ទស្សនកិច្ចលោកប្រមុខការទូតប៉ាឡេស្ទីននៅរុស្ស៊ី
នារសៀលថ្ងៃ៨មិថុនាម្សិលមិញ ក្នុងក្របខ័ណ្ឌទស្សនកិច្ចផ្លូវការនៅក្រុងមូស្គូ លោកប្រមុខការទូតប៉ាឡេស្ទីន Ryad al-Maliki បានជួបចរចា ជាមួយលោករដ្ឋមន្ត្រីការបរទេស រុស្ស៊ី ស៊ែរហ្គៃ ឡាវ៉្រូវ ដោយផ្តោតទៅលើដំណោះស្រាយជម្លោះអ៊ីស្រាអែល-ប៉ាឡេស្ទីន។ ថ្លែង បន្ទាប់មក ក្នុងសន្និសីទកាសែត គូភាគីបានឯកភាពគ្នាថា នៅលើផ្លូវដំណោះស្រាយនេះ ដែល ធ្លាក់ក្នុងភាពជាប់គាំង ជាបឋម ត្រូវតែស្តារឡើងវិញកិច្ចចរចាប៉ាឡេស្ទីន អ៊ីស្រាអែលដែលបានផ្តាច់ទៅ អស់ពីរឆ្នាំមកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
អ្វីជាការកត់សម្គាល់ ទស្សនកិច្ចលោកប្រមុខការទូតប៉ាឡេស្ទីន នៅមូស្គូ ប្រព្រឹត្តទៅ គឺរំលងផុត តែ៥ថ្ងៃសោះ ក្រោយពីនៅក្រុងប៉ារីស តាមគំនិតផ្តួចផ្តើមរបស់បារាំង មានបើកធ្វើ កាលពីថ្ងៃ៣មិថុនា ជំនួបថ្នាក់រដ្ឋមន្ត្រី នៃ២៦ប្រទេសដើម្បីសាកល្បង ស្តារឡើងវិញកិច្ចចរចា ប៉ាឡេស្ទីន-អ៊ីស្រាអែល ដែល បានផ្តាច់ទៅពីរឆ្នាំមុន។ ចំណុច គួរឲ្យកត់សម្គាល់មួយទៀត គឺ គណៈប្រតិភូប៉ាឡេស្ទីន វត្តមាននៅម៉ូស្គូ ចំពេល ដែលលោកនាយករដ្ឋមន្ត្រីអ៊ីស្រាអែល Benjamin Netanyahou បង្ហើយទស្សនកិច្ចរយៈពេល៣ថ្ងៃរបស់គាត់ ក្នុងរដ្ឋធានីរុស្ស៊ីតែម្តង។
ទាក់ទងនឹងរឿងនេះ លោកប្រមុខការទូតប៉ាឡេស្ទីន Ryad al-Maliki ថ្លែងថា ការដែលមូស្គូ មាន ទំនាក់ទំនងល្អ ជាមួយប៉ាឡេស្ទីនផង ជាមួយអ៊ីស្រាអែលផង គឺ ទទួលយកទៅដាក់លើខ្លួន នូវ តួនាទីជាសន្តិភាវូបនីយករ។ លោក Maliki បានសម្តែងសេចក្តីសោមនស្សចំពោះការផ្លាស់ប្តូរមតិដោយស៊ីជម្រៅ ដោយ ស្មោះត្រង់ ជាមួយលោក ស៊ែរហ្គៃ ឡាវ្រ៉ូវ រដ្ឋមន្ត្រីការរទេសរុស្ស៊ី ប្រទេស ជាមិត្តប៉ាឡេស្ទីន។
តាមសម្តីគាត់ រុស្ស៊ី ដែលស្ថិតនៅក្នុងក្រុម ៤អន្តរការីអន្តរជាតិ ទន្ទឹមនឹង ស.រ.អា. សហភាពអឺរ៉ុប អ.ស.ប. គឺ អាចដើរតួវិជ្ជមាន ក្នុងការបង្ខិតគោលជំហរ របស់ភាគីបដិបក្ខឲ្យចូលជិតគ្នា ដើម្បីរក ដំណោះស្រាយ តាមផ្លូវនយោបាយ ឲ្យជម្លោះអ៊ីស្រាអែល-ប៉ាឡេស្ទីន។ គាត់ក៏លើកឡើងថា ភាគីប៉ាឡេស្ទីន ស្ថិតនៅភក្តីឥតរេរា ចំពោះការបង្កើតឡើង ជារដ្ឋប៉ាឡេស្ទីនឯករាជ្យ ក្នុងព្រំដែន ឆ្នាំ១៩៦៧។
ត្រង់ចំណុចនេះ គួររំលឹកថា ការទាមទារបែបនេះ រមែងច្រានចោលដោយភាគីអ៊ីស្រាអែល ពីព្រោះព្រំដែននោះ រួមក្តោបទាំងសង្កាត់ខាងកើតនៃក្រុង Jerusalem ជាទីដែលមានជនជាតិ អ៊ីស្រាអែល ចំនួន កន្លះលាន នាក់ រស់នៅទៅហើយ។ ថ្លែងក្នុងសន្និសីទកាសែតនោះ លោករដ្ឋមន្ត្រីការបរទេសរុស្ស៊ី ស៊ែរហ្គៃ ឡាវ៉្រូវ សង្កត់ធ្ងន់ទៅលើចំណុចពីរ គឺថា ទី១ ត្រូវតែដាក់ឲ្យក្រុម៤អន្តរការីអន្តរជាតិដែលទទួលរ៉ាប់រងដោះស្រាយ ស្ថានការណ៍ស្មុគស្មាញនៅតំបន់ដើមបូព៌ា ដំណើរការកាន់តែសកម្មឡើងដើម្បីកុំបណ្តោយឲ្យមានសង្គ្រាមផ្ទុះឡើងជាថ្មីរវាងអ៊ីស្រាអែល និងប៉ាឡេស្ទីន ហើយទី២ រុស្ស៊ីត្រៀមចាត់ចែងឡើងជាលើកបន្តបន្ទាប់នៅក្រុងម៉ូស្គូ គឺជំនួបរវាងភាគីបដិបក្ខផ្ទៃក្នុងប៉ាឡេស្ទីនផ្ទាល់ក្នុងនាមនៃឯកភាពជាតិប៉ាឡេស្ទីន។
ចំណែករឿងស្តារឡើងវិញ កិច្ចចរចាអ៊ីស្រាអែល-ប៉ាឡេស្ទីននោះតាមសម្តីលោកឡាវ៉្រូវ ពេលវេលានឹងបង្ហាញឲ្យឃើញ តើវានឹងលេចចេញជាផ្លែផ្កាយ៉ាងណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ