស្តាប់ - ០១:៤៧
នៅក្នុងខ្សែវីដេអូបែបឃោសនា បង្ហោះក្នុងវិបសៃត៍ពួកជីហាត លោក John Cantlie ឈរនិយាយទៅកាន់កាមេរ៉ា ធ្វើដូចជាអ្នកកាសែតកំពុងផ្សាយក្នុងទូរទស្សន៍ពិតៗ។ ក្នុងសម្លៀកបំពាក់ អាវធំ ខោខ្មៅ អ្នកកាសែតបានអះអាងថាកំពុងស្ថិតនៅក្នុងក្រុងម៉ូសូល ក្រុងទីពីររបស់អ៊ីរ៉ាក់ ដែលធ្លាក់ទៅក្នុងកណ្តាប់ដៃពួកអង្គការរដ្ឋអ៊ីស្លាម កាលពីពីខែមិថុនា ឆ្នាំ២០១៤។
គេបានថតអ្នកកាសែតឈរនៅមុខ តូបលក់ខិត្តបណ្ណឃោសនាចលនាជីហាតរដ្ឋអ៊ីស្លាម ដែល បានក្លាយជាបំណែកលោហៈ បែកខ្ចាយពេញដី ក្រោមគ្រាប់សំណរនៃការវាយប្រហារផ្លូវអាកាសរបស់កងកម្លាំងសម្ព័ន្ធមិត្ត ដឹកនាំដោយសហរដ្ឋអាមេរិក។ និយាយជាភាសាអង់គ្លេស បកប្រែសរសេរលើកញ្ចក់ទូរទស្សន៍ជាភាសាអារ៉ាប និងក្នុងស្ទីលតែមួយ អ្នកកាសែត Cantlie បានរិះគន់ការវាយប្រហារតាមផ្លូវអាកាសរបស់សម្ព័ន្ធមិត្តនៅអ៊ីរ៉ាក់ តាំងពីខែកញ្ញា២០១៤ និងក្រោយមកទៀត នៅស៊ីរី។
នេះមិនមែនជាលើកទីមួយទេ ដែលពួកអង្គការរដ្ឋអ៊ីស្លាម បានបង្ហាញវីដេអូ មានអ្នករូបអ្នកកាសែត កេនលី ធ្វើបទយកការណ៍ស្តីអំពីជីវិតរស់នៅក្នុងតំបន់កាន់កាប់ដោយពួកជីហាត។ វីដេអូចុងក្រោយដែលគេបានឃើញ គឺកាលពីដើមឆ្នាំ២០១៥។
សូមបញ្ជាក់ថា John Cantlie ត្រូវបានពួកអង្គការរដ្ឋអ៊ីស្លាមចាប់ខ្លួនជាចំណាប់ខ្មាំង នៅស៊ីរី កាលពីខែវិច្ឆិកា ២០១២ ក្នុងពេលកំពុងចុះទៅយកព័ត៌មានស្តីពីវិបត្តិនៅស៊ីរី ជាមួយអ្នកកាសែតអាមេរិក លោក James Foley ចំណាប់ខ្មាំងដំបូងគេដែលអង្គការរដ្ឋអ៊ីស្លាមបានប្រហារជីវិត។ អង្គការក្រៅរដ្ឋាភិបាល ដូចជាអង្គការអ្នកយកការណ៍គ្មានព្រំដែនបានថ្កោលទោសពួកជីហាតរដ្ឋអ៊ីស្លាម ដែលបានប្រើវិធីសាស្ត្រគួរឱ្យស្អប់ខ្ពើម បង្ខំចំណាប់ខ្មាំងឱ្យធ្វើបទយកការណ៍ដើម្បីឃោសនានយោបាយជីហាតរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ