កងកុម្ម៉ង់ដូនិងភ្នាក់ងារចារកិច្ចបារាំងកំពុងធ្វើសកម្មភាពដោយសម្ងាត់នៅលីប៊ី?
កាលពីថ្ងៃពុធម្សិលមិញ កាសែតបារាំងឈ្មោះ ឡឺម៉ុងដ៍ (Le Monde) បានចុះផ្សាយឲ្យដឹងថា នៅក្នុងពេលបច្ចុប្បន្ននេះ កងកុម្ម៉ង់ដូរបស់បារាំងជាច្រើននាក់ កំពុងធ្វើសកម្មភាពដោយសម្ងាត់នៅក្នុងប្រទេសលីប៊ី។ ព័ត៌មានដែលត្រូវបានទទួលស្គាល់ដោយអាជ្ញាធរលីប៊ី។ ក៏ប៉ុន្តែ ក្រសួងការពារជាតិបារាំងសម្រេចបើកការស៊ើបអង្កេតមួយ ដើម្បីវែករកមុខអ្នកបញ្ចេញព័ត៌មាននេះ ដែលត្រូវចាត់ទុកជាការណ៍សម្ងាត់រដ្ឋ។
ចុះផ្សាយនៅថ្ងៃ៖
ស្តាប់ - ០២:១៨
យោងតាមកាសែតឡឺម៉ុងដ៍ វត្តមាននៃកងកុម្ម៉ង់ដូបារាំងនៅក្នុងប្រទេសលីប៊ី ត្រូវបានគេសម្គាល់ឃើញចាប់តាំងពីពាក់កណ្តាលខែកុម្ភៈកន្លងទៅថ្មីៗនេះ ក៏ប៉ុន្តែ គេមិនទាន់អាចដឹងឲ្យពិតប្រាកដនៅឡើយទេថា តើកងកុម្ម៉ង់ដូទាំងនេះត្រូវបានបញ្ជូនទៅកាន់ប្រទេសលីប៊ីចាប់តាំងពីពេលណាមក។
កងកម្លាំងរបស់បារាំង ដែលកំពុងធ្វើសកម្មភាពនៅក្នុងប្រទេសលីប៊ីនេះ គឺរួមមានទាំងកងកម្លាំងមកពីទីភ្នាក់ងារចារកិច្ច (DGSE) ដែលធ្វើសកម្មភាពដោយលួចលាក់ដោយបន្លំខ្លួនជាជនស៊ីវិល និងកងកុម្ម៉ង់ដូប្រដាប់ដោយអាវុធនិងឯកសណ្ឋានទាហាន។ កងកម្លាំងទាំងពីរប្រភេទនេះធ្វើសកម្មភាពដោយមានទំនាក់ទំនងជាមួយកងកុម្ម៉ង់ដូអាមេរិក និងអង់គ្លេស ក្នុងគោលដៅស្វែងរកទីតាំងក្រុមជីហាតរដ្ឋអ៊ីស្លាម នៅក្នុងប្រទេសលីប៊ី ដើម្បីដៅជាចំណុចស៊ីប សម្រាប់ការវាយប្រហារតាមផ្លូវអាកាស។
កាសែតឡឺម៉ុងដ៍ក៏បានឲ្យដឹងផងដែរថា ក្រៅពីកងកម្លាំងសម្ងាត់ដែលធ្វើសកម្មភាពនៅលើដី បារាំងក៏បានបញ្ជូនយន្តហោះចម្បាំងឲ្យទៅធ្វើសកម្មភាពនៅក្នុងដែនអាកាសរបស់លីប៊ីផងដែរ។
ប៉ុន្មានម៉ោងក្រោយពីការចុះផ្សាយរបស់កាសែតឡឺម៉ុងដ៍ រដ្ឋាភិបាលលីប៊ី ដែលមានមូលដ្ឋាននៅទីក្រុងទ្រីប៉ូលី ហើយដែលមិនត្រូវបានទទួលស្គាល់ដោយសហគមន៍អន្តរជាតិ បានចេញសេចក្តីប្រកាសព័ត៌មានមួយបញ្ជាក់ថា កងកុម្ម៉ង់ដូរបស់បារាំង គឺពិតជាកំពុងតែមានវត្តមាននៅក្នុងប្រទេសលីប៊ីមែន ហើយកំពុងតែធ្វើការដឹកនាំប្រតិបត្តិការយោធាប្រឆាំងនឹងក្រុមអ៊ីស្លាមប្រកាន់តឹង នៅក្នុងទីក្រុងបេនហ្កាហ្ស៊ី។
ក្រសួងការពារជាតិបារាំងវិញមិនបានចេញមុខទទួលស្គាល់ ឬក៏បដិសេធព័ត៌មានស្តីពីវត្តមានកងកុម្ម៉ង់ដូបារាំងនៅលីប៊ីនេះទេ ក៏ប៉ុន្តែ បានសម្រេចបើកការស៊ើបអង្កេតមួយ ដើម្បីស្វែងរកអ្នកដែលបានបញ្ចេញព័ត៌មាន ដែលត្រូវបានចាត់បញ្ចូលជាការណ៍សម្ងាត់រដ្ឋ។ មន្រ្តីជំនិតនឹងរដ្ឋមន្រ្តីក្រសួងការពារជាតិបារាំងបានប្រាប់ទីភ្នាក់ងារព័ត៌មានអាអ៊ែហ្វប៉េថា នៅពេលណាដែលកងកុម្ម៉ង់ដូបើកធ្វើសកម្មភាពដោយសម្ងាត់ គេចាំបាច់ត្រូវតែលាក់ការណ៍សម្ងាត់ ពីព្រោះថា កាលណាព័ត៌មានត្រូវលេចធ្លាយជាសាធារណៈ វាអាចនឹងធ្វើឲ្យប៉ះពាល់ទៅដល់សុវត្ថិភាពផ្ទាល់ខ្លួនរបស់កងកុម្ម៉ង់ដូ ព្រមទាំងអាចធ្វើឲ្យប្រតិបត្តិការសម្ងាត់នេះត្រូវទទួលបរាជ័យ។
គួរបញ្ជាក់ថា បច្ចុប្បន្ននេះ បារាំង ក៏ដូចជាអាមេរិក និងប្រទេសសម្ព័ន្ធមិត្តផ្សេងទៀត កំពុងតែមានក្តីបារម្ភខ្លាំង ដោយមើលឃើញពីការកើនឡើងនៃវត្តមានក្រុមជីហាតរដ្ឋអ៊ីស្លាមនៅក្នុងប្រទេសលីប៊ី ដែលជាប្រទេសកំពុងស្ថិតក្នុងភាពអនាធិបតេយ្យពេញទំហឹង ចាប់តាំងពីក្រោយបដិវត្តន៍ទម្លាក់មេដឹកនាំផ្តាច់ការកាដាហ្វ៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ